ސްކޫލްތަކަށް ފޮތްބައި ފޮނުވުމުގެ މަސައްކަތް ކުރިއަށްދާގޮތް މިނިސްޓަރު ބައްލަވާ ލައްވައިފި
30 މެއި 2021 | އާދީއްތަ 18:04އަލަށް ސްކޫލަށް ވައްދަން ބޭނުންވާ ދަރިވަރުންގެ އެޑްމިޝަންގެ މަސައްކަތްތައް މިހާރު ވަނީ ފެށިފައި
ރަށްރަށުގެ ސްކޫލްތަކަށް ފޮތްބައި ފޮނުވުމުގެ މަސައްކަތް ކުރިއަށް ދާގޮތް މިނިސްޓަރު ބައްލަވާލެއްވުން
ކުރިއަށް އޮތް ދިރާސީ އަހަރު ދަރިވަރުންނަށް ބޭނުންވާނެ ފޮތްތައް ރަށްރަށުގެ ސްކޫލްތަކަށް ފޮނުވުމުގެ މަސައްކަތް ކުރިއަށް ދާގޮތް، މިނިސްޓަރ އޮފް އެޑިއުކޭޝަން ޑރ.އާއިޝަތު އަލީ ބައްލަވާލައްވައިފިއެވެ.
މިހިނގާ ދިރާސީ އަހަރުގެ ކިޔެވުން ނިމޭނީ ޖޫން މަހުގެ 24 ވަނަ ދުވަހުއެވެ. އެ ދުވަހުގެ ނިޔަލަށް، އައު އަހަރުގެ ކިޔެވުމަށް ބޭނުންވާނޭ ފޮތްތައް ފޯރުކޮށްދިނުމަށް މިނިސްޓްރީން ގެންދަނީ މަސައްކަތް ކުރަމުންނެވެ. އަމާޒަކީ މިހިނގާ ދިރާސީ އަހަރުގެ ކިޔެވުން ނިމި ސްކޫލްތައް ބަންދުވުމުގެ ކުރިން، ހުރިހާ ދަރިވަރުންނަށް ފޮތްތައް ހަވާލުކޮށް ކަމަށް އެޑިއުކޭޝަން މިނިސްޓްރީން ބުނެއެވެ.
އައު ދިރާސީ އަހަރު ފެށެން ވާއިރަށް އެޑިއުކޭޝަން މިނިސްޓްރީން ގެންދަނީ ގިނަ ތައްޔާރީތަކެއް ވަމުންނެވެ. އެގޮތުން އަލަށް ސްކޫލަށް ވައްދަން ބޭނުންވާ ދަރިވަރުންގެ އެޑްމިޝަންގެ މަސައްކަތްތައް ފެށިފައިވާއިރު, މިހާރު ފޯމުލާފައިވާ ބެލެނިވެރިންނަށް ޖޫން މަހުގެ 6ވަނަ ދުވަހުގެ ކުރިން ޖާގަ ހަމަޖައްސައިދިނުމަށް މިނިސްޓްރީން ވަނީ ފަށާފައެވެ.
2021ވަނަ ދިރާސީ އަހަރުގެ ކިޔެވުން ފެށުމަށް ހަމަޖެހިފައި ވަނީ އޯގަސްޓް މަހުގެ 10ވަނަ ދުވަހުއެވެ. އެ އަހަރުގެ ކިޔެވުން ނިމޭނީ 2022ވަނަ އަހަރުގެ ޖޫން 30 ގައެވެ.
