ފަރުވާ އަވަސްމިނެއްގައި ފޯރުކޮށް ނުދެވިގެން ފުރާނައެއް ނެތިދިއުން ކުށްވެރިކުރަން- އެޗްއާރްސީއެމް
ސިއްހީ ފަރާތްތަކުން ދޭން ޖެހޭ ފަރުވާ ވީހާވެސް އަވަހަކަށް ދިނުމަށް އިލްތިމާސް ކުރާކަމަށް އެޗްއާރްސީއެމުން ބުނޭ
އެޗްއާރްސީއެމުން ބުނީ ފަރުވާ ދިނުމުގައި ކަން ހިނގާފައިވާ ގޮތް އެ ކޮމިޝަނުން ބަލާނެ ކަމަށް
ބަލިމީހާއަށް ލިބެންޖެހޭ ސިއްހީ ފަރުވާ އަވަސްމިނެއްގައި ފޯރުކޮށް ނުދެވިގެން ފުރާނައެއް ނެތިދިއުން ކުށްވެރިކުރާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)އިން ބުނެފިއެވެ.
ކޮވިޑް-19ގައި ރާއްޖެއިން ފުރަތަމަ ފަހަރަށް ކުޑަކުއްޖަކު ނިޔާވި މައްސަލައާ ގުޅިގެން އެޗްއާރްސީއެމުން ބުނީ، ފަރުވާ ދިނުމުގައި ކަން ހިނގާފައިވާ ގޮތް އެ ކޮމިޝަނުން ބަލާނެ ކަމަށެވެ.
ނިޔާވެފައި ވަނީ ހދ. ކުޅުދުއްފުށީ ލާޖަހާގޭ ފާތިމަތު މިޝްކާއެވެ. އޭނާގެ އާއިލާއިން ބުނިގޮތުގައި، ކުއްޖާގެ ހާލު ދެރަވެ އެޗްޕީއޭއަށް އެންގީ 31 ވަނަ ދުވަހުގެ ރޭ 9 ޖެހި އިރުއެވެ. އެތައް ފަހަރަކު ގުޅައިގެން އެދުމުން ވެސް އެޗްޕީއޭއިން ބުނީ "މެޑިކަލް ޓީމަށް ގުޅައި، އަންގައިފި" ކަމަށެވެ. އެހެންނަމަވެސް، ދެ ގަޑި އިރު ވެގެން ދިޔަ އިރު ވެސް އެމްބިއުލާންސް ނާންނަ ކަމަށެވެ. ކޮވިޑް-19 ޕޭޝަންޓެއް ކަމުން އައިޖީއެމްއެޗުން ވެސް ފަރުވާދޭން އެއްބަސް ނުވި ކަމަށާއި އެންމެ ފަހުން އެޗްޕީއޭއިން އެމްބިއުލާންސް ފޮނުވީ ދެ ގަޑި އިރު ފަހުން އެ ރޭ 11:30 ހާއިރު ކަމަށް ބުނެފައިވެއެވެ.
އާއިލާއިން ބުނީ ހޮސްޕިޓަލަށް ގެންދިޔައިރު ކުއްޖާގެ ހޭ ވެސް ނެތްކަމަށާއި، ކުއްޖާ އޮތީ ހުއްޓިފައި ކަމަށެވެ. އެމްބިއުލާންސް ފޮނުވުމުގައި ލަސްވި ކަމަށް ހެލްތު މިނިސްޓްރީން ވެސް އިއުތިރާފުވެފައިވެއެވެ.
އެޗްއާރްސީއެމުން ބުނީ ނިޔާވި ކުޑަކުއްޖާއަށް ސުވަރުގޭގެ ދާއިމީ ނިޢުމަތް ލެއްވުމަށާއި، މި އުނދަގޫ ދަނޑިވަޅުގައި އާއިލާއަށް ކެތްތެރިކަން ދެއްވުން އެެދި ދުޢާކުރާ ކަމަށެވެ. އަދި ކޮވިޑް-19 ގެ މި ހާލަތުގައި ސިއްހީ ފަރާތްތަކުން ދޭން ޖެހޭ ފަރުވާ ވީހާ ވެސް އަވަހަކަށް ދިނުމަށް މަސައްކަތް ކުރުމަށް އެ ކޮމިޝަނުން އިލްތިމާސް ކުރާ ކަމަށެވެ.
