ގަވާއިދާ ޚިލާފަށް ތެޔޮ އުފުލާ ކަމުގެ ތުހުމަތުގައި އިންޑޮނީޝިއާއިން ހިފަހައްޓާފައި އޮތް އީރާންގެ ތެޔޮ ޓޭންކަރު ހަތަރު މަހަށް ފަހު ދޫކޮށްލައިފިއެވެ.

"އެމްޓީ ހޯސް"ގެ ނަންދެވިފައިވާ އީރާނުގެ ތެޔޮ ޓޭންކަރު އިންޑޮނީޝިއާއިން ހިފެހެއްޓީ މިއަހަރުގެ ޖެނުއަރީ މަހުގެ ފަހުކޮޅުގައެވެ. ނަމަވެސް ކޯޓު މަރުހަލާއަށްފަހު މިހާރު ތެޔޮޓޭންކަރު ދޫކޮށްލާފައިވާކަމަށް އީރާނުން ބުނެއެވެ.

ދަ ނޭޝަނަލް އީރާނިއަން ޓޭންކަރ ކޮމްޕެނީން ނެރުނު ބަޔާނެއްގައި ބުނެފައި ވަނީ, "އެމްޓީ ހޯސް"އާއި އޭގެ ފަޅުވެރިން ހުކުރު ދުވަހު ދޫކޮށްލާފައި ވާކަމަށެވެ. މިއީ 125 ދުވަސް ވަންދެން އެގައުމުގެ ފޮރިން މިނިސްޓްރީއާއި އޮފިޝަލުން ކުރި މަސައްކަތުގެ ނަތީޖާ ކަމަށާއި، ޓޭންކަރު އެނބުރި ގައުމަށް ދިއުމަށް މިހާރު ދަތުރުކުރަމުން ދާކަމަށެވެ.

އިންޑޮނީޝިއާގެ ކަނޑުގެ ސަރަހައްދުން އީރާން ތެޔޮޓޭންކަރާއެކު, ޕެނަމާގެ ތެޔޮޓޭންކަރެއް ވެސް ހިފަހައްޓާފައިވެއެވެ. ދެ ޓޭންކަރުވެސް ހިފަހައްޓާފައި ވަނީ ގަވާއިދާ ޚިލާފަށް ކަނޑުމަތީގައި ތެޔޮ އުފުލާ ކަމުގެ ތުހުމަތުގައެވެ.

އީރާނުގެ ފޮރިން މިނިސްޓްރީން އޭރު އެކަމާ ގުޅޭގޮތުން ބުނެފައިވަނީ, އެއީ ޓެކްނިކަލް މައްސަލައެއް ކަމަށާއި، އަދި އެފަދަ ކަންކަމަކީ ދަތުރުފަތުރު ކުރުމުގައި އާންމު ކަންކަން ކަމަށެވެ.

އީރާންގެ ތެޔޮޓޭންކަރު ހިފަހައްޓާފައި ވަނިކޮށް, އެގައުމުގެ ފޮރިން މިނިސްޓަރު މުހައްމަދު ޖަވާދް ޒަރީފް އިންޑޮނީޝިއާއަށް ދަތުރުފުޅެއް ކުރެއްވިއެވެ. މި ދަތުރުފުޅުގައި, އިންޑޮނީޝިއާގެ ރައީސް އަދި އިސް އޮފިޝަލުންނާ ބައްދަލުކުރެވިއެވެ. އެކަމަކު މި ދަތުރުފުޅަށްފަހު އީރާނުގެ ފޮރިން މިނިސްޓަރު ނުވަތަ ފޮރިން މިނިސްޓްރީން ވެސް ތެޔޮޓޭންކަރާ ގުޅުންހުރި އެއްވެސް ވާހަކައެއް ބުނެފައެއް ނުވެއެވެ.

ދަތުރުފުޅަށް ފަހު އީރާންގެ ފޮރިން މިނިސްޓްރީން ބުނެފައިވަނީ, ބައްދަލުވުންތަކުގައި މަޝްވަރާކުރެވުނީ, އީރާނާއި އިންޑޮނީޝިއާއާއި ދެމެދު ގުޅުން ބަދަހި ކުރުމާއި, އީރާނާއި ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކާއި ދެކޮޅަށް މަސައްކަތް ކުރުމާއި ގުޅޭ ގޮތުން ކަމަށެވެ.

އީރާނާ ދެކޮޅަށް އެމެރިކާއިން އަޅާފައިވާ މައިގަނޑު ފިޔަވަޅުތައް އަމާޒުކޮށްފައިވަނީ އެގައުމުން ކުރާ ތެލުގެ ވިޔަފާރިއަށެވެ. އެހެންކަމުން އީރާނުން އެއްގައުމުން އަނެއްގައުމަށް ތެޔޮ އުފުލުމަށް ޓޭންކަރުތަކުގައި ހުންނަ ޓްރެކިން ސިސްޓަމް ނިވާލުން ފަދަ ތަފާތު އުކުޅުތަކުގެ ބޭނުން ކުރަމުންދެއެވެ.

އިންޑޮނީޝިއާއިން ހިފެހެއްޓި އީރާންގެ ތެޔޮ ޓޭންކަރު "އެމްޓީ ހޯސް" އިން މިދިޔަ އަހަރު ވެސް އެމެރިކާއަށް ވާގިވެރިވާ އެއްގައުމު ކަމަށްވާ ވެނެޒުއޭލާއަށް 2.1 މިލިއަން ތެޔޮ ފީފާ ގެންގޮސްދީފައިވެއެވެ.