ޔޫރޯއަށް ފަހު ޖަރުމަނުގެ ކޯޗަކަށް ފްލިކް

ކުރިއަށް އޮތް ޔޫރޯ ފުޓްބޯޅަ މުބާރާތަށް ފަހު ޖަރުމަނުގެ ގައުމީ ފުޓްބޯޅަ ޓީމުގެ ކޯޗުގެ މަގާމަށް ހަންސީ ފްލިކް ހަމަޖައްސައިފިއެވެ.

އުމުރުން 56 އަހަރުގެ ފްލިކް ޖަރުމަން ޓީމާ ހަވާލުވިއިރު، އޭނާ ވަނީ މި ސީޒަން ނިމުމާއެކު ބަޔާން މިއުނިކުގެ ކޯޗުގެ މަގާމުން ވަކިވެފައެވެ. އެއާއެކު އަންގާރަ ދުވަހުގެ ވަގުތެއްގައި ޖަރުމަން ޓީމުން ވަނީ އެ ޓީމުގެ ކޯޗަކަށް ފްލިކް ހަމަޖެއްސިކަން އިއުލާން ކޮށްފައެވެ. އަދި މި އެއްބަސްވުމާއެކު 2024 ވަނަ އަހަރުގެ ޔޫރޯގެ ނިޔަލަށް އޭނާ ގައުމީ ޓީމަށް އިރުޝާދުދޭނެ ކަމަށް ޖަރުމަން ޓީމުން މައުލޫމާތުދެއެވެ.

އަންނަ މަހު ފަށާ ޔޫރޯއަށް ފަހު ޖަރުމަން ޓީމާ ފްލިކް ހަވާލުވާއިރު، ޔޫރޯއަށްފަހު ޖަރުމަނުގެ ގައުމީ ޓީމުގެ ކޯޗުކަން ދޫކޮށްލަން އުމުރުން 61 އަހަރުގެ ޔޮއަހިމް ލޯ ވަނީ ނިންމާފައެވެ. މިހާތަނަށް ޖަރުމަން ޓީމާއެކު ލޯ 14 އަހަރު ހޭދަކޮށްފައިވާއިރު، އޭނާގެ އެންމެ ބޮޑު ކާމިޔާބީއަކީ 2014 ވަނަ އަހަރުގެ ފީފާ ވޯލްޑް ކަޕެވެ. އަދި ލޯއާއެކު ޖަރުމަނުން ވަނީ 2017 ވަނަ އަހަރުގެ ފީފާ ކޮންފެޑެރޭޝަންސް ކަޕުވެސް ކާމިޔާބުކޮށްފައެވެ.

ބަޔާން ދޫކޮށް ޖަރުމަން ޓީމާ ފްލިކް ހަވާލުވިއިރު، އޭނާ 2014 ވަނަ އަހަރު ބްރެޒިލުގައި ބޭއްވި ވޯލްޑް ކަޕް ކާމިޔާބުކުރި ޖަރުމަން ގައުމީ ޓީމުގެ އެސިސްޓަންޓް ކޯޗެވެ. އަދި ފްލިކް ވަނީ 2014 ވަނަ އަހަރުން ފެށިގެން 2017 ވަނަ އަހަރަށް ޖަރުމަން ފުޓްބޯޅަ ފެޑެރޭޝަނުގެ ސްޕޯޓިން ޑިރެކްޓަރެއްގެ ގޮތުގައިވެސް މަސައްކަތްކޮށްފައެވެ.

އަދި ބަޔާނުގައި ފްލިކް ކާމިޔާބު ދުވަސްތަކެއް ހޭދަކޮށްފައިވާއިރު، އޭނާ ވަނީ މަދު ދުވަސްކޮޅެއްގެ ތެރޭގައި ބަޔާނާއެކު ގިނަ ކާމިޔާބީތަކެއް ހޯދާފައެވެ. އެގޮތުން ބަޔާނާ ހަވާލުވުމަށްފަހު ފްލިކް ވަނީ އެ ޓީމުގެ ހާލަތު ބަދަލުކޮށް، ބަޔާނަށް މިދިޔަ ދެ ސީޒަނުގެ ޖަރުމަން ލީގާއި، ޖަރުމަން ކަޕް އަދި ޔުއެފާ ޗެމްޕިއަންސް ލީގު ހޯދައިދީފައެވެ. މީގެ އިތުރުން ޖަރުމަން ސުޕަ ކަޕާއި، ޔުއެފާ ސުޕަ ކަޕް އަދި ކުލަބު ވޯލްޑް ކަޕުވެސް ފްލިކް ވަނީ ބަޔާނަށް ހޯދައިދީފައެވެ.

ލޯއާއެކު ކުރިއަށް ޔޫރޯއަށް ޖަރުމަން ޓީމު ނުކުންނައިރު، މި ފަހަރުގެ ޔޫރޯގައި އެ ގައުމު ހިމެނެނީ ގްރޫޕް އެފްގައެވެ. މި ގްރޫޕުގައި ދެން ހިމެނެނީ ހަންގޭރީ، ޕޯޗުގަލް އަދި ފްރާންސެވެ.