މޫސުން ގޯސްވެ، ހއ. އަތޮޅުން ދ. އަތޮޅަށް ވައިޓް އެލަރޓް ނެރެފި
ކަނޑުތައް ގަދަވެ، އުދަ އަރާނެ ކަމަށް ލަފާކޮށްފައިވޭ
ހޯރަފުއްޓަށް އުދަ އެރުން
މޫސުން ގޯސްވެ، ހއ. އަތޮޅުން ދ. އަތޮޅަށް ވައިޓް އެލަރޓް ނެރެފިޢެވެ.
މޫސުމާ ބެހޭ ގައުމީ އިދާރާއިން ބުނީ ބޯކޮށް ވާރޭވެހި ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައި ޖެހޭނެ ކަމަށް ލަފާކުރެވޭތީ ހުކުރު ދުވަހުގެ ހެނދުނު 09:15ން މެންދުރު 14:15ށް ހއ. އަތޮޅުން ޅ. އަތޮޅަށް ވައިޓް އެލަރޓް ނެރެފައިވާ ކަމަށެވެ. އަދި އެ ސަރަހައްދަށް ވިލާގަނޑުގައި ގަޑިއަކު 45 މޭލަށް ވައި ގަދަވާނެ ކަމަށާއި ކަނޑުތައް ގަދަވެ، އުދަ އަރާނެ ކަމަށް އެ އިދާރާއިން ބުނެއެވެ.
މޫސުމާ ބެހޭ ގައުމީ އިދާރާ އިން މިހެން ބުނެފައިވާއިރު މި ދުވަސްވަރަކީ މޫސުން ގޯސް ދުވަސްވަރަކަށްވުމުން ކަނޑު ދަތުރުކުރާ ފަރާތްތަކުން މޫސުމަށް ސަމާލުވުމަށް އެމްއެންޑީއެފްއިން ވެސް ވަނީ އިލްތިމާސްކޮށްފައެވެ.
އެމްއެންޑީއެފް އިން ބުނީ ހުޅަނގު މޫސުމުގެ ބާރުގަދަވެ، ކުރިއަށް އޮތް ތިން ދުވަހަށް ވެސް ރާއްޖޭގެ (ޚާއްޞަކޮށް ރާއްޖޭގެ އުތުރާއި މެދުރާއްޖެތެރޭގެ) ބޮޑު ބަޔަކަށް ވިއްސާރަކޮށް، ވައިގަދަވެ، ކަނޑުތައް ގަދަވާނެ ކަމަށް ރާއްޖޭގެ މޫސުމާ ބެހޭ ޤައުމީ އިދާރާއިން ލަފާކޮށްފައިވާތީ ކަނޑު ދަތުރުކުރާ ފަރާތްތަކުން މޫސުމަށް ސަމާލުވުމަށް އިލްތިމާސްކުރާ ކަމަށެވެ.
މީގެއިތުރުން ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވަނީ ރާއްޖެއަށް މިހާރު ކުރަމުންދާ ވިއްސާރައިގެ އެންމެ ފަހުގެ މައުލޫމާތުތައް ވެސް ހިއްސާކޮށްފައެވެ. އެ މައުލޫމާތުތަކަށް ބަލާއިރު ބުރާސްފަތި ދުވަހު ނ. ކެނދިކުޅުދޫއަށް އުދައަރައި ރަށު ތެރޭގައި ވަނީ ފެންބޮޑުވެފައެވެ. އަދި މި މަހުގެ 25 ވަނަ ދުވަހުން ފެށިގެން ކ. ދިއްފުއްޓަށް އުދައަރައި ވަރަށް ގިނަ ގެތަކަށް އުދައިގެ އަސަރުކޮށްފައިވާއިރު އއ. ތޮއްޑޫ، ހިމަންދޫ އަދި ރަސްދޫއަށް ވެސް އުދައިގެ އަސަރު ވަނީ ކޮށްފައެވެ. މީގެ އިތުރުން އދ. ކުނބުރުދޫއަށް ވަރަށް ބޮޑަށް އުދައިގެ އަސަރުކޮށްފައިވާއިރު އދ. ދަނގެއްޗަށް ވެސް އުދަ އަރައި މަގުތަކުގައި ވަނީ ފެންބޮޑުވެފައެވެ.
ދިޔަވަރު ބޮޑުވި ގަޑީގައި ވ. އަތޮޅުގެ ވަރަށް ގިނަ ރަށްތަކަށް އުދައިގެ އަސަރުކޮށްފައެވެ. އެގޮތުން ވ. ރަކީދޫއަށް ވަރަށް ބޮޑަށް އުދަ އަރައި ރަށު ތެރޭގައި ވަނީ ފެންބޮޑުވެފައެވެ.
