ޖުލައިން ފެށިގެން ޤަތަރު އެއަރވޭސްއިން ރާއްޖެއަށް ދުވާލަކު 4 ދަތުރު
އެ އެއަރވޭސްއިން މިހާރު ރާއްޖެއަށް ކުރަނީ ދުވާލަކު 3 ދަތުރު
ޤަތަރު އެއަރވޭސް
މިހާރު ރާއްޖެއަށް ދުވާލަކު 3 ދަތުރު ކުރި ކަމުގައި ވީނަމަވެސް، ޖުލައިމަހުން ފެށިގެން ރާއްޖެއަށް ދުވާލަކު 4 ދަތުރުކުރުމަށް ޤަތަރު އެއަރވޭސްއިން ނިންމައިފިއެވެ.
މި އެއަރވޭސްއިން މިގޮތަށް ނިންމާފައިވަނީ މިއަހަރުގެ ހޫނު މޫސުމާ ދިމާކޮށް ރާއްޖެއަށް އަންނަ ފަތުރުވެރިންގެ އަދަދު އިތުރުވާނެ ކަމަށް ލަފާކޮށްފައެވެ.
ކޮވިޑް-19އާ ގުޅިގެން ރާއްޖޭގެ ބޯޑަރު ބަންދުކޮށްފައި އޮތުމަށްފަހު، މިދިޔަ އަހަރުތެރޭގައި އަލުން ބޯޑަރު ހުޅުވާލުމާއި، އެކު ވޭލާނާ އިންޓަރނޭޝަނަލް އެއަރޕޯޓަށް އެންމެ ފުރަތަމަ ޖައްސާފައިވަނީ ޤަތަރު އެއަރވޭސްގެ ފްލައިޓެކެވެ.
އޭގެފަހުން މިމަހުގެ 26 ވަނަ ދުވަހުގެ ނިޔަލަށް އެ އެއަރވޭސްއިން ވަނީ ރާއްޖެއަށް 784 ދަތުރުކޮށްފައެވެ. މި ދަތުރުތަކުގައި ރާއްޖެއަށް 67634 ފަސިންޖަރުން އުފުލާފައެވެ ގެނެސްފައެވެ.
ޤަތަރު އެއަރވޭސް ވެފައިވަނީ ރާއްޖެއަށް ދެވަނައަށް އެންމެ ގިނަ އަދަދަކަށް ދަތުރުތައް ބާއްވާ ކުރާ އެއަރލައިންކަމުގައެވެ.
ޤަތަރު އެއަރވޭސްގެ ފްލައިޓްތަކުގެ ސަބަބުން ރާއްޖެއާއި ޔޫރަޕްގެ ޤައުމުތަކާއިވެސް ގުޅާލަދެއެވެ. އެގޮތުން ޔޫރަަޕްގެ ގިނަ އަދަދެއްގެ ފަތުރުވެރިން ރާއްޖެ އަންނަ އެއް އެއަރލައިން ކަމުގައި ޤަތަރު އެއަރވޭސް ހިމެނިފައި ވެއެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ރާއްޖެއަށް މިހާރު 30 އެއަރލައިންއަކުން ދަނީ ދަތުރުތައް ބާއްވަމުންނެވެ. މީގެތެރޭގައި ހިމެނެނީ ޝެޑިއުލް ދަތުރުތައް ކުރާ 23 އެއަރލައިންއަކާއި، ޗާޓަރު ދަަތުރުތައް ކުރާ 7 އެއަރލައިންއެކެވެ.
