މުލިއާގޭގެ ގޭޓް ގޮއްވާލާނެ ކަމުގެ އިންޒާރާއެކު ސެކިއުރިޓީ ވަރުގަދަކޮށްފި

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ދިރިއުޅުއްވަމުން ގެންދަވާ މުލިއާގެ ގޭޓް ގޮއްވާލާނެ ކަމުގެ އިންޒާރު ދީފިއެވެ.

އިތުބާރު ހުރި ފަރާތަކުން ރާއްޖެއެމްވީއަށް ބުނީ މުލިއާގޭގެ ގޭޓް ގޮއްވާލާނެކަމުގެ އިންޒާރު މެއި މަހުގެ 30 ވަނަ ދުވަހުގެ ރޭ ލިބިފައިވާ ކަމަށާއި، އެމައުލޫމާތު ލިބުމާއެކު މުލިއާގޭގެ ސެކިއުރިޓީ ވަރުގަދަ ކޮށްފައިވާ ކަމަށެވެ. އަދި އެސަރަހައްދު މޮނިޓަރ ކުރުމުގައި އަބަދުވެސް ސިފައިން ހަރަކާތްތެރިވަމުންދާނެއެވެ.

ނަމަވެސް އިތުރު ތަފްސީލެއް ހާމަކޮށްފައިނުވެއެވެ. އަދި މިކަމާއި ގުޅޭ ގޮތުން އެމްއެންޑީއެފްގެ ބަހެއް ވެސް ވަނީ ލިބޭ ގޮތް ނުވެފައެވެ.

މުލިއާގޭގެ ގޭޓް ގޮއްވާލާނެކަމުގެ އިންޒާރު ދީފައިވާއިރު، މީސްމީޑިއާގައި މަޖިލިސް ކުރާގެ ގޮއްވާލާނެ ކަމަށް ބުނި ޒުވާނަކު ވެސް ވަނީ ހައްޔަރުކޮށްފައެވެ. ފުލުހުން ބުނީ، މި މައްސަލައާ ގުޅިގެން ހައްޔަރު ކޮށްފައިވަނީ އުމުރުން 28 އަހަރުގެ ދިވެހި ފިރިހެނެއް ކަމަށެވެ. އެނާއަކީ މީސްމީޑިއާ މެދުވެރިކޮށް މަޖިލިސް ކުރާގެ ގޮއްވާލާނެ ކަމުގެ އިންޒާރު ދިން މީހެއް ކަމަށް ފުލުހުން މައުލޫމާތުދެއެވެ. އަދި އެފަދަ ޓެރަރިޒަމާ ގުޅޭ މައްސަލަތައް ފުލުހުން ބަލަމުންދާނީ ވަރަށް ސީރިއަސް މައްސަލަތަކެއް ގޮތުގައި ކަމަށާއި، ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރާނެ ކަމަށެވެ.

މެއި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ޓެރަރިސްޓް ހަމަލާއެއް ވަނީ ދީފައެވެ. އަވަހާރަކޮށްލަން ދިން މި ހަމަލާގައި އެމަނިކުފާނުގެ ސަލާމަތްވީ ކިރިޔާ ކަމަށް އޭޑީކޭއިން އެމަނިކުފާނު ބެއްލެވި ޑޮކްޓަރުންގެ ޓީމުން ވިދާޅުވެފައިވެއެވެ. މިހަމަލާގައި ރައީސް ނަޝީދަށް ސީރިއަސް އަނިޔާތަކެއް ލިބިވަޑައިގެން މިހާރު ޖަރުމަނުވިލާތުގައި އިތުރު ފަރުވާ ހޯއްދަވަމުން ގެންދަވާއިރު އެމަނިކުފާނުގެ ތިން ބޮޑީގާޑުންނަށް ވެސް އެކިވަރުގެ އަނިޔާ ވަނީ ލިބިވަޑައިގެންފައެވެ.