"ރައީސް އޮފީސް މެދުވެރިކޮށް ތަހުގީގުގެ މައުލޫމާތު ހޯދަން ޖެހޭތީ ރައީސް ނަޝީދު ކަންބޮޑުވެވަޑައިގަންނަވާ"

ރައްޔިތިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާގެ ތަހުގީގުގެ މައުލޫމާތު ރައީސް އޮފީސް މެދުވެރިކޮށް ހޯއްދަވަން ޖެހޭތީ އެކަމާ އެމަނިކުފާނު ކަންބޮޑުވެވަޑައިގަންނަވާ ކަމަށް ބިލެތްދޫ ދާއިރާގެ މެންބަރު އަހުމަދު ހަލީމް (ދޮންބިލެތް) ވިދާޅުވެއްޖެއެވެ.

ހަމަލާގައި ލިބިވަޑައިގެންނެވި ޒަޚަމްތަކަށް އިތުރު ފަރުވާ ހޯއްދެވުމަށް ޖަރުމަންވިލާތުގައި ހުންނެވި ރައީސް ނަޝީދާ ވާހަކަފުޅު ދެއްކެވުމުގެ ފުރުސަތު ލިބިވަޑައިގެންނެވި ކަމަށް ވިދާޅުވެ ދޮންބިލެތް ކުރެއްވި ޓްވީޓެއްގައި ވިދާޅުވީ, ރައީސް ނަޝީދުގެ ހާލުކޮޅު މިހާރު ވަރަށް ރަނގަޅު ކަމަށެވެ. އެހެން ނަމަވެސް އެ މައްސަލައިގެ ތަހުގީގު ކުރިއަށްދާ ގޮތުގެ މައުލޫމާތު ރައީސް އޮފީހުން ހޯއްދަވަން ޖެހިވަޑައިގެންނެވުމަކީ ކަންބޮޑުވާ ކަމެއް ކަން ރައީސް ނަޝީދު ފާހަގަކުރެއްވި ކަމަށް ވިދާޅުވިއެވެ.

ރައީސް ނަޝީދަށް ދިން ނިރުބަވެރި ހަމަލާގެ ތަހުގީގުގެ މައުލޫމާތު ސީދާ އެމަނިކުފާނަށް ލިބިވަޑައިނުގެންނެވުމާ މެދު ކަންބޮޑުވެވަޑައިގަންނަވާކަމަށް ވިދާޅުވެފައި މިވަނީ, އެ ހަމަލާގެ ތަހުގީގު ވަރަށް ބާރަށް ކުރިއަށް ދާކަމަށް ރައީސް އިބްރާހިމް މުހައްމަދު ސާލިހު ވިދާޅުވެފައި ވަނިކޮށެވެ. ހަމައެހެންމެ އެމެރިކާގެ ތަޖުރިބާކާރެއް ތަހުގީގާ ވަރަށް އަވަހަށް ގުޅޭނެ ކަމަށް ވެސް ރައީސް ވިދާޅުވެފައިވަނިކޮށެވެ.

މެއި މަހުގެ 6 ވަނަ ދުވަހު ރައީސް ނަޝީދަށް އަމާޒުކޮށް ބޮން ގޮއްވާލައިގެން ދިން ހަމަލާއާ ގުޅިގެން މިހާތަނަށް ހަތަރު މީހަކު ހައްޔަރުކޮށްފައި ވެއެވެ. އެއީ, ބޮންގޮއްވުމުގައި އަމަލީގޮތުން ހަރަކާތްތެރިވި އަދުހަމް އަހުމަދުގެ އިތުރުން، މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އަދި ލ.ގަން، ދުންފިނި އުފާ، އަހުމަދު ފާތިހެވެ.