އޭޝިއަން ނެޓްބޯލް ފެޑެރޭޝަންގެ ނައިބު ރައީސާއަކަށް އައިމިނަތު ޝާޒްލީން
ޝާޒްލީ ނައިބު ރައީސާ ކަމުގެ މަގާމަށް ހޮވުނީ ކުރިއަށް އޮތް 2 އަހަރަށް
ނެޓްބޯލް އެސޯސިއޭޝަން އޮފް މޯލްޑިވްސްގެ ރައީސާ އައިމިނަތް ޝާޒްލީން
އޭޝިއަން ނެޓްބޯލް އެސޯސިއޭޝަން (އޭއެންއެފް) ގެ ނައިބު ރައީސާކަމުގެ މަގާމަށް ރާއްޖޭގެ ނެޓްބޯލް އެސޯސިޢޭޝަންގެ ރައީސާ އައިމިނަތް ޝާޒްލީން (ޝާޒްލީ) އިންތިހާބުވެއްޖެއެވެ.
އޭއެންއެފް ގެ ނައިބު ރައީސާކަމުގެ މަގާމަށް ޝާޒްލީ އިންތިހާބުވީ ބުރާސްފަތި ދުވަހު ދެކުނު ކޮރެއާގައި އޮތް އޭއެންއެފްގެ ކޮންގްރެސްގައި ޕާކިސްތާނާއި އޮސްޓްރޭލިއާ ވާދަކޮށް އިންތިހާބު ކާމިޔާބު ކުރައްވައިގެންނެވެ.
ކޮންގްރެސްގައި ބައިވެރިވި 19 ގައުމަކުން ވޯޓް ލީއިރު، ނުވަ ގައުމަކުން ވަނީ ޝާޒްލީއަށް ތާއީދު ކޮށްފައެވެ.
ކުރިއަށް އޮތް ދެ އަހަރު ދުވަހަށް ޝާޒްލީ ނައިބު ރައީސާއަކަށް އިންތިހާބު ވެވަޑައިގެންވިއިރު، މިއީ ބައިނަލްއަގްވާމީ ނެޓްބޯޅަ އެސޯސިއޭޝަންގެ މަގާމެއް ރާއްޖެއަށް ލިބުނު ފުރަތަމަ ފަހަރު ކަން ވެސް ފާހަގަ ކޮށްލެވެ އެވެ.
އޭއެންއެފް ގެ ކޮންގްރެސްގައި ރާއްޖޭގެ ފަރާތުން ބައިވެރި ވެފައި ވަނީ، ޝާޒްލީން އާއި، ނައިބު ރައީސާ އައިމިނަތު ނިމާގެ އިތުރުން އެ އެސޯސިއޭޝަންގެ ޖެނެރަލް ސެކެޓްރީ މުހަންމަދު ޝާހީ އެވެ.
މި ކޮންގްރެސްގައި ހުރިހާ މެމްބަރު ގައުމުތަކުން ވަނީ އެސޯސިއޭޝަންތަކުގެ އަހަރީ ރިޕޯޓާއި، މިދިޔަ އަހަރުގެ މާލީ ހިސާބުތައް ވެސް ހުށައަޅާފައެވެ.
