ހައިރިސްކް ބޭފުޅަކަށްވާތީ ޔާމީނުގެ ޝަރީއަތް ކެންސަލް
އާރަށުގެ އަގުގެ ގޮތުގައި ލިބުނު ޑޮލަރު އަމިއްލަފުޅު އެކައުންޓަށް ޖަމާކޮށްފައިވާކަމުގެ ތުހުމަތު ކުރެވޭ
ކުރީގެ ރައީސް އަބްދުﷲ ޔާމީން- ޔާމީން މިހާރުވެސް ގެންދަވަނީ އެމްއެމްޕީއާރްސީ މައްސަލައިގައި ޙުކުމް ތަންފީޒު ކުރައްވަމުން
އެމްއެމްޕީއާރުސީގެ ޚިޔާނާތުގައި ހިމެނޭ، ރިސޯޓެއްގެ ގޮތުގައި ތަރައްޤީކުރުމަށް ކުއްޔަށް ދޫކުރި ރ. ފުއްގިރި މައްސަލައިގައި، ކުރީގެ ރައީސް އަބްދުﷲ ޔާމީންގެ މައްޗަށް ކޮށްފައިވާ ދެ ދަޢުވާއާ ގުޅިގެން އާދިއްތަ ދުވަހު ކްރިމިނަލް ކޯޓުގައި ތާވަލުކުރި އަޑުއެހުން ކެންސަލްކޮށްފިއެވެ.
މި މައްސަލައަކީ މަޤާމުގެ ނުފޫޒު ބޭނުން ކުރައްވައިގެން އެމްއެމްޕީއާރްސީ މެދުވެރިކޮށް ރ. ފުއްގިރި ވިއްކައިގެން ލިބުނު 1.1 މިލިއަން ޑޮލަރު އެމަނިކުފާނުގެ އެކައުންޓަކަށް ޖަމާކުރައްވާފައިވާ މައްސަލައެވެ. މި މައްސަލައިގައި ރައީސް ޔާމީންގެ މައްޗަށް ދައުވާ އުފުލާފައި ވަނީ ޖޫން، 2020 ގައެވެ.
މި މައްސަލައިގެ އަޑުއެހުން ކެންސަލް ކުރުމަށް އެދި ޔާމީނުގެ ޤާނޫނީ ވަކީލުންގެ ޓީމުން ވަނީ ކްރިމިނަލް ކޯޓުގައި އެދިފައެވެ. ކޯޓުން އަޑުއެހުން ކެންސަލް ކޮށްދިނުމަށް އެދިފައިވަނީ 2021 ވަނަ އަހަރުގެ ސުޕްރީމް ކޯޓުގެ 3 ވަނަ ޕްރެކްޓިސް ޑައިރެކްޝަން ގެ 5 ވަނަ ނަމްބަރަށް ރިއާޔަތްކޮށެވެ. އެ މާއްދާގައިވާ ގޮތުން އުމުރުން 55 އަހަރުން މަތި އަދި ހައިރިސްކް މީހެއްނަމަ ކޯޓަށް ހާޒިރުވާން އިއުތިރާޒް ކުރާނަމަ އެއީ މަޤްބޫލު ސަބަބެކެވެ. އެ ސަބަބަށް ރިއާޔަތްކޮށް ކޯޓުން ވަނީ އަޑުއެހުން ކެންސަލް ކޮށްދީފައެވެ.
ރައީސް ޔާމީންގެ ވެރިކަމުގައި އެމްއެމްޕިއާރްސީ މެދުވެރިކޮށް ހިންގި ބޮޑު ޚިޔާނާތުގެ މައްސަލާގައި އެމަނިކުފާނުގެ މައްޗަށް ފަސް އަހަރުގެ ޖަލު ހުކުމެއް އިއްވައި ފަސް މިލިއަން ޑޮލަރުން އެމަނިކުފާނު ވަނީ ޖޫރިމާނާ ވެސް ކޮށްފައެވެ. މިހާރު އެ މައްސަލައިގެ ޖަލު ޙުކުމް ތަންފީޒު ކުރައްވަމުން ގެންދަވާއިރު، ރިސޯޓެއްގެ ގޮތުގައި ތަރައްގީކުރުމަށް ވ. އާރަށް ބޭރުގެ ބަޔަކަށް ވިއްކައިގެން ލިބުނު ފައިސާ ރައީސް ޔާމީންގެ އަމިއްލަފުޅު އެކައުންޓަށް ޖަމާކޮށްފައިވާ ކަމަށް ބުނާ މައްސަލައެއްގައި ވެސް ދައުވާ ކޮށްދިނުމަށް އެދި ޕީޖީ އޮފީހަށް ވަނީ ފޮނުވާފައެވެ.
އާރަށުގެ އަގުގެ ގޮތުގައި ލިބުނު އެއް މިލިއަން ޑޮލަރު އަމިއްލަފުޅު އެކައުންޓަށް ޖަމާކޮށްފައިވާ ކަަމަށް ތަހުގީގު ރިޕޯޓުގައިވެއެވެ. ރައީސް ޔާމީންގެ މައްޗަށް މިފަހަރު ކުރަނީ ރިޝްވަތު ނެގުމާއި ކަޅުފައިސާ ދޮވުމުގެ ތުހުމަތެވެ.
ވ. ތިނަދޫ ކައިރީގައި އޮތް އާރަށަކީ ޕިކްނިކް ދާ ކުޑަރަށެކެވެ. އެ ރަށަކީ، ޑީއާރްޕީގެ ކުރީގެ ލީޑަރު، އަހްމަދު ތަސްމީނު އަލީގެ ހިއްސާ އޮންނަ ކުންފުންޏަކަށް ކުރިން ދީފައި އޮތް ރަށެކެވެ. ތަސްމީންގެ އަތުން އޮގަސްޓް 2015ގައި އެރަށް އަތުލައި، ހަމަ އެ އަހަރުގެ ސެޕްޓެމްބަރު މަހު އެރަށް ހަވާލުކޮށްފައިވަނީ ވ. ފެލިދޫ ދާއިރާގެ ކުރީގެ މެމްބަރު ޔޫސުފް ނައީމާއެވެ.
ރައީސް ޔާމީނާ ގާތް ގުޅުމެއް އޮންނަ ޔޫސުފް ނައީމަށް އެރަށް ހަވާލުކުރިތާ އެއްމަސްތެރޭގައި ބޭރުގެ ކުންފުންޏަކަށް ރަށް ވިއްކާލުމަށްފަހު ލިބުނު އެއް މިލިއަން ޑޮލަރު އެޗްއެސްބީސީގައި އޮންނަ ރައީސް ޔާމީންގެ އަމިއްލަފުޅު އެކައުންޓަކަށް ޖަމާކޮށްފައިވާކަމަށް ވެއެވެ.
