މިސްކިތްތައް ވަގުތީ ގޮތުން ބަންދު ކުރީ ހުރިހާ ރައްޔިތުންގެ ރައްކާތެރިކަމަށް- މިނިސްޓަރ

މާލެ ސަރަހައްދުގެ މިސްކިތްތައް ވަގުތީގޮތުން ބަންދުކުރުމަށް ނިންމީ ރައްޔިތުން ރައްކާތެރި ކުރުމަށް އަޅާ ފިޔަވަޅެއްގެ ގޮތުން ކަމަށް މިނިސްޓަރ އޮފް އިސްލާމިކް އެފެއަރޒް ޑރ. އަޙުމަދު ޒާހިރު ޢަލީ ވިދާޅުވެއްޖެއެވެ.

މިނިސްޓަރ ވިދާޅުވީ އެންމެ ފުރަތަމަ ކޮވިޑުން ރައްކާތެރިވުމަށް ދުރުދުރުގައި ނަމާދު ކުރަން އެންގުނު ކަމަށާއި، އަދި ކޮވިޑްގެ ހާލަތު އިތުރަށް ގޯސްވަމުން ދިއުމާއެކު ޖަމާއަތުގައި ނަމާދު ކުރުން ހުއްޓާލުމަށް ވެސް އެންގުނު ކަމަށެވެ. އަދި މިހާރު ހާލަތު މާބޮޑަށް ގޯސްވުމާއެކު މިސްކިތްތައް ވަގުތީ ގޮތުން ބަންދުކުރީ ކަމަށެވެ.

މިހާރު މިސްކިތްތަކުގެ ފެން ކަނޑާލައިފައިވާ ކަމަށާއި، ފާޚާނާތައް ވެސް ބަންދު ކުރެވިފައިވާ ކަމަށް އެމަނިކުފާނު ވިދާޅުވިއެވެ. އަދި މިނިސްޓްރީގެ އެންގުމާ އެއްގޮތަށް ގިނަ ބަޔަކު އަމަލު ކުރާ ކަމަށާއި، ނަމަވެސް އަންގާ އެންގުންތަކާ ޚިލާފުވާ ބަޔަކުވެސް އުޅޭކަމަށް ވިދާޅުވިއެވެ. މިއީ އާންމު މަސްލަހަތު ރައްކާތެރި ކުރުމުގެ ގޮތުން އެޅުނު ފިޔަވަޅެއް ކަމަށް ފާހަގަ ކުރެއްވިއެވެ.

މިކަމާއި ގުޅިގެން އިސްލާމިކް މިނިސްޓްރީން ނެރުނު ނޫސް ބަޔާނުގައި ވަނީ، ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ވައިރަސް ރާއްޖޭގައި ހަލުވިކަމާއެކު ފެތުރެމުންދާތީ، މިހާރުގެ ޙާލަތަށް ރިޢާޔަތްކޮށް، އިތުރަށް މިވައިރަސް ރާއްޖޭގައި ފެތުރުން ހުއްޓުވުމަށްޓަކައި އަޅާ ރައްކާތެރިކަމުގެ މުހިންމު ފިޔަވަޅެއްގެ ގޮތުން، އިސްލާމީ ފަތުވާދޭ އެންމެ މަތީ މަޖިލީހާއި ދީނީ ޢިލްމުވެރިންގެ ލަފާގެ މަތިން، 19 މެއިން ފެށިގެން މިސްކިތްތަކުގައި ޖަމާއަތުގައި ނަމާދުކުރުން މެދުކަނޑާލެވިފައިވާ ކަމަށެވެ.

އަދި އާންމު ރައްޔިތުންގެ ހައްގުގައި އެކަން ކުރިކަމުގައިވިޔަސް ބައެއް ފަރާތްތަކުން އެ އެންގުންތަކަށް ތަބާނުވެ ބައެއް މިސްކިތްތަކުގައި ގައިދުރުކަމެއްނެތި ޖަމާއަތް ހަދަމުންދާތީއާއި ކޮވިޑް މާލޭގައި ފެތުރުން ކޮންޓްރޯލު ނުކުރެވޭތީއާއި ބުދަ ދުވަހުން ފެށިގެން ހުއްދައާއި ނުލައި އާންމުން ބޭރަށް ނިކުމެއުޅުންވެސް މަނާކުރެވިފައިވާތީ، ކޮވިޑުން ރައްކާތެރި ވުމަށް އަޅާ ފިޔަވަޅެއްގެ ގޮތުން، ބުދަ ދުވަހުގެރޭ ފަތިސް ނަމާދުން ފެށިގެން މާލޭގެ މިސްކިތްތައް ބަންދުކުރުމަށް ނިންމާފައިވާ ކަމަށެވެ.

މީގެ އިތުރުން މިދަނޑިވަޅުގައި މިސްކިތަކަށް ވަޑައިނުގެންނެވުނު ކަމުގައިވިއަސް، ފަރުޟު ފަސް ނަމާދު ބަރާބަރަށް އަދާކުރުމަށާއި، ސުންނަތް ނަމާދު ގިނަކޮށް، ކީރިތި ޤުރުއާން ކިޔަވައި، އިސްތިޣްފާރު ކުރުމަށާއި، ބަލިމަޑުކަމުން އަވަހަށް ސަލާމަތް ކޮށްދެއްވުން އެދި ގިނަގިނައިން ދުޢާކޮށް އުޅުމަށް ހުރިހާ ރައްޔިތުންނަށް ނަސޭހަތްތެރިވެ ވަސިއްޔަތްކޮށްފައިވެއެވެ.

އަދި ކަމާގުޅޭ ފަރާތްތަކުން ދޭ އިރުޝާދުތަކާ އެއްގޮތަށް އަމަލުކުރުމަށާއި ﷲގެ ރަހުމަތުން މާޔޫސްނުވެ، ސަބަބުތަކުގައި ހިފައި، ފުރިހަމައަށް ﷲ އަށް ވަކީލުކޮށް އުޅުމަށް މިނިސްޓްރީން ވަނީ ނަސޭހަތްތެރިވެފައެވެ.