"އީސަ ހެއްކަށް ނުފޫޒު ފޯރުވާނެކަމަށް ބެލެވެން ނެތުމުން، ހައްޔަރު ކުރުމުގެ އަމުރު ނެރެވެން ނެތް"
އީސަގެ މައްޗަށް ތުހުމަތު ކުރެވޭ ކުށް އޭނާ ކުރިކަމަށް ބެލެވޭ ސަބަބުތަކެއް ހުރި
ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެމްބަރު އަހުމަދު އީސަ
ގެވެށި އަނިޔާގެ ބޮޑެތި ތުހުމަތުތަކެއް ކުރެވޭ ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެމްބަރު އަހުމަދު އީސަ ހައްޔަރުކުރުމުގެ އަމުރެއް ނެރެދެވެން ނެތްކަމަށް ކްރިމިނަލް ކޯޓުން ނިންމައިފިއެވެ.
މެމްބަރު އަހުމަދު އީސައަށް ތުހުމަތުކުރެވޭ މައްސަލައިގެ ތަހުގީގަށް އޭނާ ހައްޔަރު ކުރުމުގެ އަމުރަކަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ކްރިމިނަލް ކޯޓުގައި އެދިފައިވަނީ ބުރާސްފަތި ދުވަހުގެ ހެނދުނު 11:00 ހާއިރުއެވެ. މި މައްސަލައިގައި ކްރިމިނަލް ކޯޓުން ނިންމާފައިވަނީ މެމްބަރު އީސަ ހެއްކަށް ނުފޫޒު ފޯރުވާނެކަމަށް ބެލެވޭނެ ތަނެއް ނެތް ކަމަށެވެ. ރާއްޖެއެމްވީއަށް އެނގިފައިވާ ގޮތުގައި އެކަމުގެ ހެއްކެއް ޕީޖީ އޮފީހުންނާއި ފުލުހުންނަށްވެސް ހުށައެޅިފައި ނުވާކަމަށް ކްރިމިނަލް ކޯޓުން ވަނީ ބުނެފައެވެ.
މެމްބަރު އީސަގެ މައްޗަށް ކޮށްފައިވާ ތުހުމަތުތަކުގެ ތެރޭގައި އޭނާގެ އަނބިމީހާ އަސްރާ ނަސީމަށް ގެވެށި އަނިޔާ ކުރުމުގެ އިތުރުން، އެ ދެމީހުންގެ ދަރިފުޅު އަތުލައި، ބެލްކަނިން ވައްޓައި މަރާލާނެކަމަށް ބުނުން ހިމެނެއެވެ. އޭނާ ހައްޔަރު ކުރުމަށް ފުލުހުންނާއި ޕީޖީ އޮފީހުން އެދިފައިވަނީ ޤާނޫނު އަސާސީގައި ބަޔާންކޮށްފައިވާ ހަމަހަމަ ކަމުގެ މަފްހޫމާއި ޚިލާފަށްކަން ކްރިމިނަލް ކޯޓުން ވަނީ ބުނެފައެވެ. ސަބަބެއްގެ ގޮތުގައި ކޯޓުން ބުނެފައިވަނީ ދައުލަތުގެ ބެލުމުގެ ދަށުގައި ތިބި ކުޑަކުދިންތަކަކަށް ޖިސްމާނީ އަދި ނަފްސާނީ އަނިޔާކުރި މައްސަލައެއްގައިވެސް ތުހުމަތު ކުރެވިފައިވާ އެއްވެސް މީހަކު ހައްޔަރު ކުރުމަށް ނުވަތަ ބަންދު ކުރުމަށް އެދިފައި ނުވުމެވެ.
ކްރިމިނަލް ކޯޓުންވެސް ވަނީ އީސަގެ މައްޗަށް ތުހުމަތު ކުރެވޭ ކުށް އޭނާ ކުރިކަމަށް ބެލެވޭ ސަބަބުތަކެއް ހުރިނަމަވެސް، އޭނާ ހައްޔަރު ކުރުމުގެ އަމުރު ނެރެވޭނެ ޤާނޫނީ އެއްވެސް ބިނާއެއް ނެތްކަން ފާހަގަކޮށްފައެވެ.
