ފާހާނާގައި ފިސްތޯލަ ބޭއްވި ސިފައިންގެ މީހާ ޑިއުޓީތަކުން އެއްފަރާތް ކޮށްފި
ފިސްތޯލް ބޭއްވި ސިފައިންގެ މީހާ ވަނީ ޑިއުޓީން އެކަހެރި ކޮށްފައި
އޭޑީކޭ ހޮސްޕިޓަލް - ފިސްތޯލު ފެނުނީ އޭޑީކޭ ފާހަނައިން
ރައީސް ނަޝީދު އޭޑީކޭގައި ފަރުވާ ހޯއްދަވަން އޮންނަވަނިކޮށް، އެ ހޮސްޕިޓަލުގެ ފާޚާނާއަކުން ފިސްތޯލައެއް ބޭއްވިފައިވަނީ ސިފައެއް އަތުން ކަމަށް އެމްއެންޑިއެފުން ބުނެފިއެވެ.
މޭޖަރ އިބްރާހީމް އާޒިމް ވިދާޅުވީ، މިކަމާގުޅިގެން ސިފައިންގެ މީހާ ވަޒީފާގެ މަސްއޫލިއްޔަތު ތަކުން އެކަހެރިކޮށްފައިވާ ކަމަށެވެ. އަދި މިލިޓަރީ ޕޮލިހުން މައްސަލަބަލައި، އިތުރަށްތަހުގީގު ކުރުމަށް ފުލުހުންނަށް ފޮނުވާފައިވާ ކަމަށެވެ.
ބުރާސްފަތި ދުވަހު ބޭއްވި ޕްރެސްގައި ނޫސްވެރިއެއްގެ ސުވާލުގައި އޭޑީކޭއިން ފިސްތޯލެއް ފެނުނު މައްސަލަ މިހާރު ތަހުގީގު ގޮސްފައިވާ ހިސާބާ ބެހޭ ގޮތުން ސުވާލުކުރުމުން ފުލުހުން މިކަމާ އިންކާރެއް ނުކުރައްވައެވެ. ޗީފް ސުޕްރިންޓެންޑެންޓް އޮފް ޕޮލިސް މުހައްމަދު ބަޝީރު ވިދާޅުވީ، އެ މައްސަލައިގެ މައުލޫމާތު ފުލުހުންގެ މީޑިއާ މެދުވެރިކޮށް ހިއްސާ ކުރައްވާނެ ކަމަށެވެ.
ރައީސް ނަޝީދަށް އަމާޒުކޮށް އެމަނިކުފާނު ދިރިއުޅުއްވާ ގެކޮޅު ހިމެނޭ ސަރަހައްދުން އައިއީޑީއެއް ގޮއްވާލައިގެން ދީފައިވާ ހަމަލާއަށް މިއަދަަށް 14 ދުވަސް މިވަނީ ވެފައެވެ. މައްސަލައާ ސީދާ ގުޅުން ހުރެގެން 4 މީހަކު މިހާތަނަށް ހައްޔަރުކޮށްފައިވެއެވެ. 4 ވަނަ މީހާ ހައްޔަރުކޮށްފައިވަނީ ބުދަ ދުވަހުގެރޭ ބ. ދަރަވަންދޫއިންނެވެ. އޭނާ މިހާރުވަނީ މާލެ ގެނެސްފައެވެ. މި މައްސަލައިގައި ކުރިން ހައްޔަރުކޮށްފައިވާ 3 މީހުންގެ ބަންދަށް 15 ދުވަސް ވަނީ ޖަހާފައެވެ.
ރައީސް ނަޝީދަށް އަމާޒުކޮށްދިން ހަމަލާގެ ތަހުގީގު ނިމި ކޯޓު މަރުހަލާތައް ނިމެންދެން އެ މަރުހަލާތައް ގާތުން ބެލުމަށް ރައީސް ވަނީ ޚާއްސަ މަންދޫބެއް ވެސްް އައްޔަން ކުރައްވާފައެވެ.
