އައްޑޫ ސިޓީ ކައުންސިލުން ދެމުންގެންދާ ޚިދުމަތްތައް މެދުކަނޑާލައިފި
23 މެއި 2021 | އާދީއްތަ 06:13އައްޑޫ އިކުއެޓޯރިއަލް ހޮސްޕިޓަލުން ދެމުން އަންނަ ބައެއް ޚިދުމަތްތައް ވެސް ވަނީ މެދުކަނޑާލާފައި
އައްޑޫ ސިޓީގައި ކޮވިޑްގެ ހާލަތު ގޯސްވަމުންދާތީ ކަމާގުޅޭ ފަރާތްތަކާ އެކު ބޭއްވި ބައްދަލުވުން
އައްޑޫ ސިޓީ ކައުންސިލުން ދެމުންގެންދާ ޚިދުމަތްތައް މެދުކަނޑާލައިފިއެވެ.
މިކަމާ ގުޅިގެން އައްޑޫ ސިޓީ ކައުންސިލުން ނެރުނު ނޫސްބަޔާނެއްގައި ބުނެފައިވަނީ ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 އާ ގުޅިގެން، ޞިއްހީ ގޮތުން ބަލަންޖެހޭ ކަންކަން ބެލުމަށް ހެލްތް ޕްރޮޓެކްޝަން އެޖެންސީން މި މަހުގެ 1 ވަނަ ދުވަހު އެންގި އެންގުމުން އައްޑޫ ސިޓީ މޮނިޓަރިންގ އަށް ލާފައިވާތީ އާއި މިވަގުތު އައްޑޫގައި ކޮމިއުނިޓީ ސްޕްރެޑެއް އޮތުމުން، އެންމެހާ ރައްޔިތުންގެ ސަލާމަތާއި ރައްކާތެރިކަމަށްޓަކައި އައްޑޫ ސިޓީ ކައުންސިލުން ވަކިގޮތެއް އަންގަންދެން، އައްޑޫ ސިޓީ ކައުންސިލްގެ އިދާރާއާއި އެއިދާރާގެ ދަށުން ހިނގަމުންދާ އަވަށު އޮފީސްތަކުން ދެމުންގެންދާ އެންމެހާ ޚިދުމަތްތައް ދިނުންް ވަގުތީ ގޮތުން މެދުކަނޑާލުމަށް ނިންމާފައިވާ ކަމަށެވެ. އަދި ކައުންސިލް އިދާރާއިން ދެމުންގެންދާ ޚިދުމަތްތައް ދިނުން މެދުކަނޑާލި ނަމަވެސް އައްޑޫ އެމަޖެންސީ އޮޕަރޭޝަން ސެންޓަރާއި ސޯޝަލް ސަޕޯޓް ޑެސްކްތަކުން ދެމުންގެންދާ ޚިދުމަތްތައް މެދުކެނޑުމެއް ނެތި ލިބޭނެ ކަމަށެވެ.
މީގެ އިތުރުން އާދީއްތަ ދުވަހުން ފެށިގެން ކޮވިޑް-19 އާ ގުޅިގެން އައްޑޫ އިކުއެޓޯރިއަލް ހޮސްޕިޓަލުން މެދުކަނޑާފައިވާ ޚިދުމަތްތައް ފެށެންދެން ހޮސްޕިޓަލަށް ވަދެ ނިކުތުމަށް ބޭނުންކުރާ އޯޕީޑީފަޅީގެ ދޮރާށި ބަންދުކުރެވި ހޮސްޕިޓަލަށް ވަދެ ނިކުތުމަށް ހަމައެކަނި އެމަރޖެންސީ ފަޅީގެ ދޮރާށި ބޭނުންކުރުމަށް ނިންމާފައިވާ ކަމަށް އެ ހޮސްޕިޓަލުން ވަނީ ބުނެފައެވެ.
އައްޑޫ އެމަރޖެންސީ އޮޕަރޭޝަން ސެންޓަރުން އެންމެ ފަހުން އާންމުކުރި މައުލޫމާތުތައް ދައްކާ ގޮތުން ހޮނިހިރު ދުވަހު އެ ސިޓީން އިތުރު 9 މީހަކު ވަނީ ކޮވިޑް-19ށް ޕޮޒިޓިވްވެފައެވެ. ޕޮޒިޓިވްވި 9 މީހުންގެ ތެރޭގައި ހިމެނެނީ ހިތަދޫން ޑައިރެކްޓް ކޮންޓެކްޓުންގެ ގޮތުގައި ޕޮޒިޓިވްވި 5 މީހަކާއި ރޭންޑަމް ސާންޕަލްގެ ތެރެއިން ޕޮޒިޓިވްވި މީހަކާއެކު 6 މީހުންނެވެ. ހުޅުދޫ އަވަށުން ވެސް ޑައިރެކްޓް ކޮންޓެކްޓުންގެ ގޮތުގައި 2 މީހަކު ޕޮޒިޓިވްވެފައިވާ އިރު ގަމުގައި ހޯމް ކަރަންޓީންގައި ހުރި މީހަކު ވަނީ ޕޮޒިޓިވްވެފައެވެ.
އައްޑޫ ސިޓީގައި ކޮމިއުނިޓީ ސްޕްރެޑް އޮތްކަމަށް އިއުލާންކޮށްފައިވާ އިރު، މި ފަހުން އެ ސިޓީން ވަނީ 201 މީހަކު ޕޮޒިޓިވްވެފައެވެ. މީގެ ތެރެއިން 38 މީހަކު ބަލިން ރަނގަޅުވެފައިވާ އިރު، 6 މީހަކަށް ދަނީ ހޮސްޕިޓަލުގައި އެޑްމިޓްކޮށްގެން ފަރުވާ ދެމުންނެވެ. އެކްޓިވް ކޭސްގެ ގޮތުގައި ފާހަގަ ކުރެވޭ 163 ކޭސްގެ ތެރެއިން އެންމެ ގިނަ މީހުން ހިމެނެނީ ހިތަދޫ އަވަށުގައެވެ. އެ އަވަށުގައި 92 މީހަކު އެބަތިއްބެވެ. އެގޮތުން ހުޅުދޫގައި 41 މީހުން، ފޭދޫގައި 12 މީހުން، މީދޫގައި 9 މީހުން، އަދި މަރަދޫގައި 6 މީހުންނާއި މަރަދޫ ފޭދޫގައި އެކަކު އަދި ރިސޯޓްތަކުގައި 2 މީހުނ އެކްޓިވް ކޭސްގެ ގޮތުގައި އެބަތިއްބެވެ.
އައްޑޫ އެމަރޖެންސީ އޮޕަރޭޝަން ސެންޓަރުން އާންމުކޮށްފައިވާ މައުލޫމާތުތަކަށް ބަލާ އިރު، ހޮނިހިރު ދުވަހު 189 ސާމްޕަލް ނަގާފައިވާ އިރު މިހާތަނަށް މުޅި ޖުމްލަ 3097 ސާމްޕަލް ނަގާ ޓެސްޓް ކުރެވިފައިވެއެވެ. އަދި ޑައިރެކްޓް ކޮންޓެކްޓުންގެ ގޮތުގައި 514 މީހަކު ވަނީ ފާހަގަކުރެވިފައެވެ.
