ފްރާންސާއެކު ކާމިޔާބީއެއް ހޯދަން ބޭނުން: ބެންޒެމާ

ފްރާންސްގެ ގައުމީ ފުޓްބޯޅަ ޓީމާއެކު ކާމިޔާބީއެއް ހޯދަން ބޭނުންވާ ކަމަށް ރެއާލް މެޑްރިޑަށް ކުޅެމުން އަންނަ ތަޖުރިބާކާރު ފޯވާޑް ކަރީމް ބެންޒެމާ ބުނެފިއެވެ.

ދާދި ފަހުން ފްރާންސްއިން ވަނީ ކުރިއަށް އޮތް ޔޫރޯ ފުޓްބޯޅަ މުބާރާތަށް އެކުލަވާލި ސްކޮޑުގައި އުމުރުން 33 އަހަރުގެ ބެންޒެމާ ހިމަނާފައެވެ. މިއީ 2015 ވަނަ އަހަރުގެ ފަހުން ބެންޒެމާއަށް ފްރާންސްގެ ސްކޮޑުން ޖާގަ ލިބުނު ފުރަތަމަ ފަހަރެވެ.

މީގެ ކުރިން އޭނާއަށް ފްރާންސްގެ ސްކޮޑުން ފުރުސަތު ގެއްލުނީ އޮރިޔާންކާޑު ބޭނުންކޮށްގެން ފްރާންސްގެ މިޑްފީލްޑަރު މެތިއު ވަލްބުއޭނާއަށް ބިރުދައްކައި، ލާރި ހޯދަން މަސައްކަތްކޮށްފައިވާ ކަމަށް ތުހުމަތުކޮށް އޭނާ ހައްޔަރުކުރުމާ ގުޅިގެންނެވެ. އެކަންތައްތައް ހިނގާދިޔައިރު ބެންޒެމާ އާއި ވަލްބުއޭނާ އަކީ ބްރެޒިލުގައި 2014 ވަނަ އަހަރު ކުރިއަށްދިޔަ ފީފާ ވޯލްޑް ކަޕުގައި ކުޅުނު ފްރާންސް ޓީމުގެ ދެ ކުޅުންތެރިންނެވެ.

ޔޫރޯއަށް އެކުލަވާލި ސްކޮޑުގައި ބެންޒެމާ ހިމެނިއިރު، މިހާރު އޭނާ އަންނަނީ ފްރާންސްގެ ސްކޮޑާއެކު ތަމްރީނުތައް ހަދަމުންނެވެ. ދާދި ފަހުން ދިން އިންޓަވިއުއެއްގައި ބެންޒެމާ ބުނީ ގިނަ ދުވަސްތަކަކަށްފަހު ފްރާންސްގެ ސްކޮޑުގައި ހިމެނުމުން ފަޚުރުވެރިވާ ކަމަށެވެ. އަދި އޭނާގެ އުއްމީދަކީ ފްރާންސާއެކު ކާމިޔާބީއެއް ހޯދުން ކަމަށާއި، އެހެންކަމުން ކުރިއަށް އޮތް ޔޫރޯގައި އެކަމަށް ގަދައަޅައި މަސައްކަތްކުރާނެ ކަމަށްވެސް ވަނީ ބުނެފައެވެ.

މެދުކެނޑުމަކަށްފަހު ބެންޒެމާ ފްރާންސްގެ ސްކޮޑަށް ނެގިއިރު، އޭނާގެ މައްސަލައިގެ އަޑުއެހުންތައް މިހާރު ވަނީ މި އަހަރުގެ އޮކްޓޯބަރު މަހަށް ތާވަލުކޮށްފައެވެ. މި މައްސަލައިގައި ބެންޒެމާއަށް ފްރާންސްގެ ސްކޮޑުން ފުރުސަތު ގެއްލުނުއިރު، އޭނާ ވަނީ މީގެ ކުރިން ފްރާންސްގެ ގައުމީ ފުޓްބޯޅަ ޓީމަށް 81 މެޗު ކުޅެދީ 27 ލަނޑު ޖަހާފައެވެ.

އަންނަ ޖޫން މަހުގެ 11 ވަނަ ދުވަހު ފަށާ ޔޫރޯގައި ފްރާންސް ވާދަކުރާއިރު، އެ ގައުމު އޮތީ ގްރޫޕް އެފްގައެވެ. އެ ގްރޫޕުގައި ދެން ހިމެނޭ ގައުމުތަކަކީ ހަންގޭރީ، ޕޯޗުގަލް އަދި ޖަރުމަނެވެ.