ޗެލްސީއަށް ޔުއެފާ ޗެމްޕިއަންސް ލީގު ކާމިޔާބުކޮށްދިނުމަށްފަހު، އެ ޓީމުގެ އެއްބަސްވުން އާކުރަން ތޯމަސް ޓުޗެލް ނިންމާފައިވާ ކަމަށް އިނގިރޭސި މީޑިއާ ރިޕޯޓުތައް ބުނެފިއެވެ.

ޗެލްސީގެ ކޯޗަކަށް ޓުޗެލް ހަމަޖެއްސީ މި އަހަރުގެ ޖެނުއަރީ މަހު، އެ ޓީމުގެ ކޯޗުގެ މަގާމުން ފްރޭންކް ލަމްޕާޑް ވަކިކުރުމަށްފަހުއެވެ. އެ ފަހަރު ޓުޗެލް ވަނީ ޗެލްސީއާއެކު އެއް އަހަރާ ބައިގެ އެއްބަސްވުމެއް ހަދާފައެވެ.

ޓުޗެލް ވަނީ ޗެލްސީގެ ކޯޗުގެ މަގާމާ ހަވާލުވިތާ 124 ދުވަހުގެ ތެރޭގައި އެ ޓީމަށް ޗެމްޕިއަންސް ލީގުގެ ޗެމްޕިއަންކަން ހޯދައިދީފައެވެ. މިއީ ޗެލްސީއާއެކު ޓުޗެލްގެ ފުރަތަމަ ކާމިޔާބީއެވެ. އަދި މިއީ ޓުޗެލްގެ ކޯޗިން ކެރިއަރުގައިވެސް ކާމިޔާބުކުރި ފުރަތަމަ ޗެމްޕިއަންސް ލީގެވެ. އެކަމަކު ޓުޗެލުގެ އިރުޝާދުގެ ދަށުން މި ސީޒަނުގެ އެފްއޭ ކަޕުގައި ޗެލްސީ ކުޅުނު ނަމަވެސް، ފައިނަލުގައި ލެސްޓާ ސިޓީ އަތުން ޗެލްސީ ވަނީ 1-0 ގެ ނަތީޖާއަކުން ބަލިވެފައެވެ.

ޓުޗެލް އަކީ ޗެލްސީގެ ވެރިޔާ ރޯމަން އަބްރަމޮވިޗް، 2003 ވަނަ އަހަރު އެ ކުލަބު ގަތް ފަހުން، އެ ޓީމާ ހަވާލުވި 11 ވަނަ ކޯޗެވެ. އަދި ސީޒަނެއްގެ މެދުތެރެއިން އެ ޓީމާ ހަވާލުވި ފަސްވަނަ ކޯޗެވެ. ހޮނިހިރު ދުވަހުގެރޭ ކުޅުނު ފައިނަލް މެޗަށް ފަހު ޗެލްސީގެ ކޯޗު ޓުޗެލް އާއި އަބްރަމޮވިޗް ވަނީ ދަނޑުމަތީގައި ބައްދަލުކޮށްފައެވެ. މިއީ ޓުޗެލް ޗެލްސީއާ ހަވާލުވި ފަހުން އަބްރަމޮވިޗާ ބައްދަލުވި ފުރަތަމަ ފަހަރެވެ.

ރިޕޯޓުތައް ބުނާ ގޮތުން ޓުޗެލްގެ މަސައްކަތާ މެދު އަބްރަމޮވިޗް ހިތްހަމަޖެހޭ ކަމަށާއި، އެހެންކަމުން އަވަސް މުސްތަގުބަލެއްގައި އެއްބަސްވުން އާކުރުމާ ގުޅޭ ގޮތުން ޓުޗެލް އާއި ޗެލްސީގެ ބޯޑު ބައްދަލުކުރަން މިހާރު ވަނީ ނިންމާފައެވެ. އަދި އައު އެއްބަސްވުމާއެކު 2023 ގެ ނިޔަލަށް ޓުޗެލް ޗެލްސީގައި މަޑުކުރާނެ ކަމަށްވެސް އިނގިރޭސި މީޑިއާތަކުން ވަނީ ރިޕޯޓުކޮށްފައެވެ.

މި ފަހަރުގެ ޗެމްޕިއަންސް ލީގު ޓުޗެލް ކާމިޔާބުކުރިއިރު، އޭނާއަކީ އެއް އަހަރު ފައިނަލުން ބަލިވެ، ޖެހިގެން އައި ސީޒަނުގައި ޗެމްޕިއަންސް ލީގުގެ ތަށި ހޯދި ޖަރުމަނުގެ ތިންވަނަ ކޯޗެވެ. ޓުޗެލް މިދިޔަ ސީޒަނުގައި މުޅިން އަލަށް ޕީއެސްޖީއަށް ޗެމްޕިއަންސް ލީގުގެ ފައިނަލުން ފުރުސަތު ހޯދައިދިން ނަމަވެސް، އެ ފަހަރުގެ ފައިނަލުން ޕީއެސްޖީ ވަނީ ބަޔާން މިއުނިކް އަތުން 1-0 ގެ ނަތީޖާއަކުން ބަލިވެފައެވެ.