ހއ. އިހަވަންދޫ ބަނދަރު ތަރައްގީކުރުމުގެ މަޝްރޫއުގެ މަސައްކަތުގެ 50 އިންސައްތަ ނިމިފައިވާ ކަމަށް އެމްޓީސީސީ އިން ބުނެފިއެވެ.
އެމްޓީސީސީން ބުނީ މަސައްކަތުގެ 50 އިންސައްތަ ނިމިފައިވާ އިރު، އެއްގަމުތޮށި ލުމަށް ބޭނުންވާ ކޮންކްރީޓް ގައު އެތުރުމުގެ މަސައްކަތް ފަށާފައިވާ ކަމަށެވެ. މި މަޝްރޫއުގެ ދަށުން، 30،509 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 95 މީޓަރުގެ ސަރަހައްދެއްގައި އެއްގަމު ތޮށި ލުމާއި، 284 މީޓަރުގެ ސަރަހައްދެއްގައި ބޭރު ތޮށިލުމާއި، 178 މީޓަރުގެ ސަރަހައްދެއްގައި ރިވެޓްމަންޓް ޖެހުން ހިމެނެއެވެ.
އަދި މަގުބައްތިއާއި ނެރު ބައްތި ހަރުކުރުމާއި، 4،582 އަކަ މީޓަރު ސަރަހައްދެއްގައި ޕޭވްމަންޓް ހެދުން ހިމެނޭ ކަމަށްވެސް އެމްޓީސީސީން މަޢުލޫމާތުދެއެވެ. މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫއުއަކީ 48.5 މިލިއަން ރުފިޔާގެ މަޝްރޫއެކެވެ. މި މަސައްކަތުގެ އެއްބަސްވުމުގައި ސޮއި ކުރީ 2019 ވަނަ އަހަރުގެ އޮގަސްޓު މަހުގެ 26 ވަނަ ދުވަހުއެވެ.
ރާއްޖެ އެމްވީއާ ވާހަކަދައްކަވަމުން ހއ. އިހަވަންދޫ ކައުންސިލްގެ ރައީސް މުހައްމަދު ރަޝީދު ވަނީ ބަނދަރު ތަރައްގީކުރުމުގެ މަޝްރޫއު އާއެކު ރައްޔިތުން އެދޭފަދަ ބަދަލުތަކެއް ފެންނާނެ ކަމުގެ އުއްމީދު އާވެއްޖެ ކަމަށް ވިދާޅުވެފައެވެ. ރަޝީދު ވިދާޅުވީ އިހަވަންދޫ އަކީ މަސްވެރިކަން ކުރާ ރަށެއްގެ އިތުރުން ވިޔަފާރި ބޭނުމަށް ގިނަ އުޅަނދު ގެންގުޅޭ ރަށެއް ކަމަށެވެ. އަދި މާލެ ދަތުރު ކުރުމަށްވެސް ގިނަ ބޯޓު ފަހަރު އެރަށުގައި އޮންނަ ކަމަށާއި ބަނދަރު ތަރައްގީކުރުމުގެ މަޝްރޫއު ފެށުމުގެ ކުރިން ފަޅުގައި ޖާގައިގެ ދަތިކަން އިންތިހާއަށް އޮންނަ ކަމަށާއި މިކަމަށް ހައްލު ލިބިގެންދާނެ ކަމަށް ވެސް ކައުންސިލުގެ ރައީސް ވިދާޅުވިއެވެ. 19 ވަރަކަށް މަސް ދޯނި އޮންނަ އިރު މި ދޯނިތައް ފަޅުގައި އެޅޭނެ ގޮތެއް ނޯންނަ ކަމަށާއި މޫސުން ގޯސް ވާ ދުވަސްދުވަހު މޫދުގެ ބާނިތަކުގެ ސަބަބުން ވެސް އެކިއެކި ގޮންޖެހުންތަކާ ކުރިމަތި ވާކަމަށް އޭނާ ވިދާޅުވި އެވެ.
މީގެ އިތުރުންވެސް ފަޅުގެ ބައެއް ހިސާބުތައް ތިލަ ވުމާއެކު އެކި ހިސާބުތަކަށް ވެލި އެރުމުގެ މައްސަލަ ވެސް ދިމާވާކަމަށް ވެސް ރަޝީދު ފާހަގަކުރެއްވިއެވެ. އަދި މިއީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ގެ ރިޔާސީ ވައުދުޅެއްކަމަށް ވެސް އޭނާ ވިދާޅުވިއެވެ. މި މަޝްރޫއު އާއެކު ރައްޔިތުންގެ އުއްމީދުތައް އައު ވެފައިވާ ކަމަށާއި ރައްޔިތުން އެދޭ ބަދަލު މި މަޝްރޫއު ނިމޭއިރު ފެންނާނެ ކަމަށް ބެލެވޭ ކަމަށްވެސް މުހައްމަދު ރަޝީދު ވިދާޅުވިއެވެ. އެގޮތުން މި މަޝްރޫއު އާ ބެހޭ ބައްދަލުވުންތަކުގައި ރައްޔިތުންގެ ހިޔާލު ހޯދާފައިވާ ކަމަށާއި މި މަޝްރޫއު ނިމޭއިރު ބަނދަރު ހެދިފައި އޮންނާނީ ރައްޔިތުން އެންމެ ބޭނުންވާ ގޮތަށްކަމަށް ވެސް އޭނާ ވަނީ ވިދާޅުވެފައެވެ.
