ރާއްޖެޓީވީގެ ފަލަސްތީނަށް އެހީވާން ބޭއްވި ޓެލެތޯންގައި 1.6 މިލިއަން ރުފިޔާ!
22 މެއި 2021 | ހޮނިހިރު 14:08މި ޓެލެތޯން އަށް އާންމުންގެ ވަރަށް ބޮޑު ތަރުހީބެއް ލިބިފައިވޭ
ދިވެހިން ފަލަސްތީނާއި އެކު ބޭއްވި ޓެލެތޯންގެ ތެރެއިން
އިސްރާއިލުން ފަލަސްތީނަށް ދެމުންދާ ހަމަލާތަކުގައި އެ ގައުމަށްވީ ގެއްލުމުން އަރައިގަތުމަށް، އެހީތެރިވުމަށްޓަކާ "ދިވެހިން ފަލަސްތީނާ އެކު" މި ނަމުގައި ރާއްޖެޓީވީން ކުރިއަށްގެންދިޔަ ޓެލެތޯން ކާމިޔާބުކަމާއެކު ނިންމާލައިފިއެވެ.
މިދިޔަ ހުކުރު ދުވަހު ހެނދުނު ހަޔަކުން ފެށިގެން ހޮނިހިރު ދުވަހުގެ ހަވީރު ހަތަރެއްގެ ނިޔަލަށް ކުރިއަށްގެންދިޔަ މި ޓެލެތޯންގައި އެކި ގޮތްގޮތުން ފައިސާގެ އެހީތެރިކަން ފޯރުކޮށްދިނުމަށް އާންމުންނަށް ހުޅުވާލިއިރު، މި ޓެލެތޯން މެދުވެރިކޮށް، 1،615،239.65 (އެއް މިލިއަން ހަ ލައްކަ ފަނަރަ ހާސް ދުއިސައްތަ ތިރީސް ނުވަ ރުފިޔާ ފަސްދޮޅަސް ފަސް ލާރި) ވަނީ ލިބިފައެވެ.
ރާއްޖެޓީވީގެ ޑެޕިއުޓީ ސީއޯއޯ ނާޒްމީ ސައީދު ވިދާޅުވީ މި ޓެލެތޯން އަށް އާންމުންގެ ވަރަށް ބޮޑު ތަރުހީބެއް ލިބިފައިވާ ކަމަށެވެ. އެގޮތުން 24 ގަޑި އިރަށް ކުރިއަށްގެންދަން ނިންމި ޓެލެތޯން ދިގު ދަންމާލީ ވެސް އާންމުންގެ އެދުމުގެ މަތިން ކަން ނާޒްމީ ފާހަގަކުރެއްވިއެވެ. މި ޓެލެތޯންގައި ފައިސާގެ އެހީ ވަރަށް ބޮޑަށް ލިބިފައިވާކަން ފާހަގަކުރައްވާ ވިދާޅުވީ ދެން ވެސް އޮތީ ބޮޑު ބުރަ މަސައްކަތެއް ކަމަށެވެ. އެގޮތުން ފަލަސްތީން ރައްޔިތުންނަށް އެ ފައިސާ ފޯރުކޮށްދޭނެ އިންތިޒާމުތައް ހަމަޖެއްސުމުގެ މަސައްކަތް މިހާރު ވެސް ކުރަމުން އަންނަ ކަމަށާއި ވީ އެންމެ އަވަހަކަށް އެ ފައިސާ ފޯރުކޮށްދޭނެ ކަމަށް ވިދާޅުވިއެވެ.
ނާޒް ވިދާޅުވީ ރާއްޖެ ޓީވީ އަކީ އަބަދުވެސް މިކަހަލަ ހާލަތްތަކުގައި އެހީތެރިކަން ފޯރުކޮށްދިނުމަށް އެންމެ އިސްވެ މަސައްކަތް ކުރާ އެއް ޓީމު ކަމަށެވެ. އެގޮތުން ފާއިތުވެދިޔަ ތަނުގައި ވެސް މިފަދަ ޓެލެތޯން ތަކުގެ ކާމިޔާބު ތާރީހެއް އެބައޮތް ކަމަށާއި، މި ޓެލެތޯންގައި ވެސް ރާއްޖެޓީވީގެ މުޅި ޓީމު އެކު ކުރި މަސައްކަތް ފާހަގަކޮށްލެވޭ ކަމަށެވެ. އަދި އެކި ގޮތް ގޮތުން މި މަސައްކަތަށް އެހީތެރކަން ފޯރުކޮށްދިން އެންމެނަށް ވެސް ނާޒް ވަނީ ޝުކުރު އަދާކުރައްވާފައެވެ.
މި ޓެލެތޯން މެދުވެރިކޮށް، ފަންޑު ފޮއްޓަށް ފައިސާ ލުމާއި، އެކައުންޓަށް ޖަމާކުރުމުގެ ފުރުސަތު އާންމުންނަށް ހުޅުވާލިިއިރު، ދިވެހިން ފަލަސްތީނާއި އެކު މި ލޯގޯގެ ޓީޝާޓު ވެސް ވަނީ ވިއްކާފައެވެ.
