ފެނާއި ކަރަންޓު ބިލް ކުޑަކޮށްދޭން ނިންމަވައިފި
ކޮންމެ ދުވަހަކު ވެސް ޕޮޒިޓިވް ވާ މީހުންގެ އަދަދު މިހާރު ހުންނަނީ 1000ން މަތީގައި
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިޙް
މުޅި ރާއްޖޭގެ ހުރިހާ ހިސާބެއްގެ ފެންބިލާއި ކަރަންޓު ބިލުން ބޮޑެތި ލުއިތަކެއް ދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ނިންމަވައިފިއެވެ.
އަންގާރަ ދުވަހުގެ ރޭ ބޭއްވި ނޫސްވެރިންގެ ބައްދަލު ވުމުގައި ރައީސް ވިދާޅުވީ, މުޅި ރާއްޖޭގެ ހުރިހާ ރަށެއްގެ ފެންބިލުން 30 އިންސައްތައިގެ ޑިސްކައުންޓެއް ދިނުމަށް ނިންމަވާފައި ވާކަމަށެވެ. ހަމައެއާއެކު ވިޔަފާރިތަކުގެ ފެންބިލުން 20 އިންސައްތައިގެ ޑިސްކައުންޓެއް ދިނުމަށް ނިންމަވާފައި ވާކަމަށް ރައީސް ވިދާޅުވިއެވެ.
ކަރަންޓު ބިލުން 40 އިންސައްތައިގެ ޑިސްކައުންޓެއް ރާއްޖޭގެ ހުރިހާ ރަށަކުން ވެސް ލިބިގެން ދާނެ ކަމަށް ރައީސް ވިދާޅުވިއެވެ. އަދި ވިޔަފާރިތަކަށް 20 އިންސައްތައިގެ ޑިސްކައުންޓެއް ލިބިގެން ދާނެ ކަމަށް ރައީސް ވިދާޅުވިއެވެ.
ރައީސް މިގޮތަށް ނިންމަވާފައި މިވަނީ ކޮވިޑްގެ ހާލަތު ގޯސް ވުމާއެކު, ފިޔަވަޅުތައް ވަރުގަދަކުރުމަށް ސަރުކާރުން ނިންމާފައިވާ ދަނޑިވަޅެއްގައެވެ.
ދުވަހަކު ނުވާ ވަރަށް މިހާރު ރާއްޖޭގެ ކޮވިޑްގެ ހާލަތު ވަނީ ގޯސްވެފައެވެ. އެގޮތުން މި މަހަކީ މިހާތަނަށް ދުވާލެއްގެ މައްޗަށް ކޮވިޑަށް ޕޮޒިޓިވްވި މީހުންގެ އަދަދު އެންމެ ގިނަ މަހެވެ. ކޮންމެ ދުވަހަކު ވެސް ކޮވިޑަށް ޕޮޒިޓިވްވި މީހުންގެ އަދަދު މިހާރު ހުންނަނީ 1000ން މަތީގައެވެ.
