މުޖުތަމައަށް ނުރައްކާތެރި ފަރާތްތައް ބަންދުގައި ބޭތިއްބުމުގެ ގާނޫނީ ހުރަސްތަކާއި ގުޅޭގޮތުން އޭޖީއާ ސުވާލުކުރަނީ
29 މެއި 2021 | ހޮނިހިރު 18:59ގާނޫނަށް ގެނައި އިސްލާހާއެކުވެސް އެފަދަ މީހުން ބަންދުގައި ބޭތިއްބޭނެ ގޮތެއް އަދި ފަހިވެފައެއް ނެތް- މިނިސްޓަރު
އެޓަރނީ ޖެނެރަލް އަލްއުސްތާޒު އިބްރާހީމް ރިފްއަތު
މުޖުތަމައުއަށް ނުރައްކާތެރި ފަރާތްތައް، ޓެރަރިޒަމް މަނާކުރުމުގެ ގާނޫނުގެ ދަށުން ބަންދުގައި ބޭތިއްބޭނެ ގޮތެއް އަދިވެސް ފަހިވެފައިވާނުވާ ކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެފައިވާތީ، އެކަމުގައި ހުރި ގާނޫނީ ހުރަސްތައް ސާފުކުރުމަށް އެޓަރނީ ޖެނެރަލް އަލްއުސްތާޒު އިބްރާހިމް ރިފްއަތާއި ސުވާލުކުރުމަށް ރައްޔިތުންގެ މަޖިލީހަށް ހުށަހަޅައިފިއެވެ.
އޭޖީ އާ ސުވާލުކުރުމަށް ހުށަހެޅުއްވީ އުނގޫފާރު ދާއިރާގެ މެމްބަރ މުހައްމަދު ވަހީދެވެ. މުހައްމަދު ވަހީދު އޭޖީ އާ ކުރުމަށް ހުށަހަޅާފައިވާ ސުވާލުގައި ބުނެފައިވަނީ، މުޖުތަމައަށް ނުރައްކާތެރި ފަރާތްތައް ބަންދުގައި ބައިތިއްބޭނެ ގޮތަކަށް ޓެރަރިޒަމް މަނާކުރުމުގެ ގާނޫނުގެ ތެރެއިން އަދިވެސް މަގުފަހިވެފައި ނުވާ ކަމަށާއި، އެފަރާތްތައް ބަންދުން ދޫކޮށްލައި ރިހިބިލިޓޭޝަން ޕްރޮގްރާމެއް ހިންގުމަށް ދައުލަތުގެ ބެލުމުގެ ދަށުގައި ބައިތިއްބުމަށް އަދިވެސް ގާނޫނުން ޖާގަނުދޭކަމަށް، 24 މެއި ގައި އޮތް ރައްޔިތުންގެ މަޖިލީހުގެ ޖަލްސާގައި ހޯމް މިނިސްޓަރ ވިދާޅުވެފައިވާކަމަށެވެ. އެހެންކަމުން އެފަރާތްތައް ބަންދުގައި ބޭތިއްބުމަށް ގާނޫނީގޮތުން ހުރި ހުރަސްތަކަކީ ކޮބައިތޯ އާއި އެކަން ފުރިހަމަކުރާނެ ގޮތަކީ ކޮބައިތޯ ވަނީ އައްސަވާފައެވެ. މީގެއިތުރުން މިހާ ހުރޫރަތްތެރި މައްސަލައަކަށް ގާނޫނީ ފަރުވާއެއް ނުލިބި ދިގުލައިގެން ދަނީ ކީއްވެތޯވެސް ވައްޑެގެ ސުވާލުގައިވެއެވެ.
24 މެއިގައި ބޭއްވި ރައްޔިތުންގެ މަޖިލީހުގެ ޖަލްސާގައި ވަޒީރުންނާ ސުވާލުކުރުމުގެ ދަށުން، ހުޅުދޫ ދާއިރާގެ މެމްބަރ އިލްޔާސް ލަބީބު ވަނީ ޓެރަރިޒަމް މަނާކުރުމުގެ ގާނޫނަށް 2019 ވަނަ އަހަރު މަޖިލީހުގައި ޗުއްޓީގައި އޮވެ ބޮޑެތި ބަދަލުތަކެއް ގެނެވިފައިވާކަން ފާހަގަކުރައްވާ ގާނޫނަށް އެގެނެވުނު ބަދަލުގެ ދަށުން މުޖުތަމައުއަށް ދޫވެފައިތިބި އެފަދަ މީހުންގެ ތެރެއިން ހައްޔަރުކުރެވުނީ ކިހާ އަދަދެއްގެ މީހުންކަމާއި އެމީހުން މިހާރު ތިބީ ހައްޔަރުކުރެވިފައިތޯ ހޯމް މިނިސްޓަރ އަރިހުން އައްސަވާފައެވެ.
އެސުވާލަށް ޖަވާބު ދެއްވަމުން ހޯމް މިނިސްޓަރ ވިދާޅުވީ ގާނޫނަށް ގެނައި އިސްލާހާއެކުވެސް އެފަރާތްތައް ބަންދުގައި ބޭތިއްބޭނެ ގޮތެއް އަދި ފަހިވެފައިނުވާކަމަށެވެ.
މީގެއިތުރުން މިޖަލްސާގައި މަޑަވެލި ދާއިރާގެ މެމްބަރ ހުސައިން ފިރުޝާން ވަނީ ހަރުކަށިފިކުރުގެ މީހުން (ވަކިން ޚާއްސަ ގޮތެއްގައި އައިއީޑީ ފަދަ ތަކެތި ހެދުމުގެ ގާބިލްކަން ލިބިފައިވާ މީހުން)، އަދި ފުލުހުންނަށް ފާހަގަކުރެވިފައިވާ މިފަދަ ފަރާތްތަކުގެ ތެރެއިން މުޖުތަމައުއަށް އެއްވެސް ފަރާތެއް ދޫވެފައި ތިބިތޯ އާއި އަދި އެފަދަ ފަރާތްތައް ހައްޔަރުނުކުރެވިގެން އުޅެނީ ކީއްވެތޯއެވެ.
އެސުވާލަށް ޖަވާބު ދެއްވަމުން މިނިސްޓަރ ވަނީ އައިއީޑީ ފަދަ ތަކެތި ހެދުމުގެ ގާބިލްކަން ހުރި ފަރާތްތައް މުޖުތަމައުއަށް ދޫވެފައި ތިބިކަމަށް ވިދާޅުވެފައެވެ. އަދި އެއީ ނުރައްކާތެރި ކަމެއްކަމަށާއި އެފަދަ މީހުން ހައްޔަރުކޮށްފައި ނުވަތަ ރިހިބިލިޓޭޓްކުރެވޭނެ ގޮތެއް ގާނޫނުގެ ތެރެއިން ފަހިވެފައި އޮންނަންޖެހޭ ކަމަށެވެ. އަދި ގާނޫނަށް އިސްލާހު ގެނައުމުގެ ކަންކަމުގައި އޭޖީއާވެސް ވާހަކަދައްކަމުން އަންނަ ކަމަށެވެ.
މުޖުތަމައަށް ނުރައްކާތެރި މީހުން ތިބުމާއެކު އެމީހުން ފަސޭހައިން ހައްޔަރުކޮށް ތަހުގީގު ކުރިޔަށް ގެންދިޔުމުގެ ބާރު ފުލުހުންނަށް ދިނުމަށް ޓެރަރިޒަމް މަނާކުރުމުގެ ގާނޫނަށް ވަނީ ބޮޑެތި ބަދަލުތަކެއް މީގެކުރިން ގެނެސްފައެވެ. ނަމަވެސް ކަމާބެހޭ ފަރާތްތަކުން ބުނަމުން އަންނަނީ އެއިސްލާހުތަކާއެކު ވެސް އެފަދަ މީހުން ހައްޔަރުކޮށްގެން ގެންގުޅުމުގެ ބާރެއް ލިބިފައިނުވާކަމަށެވެ.
