އިސްރާއީލާއި ގުޅުމެއް ބާއްވާނަމަ ޖަލަށްލުމާއި ޖޫރިމަނާކުރުމުގެ ހަރުކަށި ފިޔަވަޅުތަކެއް އަޅަން ކުވޭތުގެ ގާނުނުހަދާ މަޖިލީހުން ނިންމައިފިއެވެ.
ހުކުރު ދުވަހު ކުވޭތުގެ މަޖިލީހުން މި ބިލް ފާސްކޮށްފައިވާއިރު، މި ބިލްގެ ޑްރާފްޓް މަޖިލީހަށް ހުށައަޅާފައި ވަނީ ފަސް މެމްބަރުންނެވެ. އެއީ މެމްބަރު އަދުނާން އަބދުލްސަމަދު، ހިޝާމް އަލް ސާލިހް، އަލީ އަލް ގައްތާން، އަހްމަދު އަލް ހަމާދު އަދި ޚަލީލް އަލް ސާލިހެވެ. މި މެމްބަރުން ވަނީ އިސްރާއީލާއެކު އެއްވެސް ކަހަލަ ގުޅުމެއް ބޭއްވުން މަނާކުރުމަށް ހުށައަޅާފައެވެ.
މިބިލްގައި ވަނީ އިސްރާއީލާއެކު ސީދާ އަދި ނުސީދާކޮށްވެސް ކުވޭތުގެ ރައްޔިތުން އަދި އެގައުމުގައި ދިރިއުޅޭ އެހެން ގައުމުތަކުގެ ރައްޔިތުންނަށް ގުޅުން ނުބޭއްވޭނެ ކަމަށް ހިމަނަފާއެވެ. އިސްރާއީލަށް ހަމްދަރުދީވުންވެސް މި ބިލްގައި ވަނީ މަނާކޮށްފައެވެ.
ފާއިތުވި ހަފުތާގައި ކުވޭތުގެ އެތައް ސަތޭކަ ރައްޔިތުންނެއް ވަނީ އިސްރާއީލުން ގާޒާގައި ހިންގާ އަމަލުތައް ކުށްވެރިކޮށް އެއްވުމެއް ބާއްވާފައެވެ. މި އެއްވުމުގައި ފަލަސްތީނު މިނިވަންކުރުމަށް ގޮވާލައި އިސްރާއީލުގެ ދިދަވެސް ވަނީ އަންދާލާފައެވެ. ކުވެއިތުގެ އިދާރާތަކުން ވަނީ ކޮވިޑްގެ ސަބަބުން އަޅާފައިވާ ފިޔަވަޅުތަކާއެކުވެސް މި އެއްވުން ހުއްޓުވާނުލައި ކުރިއަށް ގެންދިއުމުގެ ފުރުސަތު ދީފައެވެ.
