ކ. މާލެ
|
28 މެއި 2021 | ހުކުރު 15:57
ޔުވެންޓަސްގެ ކޯޗުކަމާ އަލުން ހަވާލުވާ މަސިމިލިއާނޯ އެލެގްރީ
ޔުވެންޓަސްގެ ކޯޗުކަމާ އަލުން ހަވާލުވާ މަސިމިލިއާނޯ އެލެގްރީ
ގެޓީ އިމޭޖަސް
އެލެގްރީ ޔުވެންޓަސްއާ ހަވާލުވުން
ޕިރްލޯ ވަކިކޮށް ޔުވެންޓަސްގެ ކޯޗުކަން އަލުން އެލެގްރީއަށް
 
އެއް އަހަރަށް ފަހު އަންދްރެއާ ޕިރްލޯ ވަނީ ކޯޗުކަމުން ވަކިކޮށްފައި
 
އެލެގްރީ ވަނީ ޔުވެންޓަސްއާއެކު 2025 ގެ ނިޔަލަށް އެއްބަސްވުން ހަދާފައި

ޔުވެންޓަސް ކޯޗުގެ މަގާމުން އަަންދްރެއާ ޕިރްލޯ ވަކިކޮށް، އެ ޓީމުގެ ކޯޗުގެ މަގާމަށް މަސިމިލިއާނޯ އެލެގްރީ އަލުން ހަމަޖައްސައިފިއެވެ.

އުމުރުން 42 އަހަރުގެ ޕިރްލޯ ޔުވެންޓަސްގެ ސީނިއާ ޓީމާ ހަވާލުވީ ޔުވެންޓަސްގެ ޒުވާން ޓީމުގެ ކޯޗުގެ މަގާމު ހަވާލުކުރިތާ ނުވަ ދުވަހަށް ފަހު މިދިޔަ އަހަރުގެ އޮގަސްޓް މަހުގެ ތެރޭގައެވެ. ޔުވެންޓަސްއަކީ ޕިރްލޯގެ ކޯޗިން ކެރިއަރުގައި އިރުޝާދުދިން ފުރަތަމަ ޓީމެވެ.

އެކަމަކު ހުކުރު ދުވަހުގެ ވަގުތެއްގައި ޔުވެންޓަސްއިން ވަނީ އެ ޓީމުގެ ކޯޗުގެ މަގާމުން ޕިރްލޯ ވަކިކުރިކަން އިއުލާން ކޮށްފައެވެ. ޕިރްލޯ އެއް ސީޒަނަށް ފަހު ޔުވެންޓަސްގެ ކޯޗުގެ މަގާމުން ވަކިކުރީ މި ފަހަރު އެ ޓީމަށް ނުވަ އަހަރަށް ފަހު އިޓާލިއަން ލީގު ގެއްލުމުގެ އިތުރުން، އެ ޓީމުގެ ކުޅުން ވަރަށް ބޮޑަށް ދަށްވުމާ ގުޅިގެންނެވެ. ޕިރްލޯގެ ކޯޗުކަމުގައި އިޓާލިއަން ސުޕަ ކަޕާއި އިޓާލިއަން ކަޕް ޔުވެންޓަސްއިން ކާމިޔާބުކުރި ނަމަވެސް، ލީގުގެ ގަދަ ހަތަރެއްގެ ތެރޭގައި އެ ޓީމު ހިމެނުނީ އުނދަގޫ ހާލަތަކަށްފަހުއެވެ.

އެއާއެކު ޔުވެންޓަސްގެ ކޯޗަކަށް އުމުރުން 53 އަހަރުގެ އެލެގްރީ އަލުން ހަމަޖެއްސިކަން ހުކުރު ދުވަހު ޔުވެންޓަސްއިން ވަނީ އިއުލާން ކޮށްފައެވެ. ރިޕޯޓުތައް ބުނާ ގޮތުން އޭނާ ވަނީ ޔުވެންޓަސްއާއެކު 2025 ގެ ނިޔަލަށް އެއްބަސްވުން ހަދާފައެވެ.

ޔުވެންޓަސްއާ އަލުން އެލެގްރީ ހަވާލުވާއިރު، އެލެގްރީ މީގެ ކުރިން ޔުވެންޓަސް ދޫކޮށްލީ އެ ޓީމަށް އިޓާލިއަން ލީގު ފަސް ފަހަރު ކާމިޔާބުކޮށްދިނުމަށްފަހު 2018-2019 ވަނަ އަހަރުގެ ސީޒަން ނިމުމުންނެވެ. އޭގެ ފަހުން އެލެގްރީ މިހާތަނަށް ޓީމަކާ ހަވާލުވެފައެއް ނުވެއެވެ.

މީގެ ކުރިން އޭސީ މިލާނަށް 2011 ވަނަ އަހަރު އިޓާލިއަން ލީގު ކާމިޔާބުކޮށްދީގެން ގިނަ ބަޔެއްގެ ސަމާލުކަން ހޯދި އެލެގްރީ ވަނީ މިލާނުގައި ހަތަރު ސީޒަން ހޭދަކޮށްފައެވެ. އަދި އޭގެ ފަހުން ޔުވެންޓަސްއަށް ބަދަލުވެ އެ ޓީމުގައި ފަސް ސީޒަން އެލެގްރީ ހޭދަކުރިއިރު، މި މުއްދަތުގައި އޭނާ ވަނީ އެ ޓީމަށް އިޓާލިއަން ލީގު ފަސް ސީޒަނުގައިވެސް ހޯދައިދީފައެވެ. އަދި އޭގެ އިތުރަށް އޭނާ ވަނީ ޔުވެންޓަސްއަށް އިޓާލިއަން ކަޕް ހަތަރު ފަހަރު އަދި އިޓާލިއަން ސުޕަ ކަޕް ދެ ފަހަރު ކާމިޔާބުކޮށްދީފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސައިން ފަރިޔާޒް
0%
0%
0%
0%
0%
0%
ކޮމެންޓް