ކަރަންޓީން ނިމޭ މީހުންނަށް ޑޮކިއުމެންޓް ދޫނުކުރެވި ލަސްވާ މައްސަލަ ސަމާލުކަމަށް އައިސްފައިވާ ކަމަށް ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ)ން ބުނެފިއެވެ.
ރައީސް އޮފީހުގެ ތަރުޖަމާން މަބްރޫކް އަޒީޒް ވިދާޅުވީ ލީގަލް ޑޮކިއުމެންޓް ނުވަތަ 14 ދުވަހުގެ ކަރަންޓީން ނިމޭ މީހުންނަށް ޑޮކިއުމެންޓް ނުލިބޭ މައްސަލަ ފެންމަތިވެފައިވާ ކަމަށެވެ. އަދި ވިދާޅުވީ މި މައްސަލަ ހައްލުކުރުމަށް މަސައްކަތް ކުރަމުންދާ ކަމަށެވެ. އެގޮތުން އަންނަ ހަފުތާއަށް ދާއިރު މިމައްސަލަ މުޅިން ހައްލު ކުރެވޭނެކަމުގެ އުންމީދު އެބައޮތް ކަމަށް މަބްރޫކް ވިދާޅުވިއެވެ.
މަބްރޫކް ވިދާޅުވީ ޑޮކިއުމެންޓް ފޯރުކޮށް ނުދެވި ހަތަރުހާހަށްވުރެ ގިނަ ޑޮކިއުމެންޓް ބެކްލޮގްގައި އެބައޮތް ކަމަށެވެ. 3500 ޑޮކިއުމެންޓެއް މިދިޔަ 24 ގަޑިއިރު އަޕްލޯޑް ކުރެވިފައިވާ ކަމަށް ވެސް މަބްރޫކް ވިދާޅުވިއެވެ.
ލީގަލް ޑޮކިއުޕްމެންޓްތައް ވަގުތުން ނުލިބުން ނުވަތަ 14 ދުވަހުގެ ކަރަންޓީން އައިސޮލޭޝަން ނިންމަވާއިރު ވެސް އެޑޮކިއުމެންޓްތައް އަތަށް ނުލިބި ހުރުން. މިމައްސަލައަކީ ބޮޑު މައްސަލައެއް. އަޅުގަނޑު ކުރިން ބުނި ހެން މިމައްސަލާގައި ހައްލު ކުރުމަށް މަސައްކަތްތަކެއް ކުރެވެމުން އެބަދޭ. ނަމަވެސް އަދިވެސް ބޮޑު އަދަދެއްގެ ޑޮކިއުމެންޓް އަޅުގަނޑުމެންނަށް ފޯރުކޮށްނުދެވި ހުރިކަމަކީ އަޅުގަނޑުމެން ހަމަ ހިތާމައާއެކު ފާހަގަކުރާ ކަމެއް. ގަބޫލުކުރާ ކަމެއް . އަދި އެކަން ރަނގަޅު ކުރުމަށް މަސައްކަތް ކުރެވެމުންދޭ.ރައީސް އޮފީހުގެ ތަރުޖަމާނު މަބްރޫކް އަޒީޒް
މަބްރޫކް ވިދާޅުވީ މިމައްސަލަ ހައްލުކުރުމުގެ ގޮތުން މިހާރު ގިނަ މަސައްކަތްތައް ކުރެވެމުންދާ ކަމަށެވެ. އެގޮތުން ސިސްޓަމްތަކަށް ދިފައިވާ މައްސަލަތައް ހައްލުކުރުމުގެ މަސައްކަތާއި ކެޕޭސިޓީ އިތުރު ކުރުމުގެ މަސައްކަތް ކުރަމުންދާކަން މަބްރޫކް ފާހަގަކުރެއްވިއެވެ.
ކޮވިޑް-19ގެ ހާލަތު ގޯސްވެ ބައްޔަށް ހުށަހެޅޭ މީހުން އަދަދު އިތުރުވެފައިވާ މިދަނޑިވަޅުގައި ލީގަލް ޑޮކިއުމެންޓް ނުލިބި ލަސްވާ މައްސަލަ ވަނީ ބޮޑުވެފައެވެ. ކަރަންޓީންގައި ތިބޭ މީހުން 14 ދުވަސް ފާއިތުވެ ގިނަ ދުވަސްތަކަކަށް ކަރަންޓީނުން ދޫނުވާކަމުގެ ޝަކުވާ އާއްމު ރައްޔިތުން ކުރަމުންދެއެވެ.
