115،000ށް ވުރެ ގިނަ ހެލްތު ކެއާ ވޯކަރުން ކޮވިޑްގައި ނިޔާވެއްޖެ: ޑަބްލިއުއެޗްއޯ

ކޮވިޑް-19 ޖެހިގެން 115،000ށް ވުރެ ގިނަ ހެލްތު ކެއާ ވޯކަރުން ދުނިޔޭގެ އެކި ހިސާބުތަކުން ނިޔާވެފައިވާ ކަމަށް ދުނިޔޭގެ ސިއްހަތު ޖަމުޢިއްޔާއިން ބުނެފިއެވެ.

ވާރޗުއަލްކޮށް ކުރިއަށްގެންދިޔަ ވާރލްޑް ހެލްތު އެސެމްބްލީގެ 74 ވަނަ ބައްދަލުވުމުގައި ވާހަކަދައްކަވަމުން ޑަބްލިއުއެޗްއޯގެ ޑިރެކްޓަރ ޖެނެރަލް ޓެޑްރޯސް އަދަނޮމް ވިދާޅުވީ މިދިޔަ އަހަރު ފެށުނު ކޮވިޑް-19ގެ އާލަމީ ވަބާގައި 18 މަހަށް ވުރެ ގިނަ ދުވަސް ހޭދަވެފައިވާއިރު، ދުނިޔޭގެ އެކި ހިސާބުތަކުގައި ފްރަންޓްލައިންގައި މަސައްކަތްކުރަމުން އައި، ހެލްތު ކެއާ ވޯކަރުންގެ ތެރެއިން ގިނަ ބަޔަކު މި ބަލީގެ ތެރޭގައި ނިޔާވެފައިވާ ކަމަށާއި، އެމީހުން ވަނީ އާންމުންނަށްޓަކައި ދެވޭނެ އެންމެ ބޮޑު ގުރުބާނީ ވެދީފައި ކަމަށެވެ. އެގޮތުން 115،000ށް ވުރެ ގިނަ ހެލްތު ކެއާ ވޯކަރުން މި ބަލީގައި މިހާރު ނިޔާވެފައިވާ ކަމަށް އޭނާ ވިދާޅުވިއެވެ.

ޓެޑްރޯސް ވިދާޅުވީ ފްރަންޓްލައިންގައި މަސައްކަތްކުރާ މީހުންގެ އަމަލުތަކާއި އެމީހުން ކުރާ މަސައްކަތްތައް "ހީރޯ"އިންނޭ ބުނާވަރުވިޔަސް، އެއީ ވެސް ހަމަ އިންސާނުން ކަމަށެވެ. ހަމަ އާންމު އިންސާނަކު ކުރާނެ އިހުސާސްތައް އެމީހުން ވެސް ކުރާނެ ކަމަށާއި ދެރަވެ ވަރުބަލިވެސް ވާނެ ކަމަށެވެ. އެކަމަކު އެއިން އެއްވެސް ކަމެއްގައި ފަހަތަށް ނުޖެހި ކެނޑިނޭޅި ކުރަމުން އައި މަސައްކަތްތަކަށް އެމީހުންނަށް ތައުރީފު ހައްގު ކަމަށެވެ.

ޓެޑްރޯސް ވިދާޅުވީ އެމީހުން ކޮށްދޭ ޚިދުމަތަށް ބަލާއިރު، އެންމެންވެސް އެމީހުންނަށް ދަރަނިވެރިވާނެ ކަމަށެވެ. އެކަމަކު އެއްވެސް ސަމާލުކަމެއް ނުދެވި ދޫކޮށްލެވިފައިވަނީ ވެސް އެމީހުން ކަމަށެވެ. އެމީހުންގެ ރައްކާތެރިކަމަށް ބެލިޔަސް، ކުރާ މަސައްކަތާ އެކަށީގެންވާނެ އުޖޫރައަކަށް ބެލިޔަސް، އިޚްތިރާމާއި ލޯތްބަށް ބެލިޔަސް، އަދި ރައްކާތެރި މަސައްކަތުގެ މާހައުލަކަށް ބެލިޔަސް މިއިން އެއްވެސް ކަމެއް ފުރިހަމަވެފައި ނުވާ ކަމަށް ވިދާޅުވިއެވެ. އަދި ވިދާޅުވީ ގިނަ މީހުން މިހާރު ތިބީ ކޮވިޑް-19 ބަލިމަޑުކަމުގެ ތެރޭގައި ރަނގަޅު ޕީޕީއީ އާއި ވެކްސިން ފަދަ ރައްކާތެރިކަމުގެ ފިޔަވަޅުތަކަށް ބޭނުންވާނެ ތަކެތި ނުލިބި އެ ނުރައްކަލުގެ ބިރު ހީވެފައި ކަމަށެވެ.

ޑަބްލިއުއެޗްއޯއިން މިހެން ބުނި އިރު ދުނިޔޭގެ އެކި ހިސާބުތަކުގައި މިހާރު ވެސް މި މައްސަލަ ވަނީ އިންތިހާއަށް ބޮޑުވެފައެވެ. ވަކިން ހާއްސަކޮށް ފަގީރު ގައުމުތަކާއި، ބޮޑެތި ގައުމުތަކުގެ ވެސް ފަގީރު ސަރަހައްދުތަކުގައި ޑޮކްޓަރުންނާއި ނަރުހުންނަށް ޕީޕީއީ ކިޓްތައް ނުލިބުމާއި، ބަލި ޖެހިފައިވާ މީހުންނަށް ފަރުވާދޭން ޖެހޭ އިރު އެއްވެސް ކަހަލަ ރައްކާތެރިކަމެއް ނުލިބޭ ކަމުގެ ޝަކުވާތައް ރިޕޯޓުކޮށްފައިވެއެވެ.