ހޫނު މޫސުމުގައި ޔުވެންޓަސްއަށް ބަދަލުވާން ޕޮގްބާ ބޭނުންވޭ: އޭޖެންޓް

މި ސީޒަން ނިމުމުން އަލުން އަނބުރާ ޔުވެންޓަސްއަށް ބަދަލުވަން މެންޗެސްޓާ ޔުނައިޓެޑަށް ކުޅެމުން އަންނަ ފަރަންސޭސްވިލާތުގެ މިޑްފީލްޑަރު ޕޯލް ޕޮގްބާ ބޭނުންވާ ކަމަށް އޭނާގެ އޭޖެންޓް މިނޯ ރައިއޯލާ ބުނެފި އެވެ.

ނިމިދިޔަ ޖެނުއަރީ ޓްރާންސްފާ ބާޒާރުގައިވެސް ޕޮގްބާ ހޯދުމަށް ގިނަ ކްލަބުތަކުން ވަނީ މަސައްކަތް ކޮށްފައެވެ. އެކަމަކު އެއްވެސް ކްލަބަކަށް ޔުނައިޓެޑާއެކު އެއްބަސްވުމަކަށް އާދެވިފައެއް ނުވެއެވެ.

ޔުނައިޓެޑާ އެކު ޕޮގްބާ ހަދާފައިވާ އެއްބަސްވުން އަންނަ އަހަރު ހަމަވާއިރު، އޭނާގެ ކުރީގެ ކްލަބު ޔުވެންޓަސްއަށް ބަދަލުވަން ޕޮގްބާ ބޭނުންވާ ކަމަށް އޭނާގެ އޭޖެންޓް ވަނީ ބުނެފައެވެ.

ޕޮގްބާގެ އޭޖެންޓް މިނޯ ރައިއޯލާ ބުނީ އިޓަލީއަކީ ޕޮގްބާ އެންމެ އުޅެން ބޭނުންވާ އެއްތަން ކަމަށާއި، މިހާރުވެސް ޔުވެންޓަސްއަށް ބަދަލުވަން އޭނާ ބޭނުންވާ ކަމަށެވެ. އެގޮތުން ހޫނު މޫސުމުގެ ޓްރާންސްފާގައި އޭނާ ޔުވެންޓަސްއަށް ބަދަލުވާނެ ކަމަށާއި، ޔުވެންޓަސްއިންވެސް ޕޮގްބާއަށް ޝައުގުވެރިވާ ކަމަށް ވަނީ ބުނެފައެވެ.

ޔުވެންޓަސްއަށް ބަދަލުވަން ޕޮގްބާ ބޭނުންވި ނަމަވެސް، ރިޕޯޓުތައް ބުނާ ގޮތުން ޔުނައިޓެޑުން އޭނާ ވިއްކަން ބޭނުންވަނީ 100 މިލިއަން ޔޫރޯއަށެވެ.

އަނިޔާއާހެދި މި ސީޒަނުގައި ޕޮގްބާ ޔުނައިޓެޑަށް ކުޅެފައިވަނީ އެންމެ ހަތް މެޗެވެ. އަދި މިހާރުވެސް އޭނާ ކުޅުމުން ދުރުގައި ހުރިއިރު، އޭނާ ކުޅެން ނިކުންނާނެ ތާރީހެއް އަދި ކަށަވަރެއް ނޫނެވެ.

ޔުނައިޓެޑުން 2010 ވަނަ އަހަރު ކެރިޔަރު ފެށި އުމުރުން 26 އަހަރުގެ ޕޮގްބާ ހިލޭ ޓްރާންސްފާއެއްގެ ދަށުން ޔުވެންޓަސްއަށް ބަދަލުވީ 2012 ވަނަ އަހަރު އެވެ. އެޓީމުގައި ހޭދަކުރި ހަތަރު ސީޒަނުގައި ޕޮގްބާ ވަނީ 178 މެޗުން 34 ލަނޑު ޖަހާފައެވެ. އޭގެ ފަހުން އަނެއްކާވެސް ޕޮގްބާ އަނބުރާ ޔުނައިޓެޑަށް ބަދަލުވީ 2016 ވަނަ އަހަރު 105 މިލިއަން ޔޫރޯ އަށެވެ. އެކަމަކު ޔުނައިޓެޑަށް ބަދަލުވުމަށްފަހު އެޓީމުގައި އޭނާއަށް އެންމެ އެދެވޭ ކުޅުމެއް ދެއްކިފައެއް ނުވެއެވެ.