ބްލެކް ފަންގަސް ރާއްޖެއިން އަދި ފެނިފައެއް ނުވޭ
21 މެއި 2021 | ހުކުރު 09:12ޑރ. ޝިހާމް ވިދާޅުވީ ބައްޔަށް ޝައްކު ކުރެވޭ ސާމްޕަލް އެއް ތަހުލީލުކުރުމަށް ފޮނުވާފައި ވާކަމަށް
އާރްއާރްޓީ ޓީމް ހަރަކާތްތެރިވަނީ
ނުރައްކާތެރި ފަންގަލް އިންފެކްޝަނެއް ކަމަށްވާ މިއުކޯމައިކޯސިސް ނުވަތަ ބްލެކް ފަންގަސް ރާއްޖެއިން އަދި ފެނިފައި ނުވާ ކަމަށް ހެލްތު އިމަޖެންސީ އޮޕަރޭޝަން ސެންޓަރުގެ ކްލިނިކަލް މެނޭޖްމަންޓް އެޑްވައިޒަރީ ޓީމުން ބުނެފިއެވެ.
ކޮވިޑްގެ ހާލަތު ގޯސްވެފައިވާ ބައެއް ގައުމުތަކުގައި, ޚާއްސަކޮށް އަވައްޓެރި އިންޑިއާގައި މި އިންފެކްޝަން ފެތުރެމުންދާ މި ދަނޑިވަޅުގައި, ރާއްޖޭން ވެސް އެ ބަލި ފެނިފައި ވާކަމަށް ބައެއް ފަރާތްތަކުން އަންނަނީ ބުނަމުންނެވެ.
އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި މިކަމާގުޅޭގޮތުން ކްލިނިކަލް މެނޭޖްމަންޓް އެޑްވައިޒަރީ ޓީމުގެ ފަރާތުން ޑރ. އިބްރާހިމް ޝިހާމް ވިދާޅުވީ, ބްލެކް ފަންގަސް އަކީ ދިފާއީ ނިޒާމް ބަލިކަށިވެފައި ހުންނަ މީހުންނަށް އަރާފާނެ ފަންގަސްއެއް ކަމަށެވެ. އެކަމަކު އެ ބަލި ދެނެގަނެވޭނެ ވަކި އުސޫލެއް އޮންނަ ކަމަށް ވިދާޅުވިއެވެ.
ޑރ. ޝިހާމް ވިދާޅުވީ, ބައްޔަށް ޝައްކު ކުރެވޭ ހާލަތު އަންނަ ކަމަށާއި, އެފަދަ ހާލަތެއްގައި ބައްޔަށް ބޭސްކުރުމަށްޓަކައި ބަލި ތަހުލީލު ކުރުމުގެ ކަންތައްތައް ކުރިއަށް ދާނެ ކަމަށެވެ. އަދި މިހާތަނަށް ރާއްޖެއިން މިއުކޯމައިކޯސިސްގެ ކޭސްއެއް ފެނިފައި ނުވާކަމަށް ވިދާޅުވިއެވެ.
މިއުކޯމައިކޯސިސްއަށް ކުރާނެ ބޭހެއް ރާއްޖޭގައި ނެތްކަމަށް ދެކެވޭ ވާހަކައާ ގުޅޭގޮތުން ޑރ. ޝިހާމް ވިދާޅުވީ ބައްޔަކާ ދޭތެރޭ ޝައްކުކުރެވުމާ އެއްކޮށް, އެ ބައްޔެއްގެ ބޭސް ހުރިތޯ ބަލާ މެކޭނިޒަމްތަކެއް ހުންނަ ކަމަށެވެ. އަދި ބޭސް ނެތިގެން ކަންބޮޑުވާން ޖެހޭ ހާލަތެއް މިވަގުތަކު ނެތް ކަމަށް ވިދާޅުވިއެވެ.
ޑރ. ޝިހާމް ވިދާޅުވީ ބައްޔަށް ޝައްކު ކުރެވޭ ސާމްޕަލެއް ތަހުލީލު ކުރުމަށް ފޮނުވާފައި ވާކަމަށާއި, ކުރެވޭ ޝައްކު ބޮޑު ވެއްޖެ ނަމަ ނުވަތަ ޔަގީން ވުމުން އެވާހަކަ ސީމެޓުން ހިއްސާކުރާނެ ކަމަށެވެ.
އެޗްއީއޯސީގެ ނޫސްވެރިންގެ ބައްދަލު ވުމުގައި, އާންމުންގެ މެދުގައި ކަންބޮޑުވުން އުފެދޭހެން ނުވަތަ ބަލިމީހާގެ ކަރާމާތަށް ގެއްލުމެއް ލިބޭ ފަދަ ގޮތަކަށް ކަށަވަރުނުވާ މައުލޫމާތު ނުފެތުރުމަށް ޑރ. ޝިހާމް އެދިވަޑައިގެންނެވިއެވެ. އަދި ބައްޔަކަށް ޝައްކު ކުރެވޭނަމަ އެކަން މީސްމީޑިއާ މެދުވެރިކޮށް ހިއްސާ ކުރުމުގެ ބަދަލުގައި ސިއްހީ ޚިދުމަތްދޭ ފަރާތްތަކާ ހިއްސާކުރެއްވުމަށް އިލްތިމާސްކުރެއްވިއެވެ.
