ޔޫރޯ ނިމޭތަނުން އެހެން ޓީމަކާ ހަވާލެއް ނުވާނަން: ލޯ

ކުރިއަށް އޮތް ޔޫރޯ ފުޓްބޯޅަ މުބާރާތް ނިމޭތަނުން އެހެން ޓީމަކާ ހަވާލުނުވާނެ ކަމަށް ޖަރުމަނުގެ ގައުމީ ފުޓްބޯޅަ ޓީމުގެ ކޯޗުކަން ދޫކޮށްލަން ނިންމާފައިވާ ޔޮއަހިމް ލޯ ބުނެފިއެވެ.

މިދިޔަ މާޗު މަހުގެ ތެރޭގައި އުމުރުން 61 އަހަރުގެ ލޯ ވަނީ ޔޫރޯއަށްފަހު ޖަރުމަން ޓީމު ދޫކޮށްލަން ނިންމާފައިވާކަން އިއުލާން ކޮށްފައެވެ. އެއާއެކު ދާދި ފަހުން ޖަރުމަން ޓީމުން ވަނީ ޔޫރޯއަށް ފަހު އެ ޓީމުގެ ކޯޗުގެ މަގާމަށް ހަންސީ ފްލިކް ހަމަޖައްސާފައެވެ.

ރިޕޯޓުތައް ބުނާ ގޮތުން ލޯ ހޯދުމަށް ސްޕެއިންގެ ގަދަ ދެ ބާރު ކަމަށްވާ ބާސެލޯނާ އާއި ރެއާލް މެޑްރިޑުން އަންނަނީ މަސައްކަތް ކުރަމުންނެވެ. އެކަމަކު ދާދި ފަހުން ދިން އިންޓަވިއުއެއްގައި ލޯ ބުނީ ޔޫރޯ ނިމޭތަނުން އެހެން ޓީމަކާ ހަވާލުވާން ބޭނުން ނުވާ ކަމަށާއި، އޭގެ ބަދަލުގައި ޔޫރޯއަށްފަހު މަދުވެގެން ހަ މަހުގެ ބްރޭކެއް ނަގަން ބޭނުންވާ ކަމަށެވެ. އެހެންކަމުން އޭގެ ކުރިން އެއްވެސް ޓީމަކާ ހަވާލުނުވާން ނިންމާފައިވާ ކަމަށް ލޯ ވަނީ ބުނެފައެވެ.

ޔޫރޯއަށްފަހު ލޯ ޖަރުމަން ޓީމު ދޫކޮށްލާއިރު، އޭނާއާއެކު ޖަރުމަނުން ވަނީ ބޮޑެތި ކާމިޔާބީތަކެއް ހޯދާފައެވެ. އެންމެ ފުރަތަމަ 2004 ވަނަ އަހަރުން ފެށިގެން 2006 ވަނަ އަހަރުގެ ފީފާ ވޯލްޑް ކަޕުގެ ނިޔަލަށް ޖަރުމަނު ގައުމީ ޓީމުގެ އެސިސްޓަންޓް ކޯޗެއްގެ ގޮތުގައި މަސައްކަތްކުރި ލޯ، އެ ޓީމުގެ ކޮޗުގެ މަގާމާ ހަވާލުވެފައިވަނީ 2006 ވަނަ އަހަރު އެ ޓީމުގެ ކޯޗު ޔާގެން ކްލިންސްމަން މަގާމުން ވަކިވުމާ ގުޅިގެންނެވެ.

އެއަށްފަހު މިހާތަނަށް ޖަރުމަން ޓީމާއެކު ލޯ 14 އަހަރު ހޭދަކޮށްފައިވާއިރު، އޭނާގެ އެންމެ ބޮޑު ކާމިޔާބީއަކީ 2014 ވަނަ އަހަރުގެ ވޯލްޑް ކަޕް ޖަރުމަނަށް ކާމިޔާބުކޮށްދިނުމެވެ. އަދި ލޯއާއެކު ޖަރުމަނުން ވަނީ 2017 ވަނަ އަހަރުގެ ފީފާ ކޮންފެޑެރޭޝަންސް ކަޕުވެސް ކާމިޔާބުކޮށްފައެވެ.

ލޯއާއެކު ޔޫރޯއަށް ޖަރުމަން ޓީމު ނުކުންނައިރު، މި ފަހަރުގެ ޔޫރޯގައި އެ ގައުމު ހިމެނެނީ ގްރޫޕް އެފްގައެވެ. މި ގްރޫޕުގައި ދެން ހިމެނެނީ ހަންގޭރީ، ޕޯޗުގަލް އަދި ފްރާންސެވެ.