އުމުރުން 12 އަދި 15 އަހަރުގެ ކުދިންނަށް ފައިޒަރ ވެކްސިން ޖެހުމުގެ ހުއްދަ އީޔޫއިން ދީފި

އުމުރުން 12 އަހަރާއި 15 އަހަރާ ދެމެދުގެ ކުޑަކުދިންނަށް ފައިޒަރ ވެކްސިން ޖެހުމުގެ ހުއްދަ ޔޫރަޕިއަން ޔޫނިއަން މެޑިސިން އެޖެންސީ (އީއެމްއޭ)ން ދީފިއެވެ.

ޖަރުމަނުވިލާތުގެ ބައޯއެންޓެކާއި ފައިޒަރ އިން އުފައްދާފައިވާ ފައިޒަރ ވެކްސިން ކުޑަކުދިންނަށް ޖެހުމުގެ ހުއްދަ އީއެމްއޭއިން ދީފައިވާއިރު މިމަހުގެ ކުރީކޮޅު އެމެރިކާ އާއި ކެނެޑާއިންވެސް ވަނީ މިއުމުރުފުރައިގެ ކުދިންނަށް ފައިޒަރ ވެކްސިން ދިނުމުގެ ހުއްދަދީފައެވެ. މީގެއިތުރުން ޔޫރަޕިއަން ޔޫނިއަންގެ ގައުމުތަކުގައި އުމުރުން 16 އަހަރުން މަތީގެ މީހުންނަށް އަންނަނީ ފައިޒަރ ވެކްސިން ދެމުންނެވެ.

މިނިންމުން ނިންމާފައިމިވަނީ ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)އިން ޔޫރަޕްގެ ގައުމުތަކުގައި ވެކްސިން ދިނުމުގެ ޕްރޮގްރާމް ހަލުވިކުރަން ޖެހޭނެކަމަށް ބުނެފައި ވަނިކޮށެވެ. ޑަބްލިޔުއެޗްއޯގެ ޔޫރަޕްގެ ގައުމުތަކަށް ކަނޑައަޅުއްވާފައި ހުންނަވާ ޑިރެކްޓަރ ހާންސް ކްލޫގާ ވަނީ އާބާދީގެ 70 އިންސައްތައަށް ވެކްސިން ދީގެން ނޫނީ މި ޕެންޑަމިކް ނިމުމަކަށް ނާންނާނެކަމަށް ވިދާޅުވެ ޔޫރަޕްގެ ގައުމުތަކަށް އިންޒާރު ދެއްވާފައެވެ.

އީއެމްއޭއިން ބުނެފައިވަނީ މިއުމުރުފުރައިގެ ކުދިންނަށް ވެކްސިން ދޭނީ ވެކްސިންގެ ދެ ޑޯޒްގެ މެދުގައި ތިން ހަފްތާގެ މުއްދަތެއް ދިނުމަށްފަހުކަމަށެވެ. އަދި އީއެމްއޭގެ މިނިންމުމާއެކު މިއުމުރުފުރައިގެ ކުދިންނަށް ވެކްސިން ދޭނެތޯ ނިންމާނީ އެގައުމަކުން ކަމަށްވެސް އީއެމްއޭއިން ބުނެއެވެ.

ޖަރުމަނުވިލާތުން ބުނެފައިވަނީ ޖޫން މަހުގެ 7ން ފެށިގެން އުމުރުން 12 އަހަރުން މަތީގެ ކުދިންނަށް ވެކްސިން ދޭން ފަށާނެކަމަށެވެ. އިޓަލީންވެސް ބުނެފައިވަނީ ވެކްސިން ދިނުމުގެ ޕްރޮގްރާމްގައި އުމުރުން 12 އަހަރުން މަތީ ކުދިން ހިމަނާނެކަމަށެވެ.

މުޅި ދުނިޔެއަށް ކުރިމަތިވެފައިވާ ކޮވިޑް-19ގެ ޕެންޑަމިކްގައި ހަރޑް އިމިޔުނިޓީ ހޯދުމަށް ކުޑަކުދިންނަށް ވެކްސިން ދިނުމަކީ މުހިންމު ކަމަކަށްވެފައިވާއިރު ހުކުރު ދުވަހު ޖަޕާނުންވެސް ވަނީ އުމުރުން 12 އަހަރުން މަތީގެ ކުދިންނަށް ވެކްސިން ދޭނެކަމަށް ބުނެފައެވެ.

ކޮވިޑް-19 ގެ ބޮޑުވަރު ވަނީ އާންމުކޮށް އުމުރުން ދުވަސްވީ މީހުންނާއި ބޮޑެތި ބަލިތައް ތަހައްމަލުކުރަމުންދާ މީހުންނަށްކަމަށްވާއިރު ކުޑަކުދިންނަށް ވެކްސިން ދިނުމަށް އިސްކަންދޭތީ އެކަމުގެ ކަންބޮޑުވުންތަކެއްވެސް ބައެއް ފަރާތްތަކުން ފާޅުކޮށްފައިވެއެވެ.

ފައިޒަރ އާއި ބައޯއެންޓުކުން ވެކްސިނުން ކުޑަކުދިންނަށް ކުރާ އަސަރު ދެނެގަތުމަށް ކުރިޔަށް ގެންދިޔަ ޓްރެއަލްގެ ނަތީޖާ ވަނީ މާޗް މަހު ހާމަކޮށްފައެވެ. މިޓްރެއަލްގައި އުމުރުން 12 އަހަރާއި 15 އަހަރާ ދެމެދުގެ 2260 ކުދިން ބައިވެރިކޮށްފައިވާއިރު މިޓްރެއަލްގެ ނަތީޖާ ދައްކާގޮތުން އެކުދިންނަށް ވެކްސިން ދިނުމަށް 100 އިންސައްތަ ވައިރަސް އިން ރައްކާތެރިކޮށްދެއެވެ.

ފައިޒަރ ގެ ޓްރެއަލްތަކުން ވެކްސިން ކާމިޔާބުކަން އެނގިފައިވާއިރު ކުޑަކުދިންނަށް ވެކްސިން ދިނުމުން ވައިރަސް އިން ދިފާއުވާ މިންވަރު ދެނެގަތުމުގެ ޓްރެއަލްތައް ވެކްސިން އުފައްދާ އެހެން ކުންފުނިތަކުން ވެސް އަންނަނީ ކުރަމުންނެވެ. އެގޮތުން އެސްޓްރަޒެނިކާ އާއި މޮޑާނާ އަދި ޖޯންސަން އަދި ޖޯންސަން އިން އަންނަނީ އުމުރުން 6 މަހުގެ ކުދިންނާ ހަމައިން ވެކްސިން އިން ރައްކާތެރިކަން ލިބޭ މިންވަރު ދެނެގަތުމަށް ޓްރެއަލްތައް ކުރިޔަށް ގެންދަމުންނެވެ.