މެލޭޝިއާގައި ދެ ލައިޓް ރެއިލް ޓްރެއިން ޖެހި 200ށްވުރެ ގިނަ މީހުންނަށް އަނިޔާ ވެއްޖެއެވެ.

ކުއަލަލަމްޕޫރުގެ ގެ ޓްވިން ޓަވަރ ކައިރީގައި ހުންނަ ޓަނަލްގައި ހިނގި މި ހާދިސާ ހިނގީ، ދެކޮޅަށް އެއް ވަގުތެއްގައި ދުއްވާފައި އައި ދެ ޓްރެއިން ޖެހުމުންނެވެ. ހާދިސާ ހިނގީ ހޯމަ ދުވަހު މެލޭޝިއާ ގަޑިން 8:33 ހާއިރުއެވެ. މި ހާދިސާ ހިނގީ ޓްވިންޓަވަރާ 330 ފޫޓް ދުރުން ޓަނަލްގެ އެތެރޭގައެވެ.

ޖެހުނު ދެ ޓްރެއިންގެ ތެރެއިން އެއް ޓްރެއިންގައި 213 ފަސިންޖަރުން ތިއްބެވެ. އަނެއް ޓްރެއިން އަކީ، މަރާމާތައްފަހު ހުސްކޮށް ދަތުރުކުރި ޓްރެއިނެކެވެ. މިއީ ޑްރައިވަރަކާ ނުލައި ދަތުރުކުރާ ޓްރެއިންތަކެކެވެ. އެހެން ނަމަވެސް ހުސްކޮށް އައި ޓްރެއިންގައި ޑްރައިވަރެއް ހުއްޓެވެ.

ފުލުހުންނާ ހަވާލާދީ އަލްޖަޒީރާގައި ރިޕޯޓުކޮށްފައިވާ ގޮތުން، 47 މީހަކަށް ސީރިއަސް އަނިޔާތަކެއް ލިބިފައިވެއެވެ. އަދި 166 މީހަކަށް އެކިވަރުގެ ކުދި އަނިޔާތައްވަނީ ލިބިފައެވެ.

އަންގާރަ ދުވަހު ރެއިލް އޮޕަރޭޓްކުރާ ފަރާތުން ބުނެފައިވަނީ، 64 މީހަކަށް ހޮސްޕިޓަލުގައި ފަރުވާ ދީފައިވާ ކަމަށާއި، 6 މީހަކަށް އައިސިޔޫގައި ފަރުވާ ދެމުން އަންނަ ކަމަށެވެ.

ޓްރާސްޕޯޓް މިނިސްޓްރީން ބުނެފައިވަނީ، އެއް ޓްރެއިން ދިޔައީ ގަޑިއަކު 40 ކިލޯމިޓަރު ބާރުމިނުގައި ކަމަށާއި، އަނެއް ޓްރެއިން ދިޔައީ ގަޑިއަކު 60 ކިލޯ މީޓަރު ބާރމިނުގައި ކަމަށެވެ. މިއީ ފާއިތުވި 23 އަހަރުގެ ތެރޭގައި ހިނގި މިފަދަ ފުރަތަމަަ އެކްސިޑެންޓްކަން ފާހަގަކުރިއެވެ.

އެއްވަގުތެއްގައި ދެ ޓްރެއިން ދެކޮޅަށް ދަތުރުކުރީ ކީއްވެގެންކަން އަދި ސާފުނުވާއިރު ބޮޑަށް ބެލެވިފައިވަނީ އެއީ މުއާމަލާތްކުރުމުގައި އެރި އޮޅުމެއް ކަަމަށެވެ. މި ހާދިސާ ވަރަށް ސީރިއަސް ކަމެއްގެ ގޮތުގައި ތަހުގީގު ކުރުމަށް ބޮޑުވަޒީރު މުހިއްޔިއްދީން ޔާސީން ވަނީ ޓްރާންސްޕޯޓް މިނިސްޓްރީއަށް އަންގާފައެވެ.

ޓްރެއިން އިން ދަތުރު ކުރި ކޮންމެ ޕަސެންޖަރަކަށް 1000 މެލޭޝިއަން ރިންގިޓް ނުވަތަ 241 ޑޮލަރު އެހީގެ ގޮތުގައި ދިނުމަށް ޓްރާންސްޕޯޓް މިނިސްޓްރީން ނިންމާފައިވާ ކަމަށް ޚަބަރުތައް ބުނެއެވެ.