އަލްއަމީރު މުހައްމަދު ނޫރައްދީން އަވަހާރަވެއްޖެ

އަލްއަމީރު މުހައްމަދު ނޫރައްދީން އަވަހާރަވެއްޖެއެވެ.

އެމަނިކުފާނު އަވަހާރަވެފައި ވަނީ ދަރުމަވަންތަ ހޮސްޕިޓަލުގެ ޑީއެޗް-18ގައި ފަރުވާދެމުންދާތާ އަހަރެއްހާ ދުވަސްވެފައިވަނިކޮށް އުމުރުފުޅުން 89 އަހަރުގައެވެ. އެމަނިކުފާނު އަވަހާރަވި އިރު މީގެ އެއް މަސް ކުރިން އެމަނިކުފާނުގެ އަނބިކަނބަލުން މ. ތާނގީދޮށުގޭ ފާތިމަތު ނާސިރާ ވެސް ވަނީ އަވަހާރަވެފައެވެ.

މުހައްމަދު ނޫރައްދީނަކީ ރައީސުލްޖުމްހޫރިއްޔާގެ އޮފީހުގެ ޕޮލިސީ ސެކްރެޓަރީގެ މަގާމުގައި ހުންނެވި ސަބްރާ ނޫރައްދީންގެ ކާފާފުޅެވެ.

މުހައްމަދު ނޫރައްދީނަކީ، 25 ޖުލައި 1954ން ފެށިގެން މެދުނުކެނޑި 53 އަހަރު ދުވަހަށްވުރެ ދިގު މުއްދަތެއްގައި ސަރުކާރުގެ ޚިދުމަތުގައި ހޭދަކުރައްވާފައިވާ ބޭފުޅެކެވެ. އެގޮތުން އެމަނިކުފާނުވަނީ ސަރުކާރުގެ ވަރަށް އިސްމަގާމުތަކެއް ފުރުއްވާފައެވެ. އޭގެތެރޭގައި ވުޒާރަތުލް އަޥްޤާފުގެ ސެކްރެޓަރީ ކަމާއި، މަޙްކަމަތުލް ޚާރިޖިއްޔާގެ ސެކްރެޓަރީ ކަމާއި، މީޓިއޮޮރޮލޮޖިކަލް އޮފީހުގެ ވެރިޔާކަމާއި، މުނިސިޕަލްޓީގެ ރައީސްގެ ނާއިބު ކަމާއި، މުނިސިޕަލް ކައުންސިލަށް ދާޚިލިއްޔާއިން ޢައްޔަންކުރި މެންބަރުކަން ހިމެނެއެވެ. އަދި ވަޒީރުލް އަޢުޡަމް އޮފީހުގެ ޚާއްސަ ވަކީލުކަމުގެ މަގާމާއި، މިނިސްޓްރީ އޮފް ޓްރޭޑް އެންޑް ޑިވެލޮޕްމަންޓުގެ ޚާއްސަ ވަކީލު ކަމުގެ މަގާމާއި، މިނިސްޓްރީ އޮފް އެޑިޔުކޭޝަންގެ ވަކީލު ކަމުގެ މަގާމާއި، ޑިޕާޓްމަންޓް އޮފް ފިނޭންސްގެ ވަކީލު ކަމުގެ މަގާމާއި، ނާއިބު ކަމުގެ މަގާމު ހިމެނެއެވެ. އޭގެފަހުން މިނިސްޓަރ އޮފް ހޯމްއެފެއާޒްގެ ނާއިބު ކަމުގެ މަގާމާއި، މިނިސްޓަރ އޮފް އެޑިޔުކޭޝަންގެ ނާއިބު ކަމުގެ މަގާމާއި، ޑެޕިއުޓީ މިނިސްޓަރ އޮފް ސްޓޭޓް ފޮރ ރިލިޖަސް އެފެއާޒް ކަމުގެ މަގާމުވެސް އެމަނިކުފާނު ފުރުއްވިއެވެ. މީގެއިތުރުން، ދައުލަތަށް ގިނަދުވަހު ޚިދުމަތް ކުރެއްވި އިއްޒަތްތެރިއެއްގެ މަގާމުގައި ވެސް ހުންނެވިއެވެ.

މުޙަންމަދު ނޫރައްދީނަކީ، ރައްޔިތުންގެ މަޖިލީހުގެ ނ. އަތޮޅުގެ މެންބަރުކަމާއި، ދ. އަތޮޅުގެ މެންބަރުކަމާއި، ގއ. އަތޮޅުގެ މެންބަރުކަން ވެސް ކުރައްވާފައިވާ ބޭފުޅެކެވެ. މީގެ އިތުރަށް ސަރުކާރުގެ ވަޒީފާއިން ވަކިވެވަޑައިގެންނެވި ބޭފުޅުންގެ ތެރެއިން 50 އަހަރަށްވުރެ ދިގު މުއްދަތެއްގައި ސަރުކާރަށް ޚިދްމަތް ކުރައްވާފައިވާ ބޭފުޅުންނަށް ދެއްވި ޝަރަފުގެ ހަނދާނީ ފިލާވެސް އެމަނިކުފާނަށްވަނީ ލިބިވަޑައިގެންފައެވެ.

ރާއްޖޭގެ ރަސްކަމުގެ ދަރިކޮޅުތަކުގެ ތެރެއިން ރަސްކަލެއްގެ ދަރިކަލަކަށް އެންމެ ފަަހަށް ހުންނެވި ހަމައެކަނި ބޭފުޅަކީ އަލްއަމީރު މުހައްމަދު ނޫރުއްދީނެވެ. އަލްއަމީރު މުހައްމަދު ނޫރައްދީނުގެ ބައްޕާފުޅަކީ ރާއްޖޭގައި އެންމެފަހުން ދެވަނައަށް ރަސްކަން ކުރެއްވި ސުލްތާން ހަސަން ނޫރައްދީން ދެވަނައެވެ. ރަސްކަން ކުރެއްވީ 1935ން 1943 އަށެވެ.

އަލްއަމީރު މުހައްމަދު ނޫރައްދީނުގެ ވަނަވަރު ގޮސް ދޮންބަންޑާރައިންނާ ގުޅެނީ އަންނަނިވި ތަރުތީބުންނެވެ. އައްސުލްތާނުލްޣާޒީ ހަސަން އިއްޒުއްދީން (ދޮންބަންޑާރައިން) ގެ،ސުލްތާން ހަސަން ނޫރައްދީން 1ގެ، ސުލްތާން މުހައްމަދު މުއީނުއްދީން 1ގެ، ސުލްތާން މުހައްމަދު އިމާދުއްދީން 4 (މުސްކުޅި ބަންޑާރައިން)ގެ، އަލްއަމީރު ހަސަން އިއްޒުއްދީން (މާންދޫގޭ ބޮޑުދޮށީ މަނިއްޕުޅު)ގެ، ސުލްތާން މުހައްމަދު މުއީނުއްދީން 2 (ކުޑަބަންޑާރައިން)ގެ، ސުލްތާން ހަސަން ނޫރައްދީން 2ގެ، އަލްއަމީރު މުހައްމަދު ނޫރައްދީނެވެ.

އަލްއަމީރު މުހައްމަދު ނޫރައްދީން، ނިޝާން އިއްޒުއްދީނުގެ އިއްޒަތުގެ ވެރިޔާގެ ބޭފުޅުންގެ އަދަދު ހަތެކެވެ. ފިރިހެން ތިން ބޭފުޅުންނާއި އަންހެން ހަތަރު ބޭފުޅުންނެވެ. އެއީ އިބްރާހީމް ނޫރައްދީން، އަލީ ނޫރައްދީން، އިސްމާއީލް ނޫރައްދީން، އާމިނަތު ނޫރައްދީން, ޚަދީޖާ ނޫރައްދީން، އާއިޝަތު ނޫރައްދީން އަދި މަރިޔަމް ނޫރައްދީނެވެ.