ކުރީގެ ރައީސް ޔާމީންވެސް ޑރ. ވަހީދުވެސް އެހީތެރިކަން ފޯރުކޮށްދެންޏާ ބަލައިގަންނަން ސަރުކާރު އޮތީ ތައްޔާރަށް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.

އަންގާރަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ރައީސް ސާލިހު ވަނީ، ސަރުކާރުން ކޮވިޑާއި ގުޅިގެން އަޅާ ހުރިހާ ފިޔަވަޅަކީ ސިއްހީ ދާއިރާގެ ތަޖުރިބާކާރުން މެދުކެނޑުމެއްނެތި ދެމުންދާ އިރުޝާދާއި ލަފާއާއި އެއްގޮތަށް އަޅާ ފިޔަވަޅުތަކެއް ކަމަށް ވިދާޅުވެފައެވެ. ގައުމީ މި މަސައްކަތުގައި ކޮންމެ ފަރުދަކުވެސް ޒިންމާ ނަގައި އެހީތެރިވެދޭން ފުރުސަތު ހުޅުވާލާފައިވާ ކަމަށް ވިދާޅުވިއެވެ. ވޭތުވެދިޔަ ތަނުގައި އެއްވެ އުޅުން މަނާކުރެވިފައި ވަނިކޮށް ގަވައިދުތަކަށް އެއްވެސް ބެލުމެއް ނެތި އެއްވެ އުޅެ ކުރި މަސައްކަތުގެ ހިތި ނަތީޖާ މިއަދު ދެކެން ޖެހިފައިވާކަން ފާހަގަކުރައްވާ ރައީސް ވަނީ ކުރިއަށް އޮތް ތަނުގައި މިފަދަކަމެއް ތަކުރާރު ނުކުރާނެކަމަށް އުންމީދުކުރައްވާކަމަށް ވިދާޅުވެފައެވެ. ރައީސް ވަނީ ކުރީގެ ރައީސް ޔާމިންވެސް ޑރ. ވަހީދުވެސް އެހީތެރިކަން ފޯރުކޮށްދެންޏާ ބަލައިގަންނާނަންކަމަށް ވިދާޅުވެފައެވެ.

ކޮވިޑްގެ ބަލިމަޑުކަން އިތުރުވުމާއެކު މިބަލި ކޮންޓްރޯލްކުރުމަށް ގާބިލު ބޭފުޅުން ގެނެސް ކެބިނެޓަށް ބަދަލު ގެންނަވާނަންތޯ ކުރި ސުވާލަށް ޖަވާބު ދެއްވަމުން ރައީސް ވަނީ އެމަނިކުފާނުގެ ކެބިނެޓަށް ފުރިހަމަ އިތުބާރު ކުރައްވާކަމަށް ވިދާޅުވެފައެެވެ. ކެބިނެޓްގެ ކޮންމެ ވަޒީރަކުވެސް ހަވާލުކުރެއްވި ކޮންމެ ކަމެއްވެސް ފުރިހަމަކޮށްފައިވާކަން ފާހަގަކުރައްވައި ރައީސް ވަނީ މި ދަތި ހާލަތުގައި ރާއްޖެއިން ހޯދި އެހީއާއި ލޯނުތަކުން އެކަނިވެސް އެކަން ހާމަވާކަމަށް ވިދާޅުވެފައެވެ.

2020 ވަނަ އަހަރު ލޯނު އެހީގެ ގޮތުގައި 872 މިލިއަން ޑޮލަރާއި، ހިލޭ އެހީގެ ގޮތުގައި 465 މިލިއަން ޑޮލަރު ހިމެނޭހެން 1.34 ބިލިއަން އެހީގެ ގޮތުގައި އެކަނި ހޯދުމަކީ ރެކޯޑެއްގެ ގޮތުގައި ސިފަކުރެއްވިއެވެ. މިއަހަރުގެ މިހާތަނަށް 300 މިލިއަން ސުކޫކްގެ ގޮތުގައި ވިއްކާފައިވާއިރު، ކޮވިޑްގެ މި ދަތި ހާލަތުގައިވެސް ކުރީގެ ރައީސް ޔާމީންގެ ދައުރުގައި ނަގާފައިވާ 275 މިލިއަން ޑޮލަރުގެ ދަރަނި އެއްކޮށް އަދާކުރުމާއި ގާތަށް ޖެހިލާފައިވާކަމަށެވެ. އަންނަ އަހަރު ދައްކައި ޚަލާސް ކުރަންޖެހޭ މި ދަރަނީގެ 75 އިންސައްތަ މިހާރު އަދާކުރެވިފައިވާކަމަށް ރައީސް ވިދާޅުވިއެވެ.