ކުރިއަށް އޮތް ޔޫރޯ ފުޓްބޯޅަ މުބާރާތަށް އެކުލަވާލާ ފްރާންސްގެ ގައުމީ ފުޓްބޯޅަ ޓީމުގެ ސްކޮޑުގައި ރެއާލް މެޑްރިޑަށް ކުޅެމުން އަންނަ ތަޖުރިބާކާރު ފޯވާޑް ކަރީމް ބެންޒެމާ ހިމަނަން ނިންމާފައިވާ ކަމަށް ރިޕޯޓުތައް ބުނެފިއެވެ.

ފްރާންސްގެ ގައުމީ ފުޓްބޯޅަ ޓީމުގެ ސްކޮޑުން ބެންޒެމާއަށް ފުރުސަތު ގެއްލުނީ 2015 ވަނަ އަހަރުއެވެ. އެފަހަރު އޭނާއަށް ސްކޮޑުން ފުރުސަތު ގެއްލުނީ އޮރިޔާންކާޑު ބޭނުންކޮށްގެން ފްރާންސްގެ މިޑްފީލްޑަރު މެތިއު ވަލްބުއޭނާއަށް ބިރުދައްކައި، ލާރި ހޯދަން މަސައްކަތްކޮށްފައިވާ ކަމަށް ތުހުމަތުކޮށް އޭނާ ހައްޔަރުކުރުމާ ގުޅިގެންނެވެ. އެކަންތައްތައް ހިނގާދިޔައިރު ބެންޒެމާ އާއި ވަލްބުއޭނާ އަކީ ބްރެޒިލުގައި 2014 ވަނަ އަހަރު ކުރިއަށްދިޔަ ފީފާ ވޯލްޑް ކަޕުގައި ކުޅުނު ފްރާންސް ޓީމުގެ ދެ ކުޅުންތެރިންނެވެ. އެކަމަކު މި މައްސަލަ ފެންމަތިވުމަށްފަހު 2015 ވަނަ އަހަރުގެ ފަހުން އެ ކުޅުންތެރިންނަށް ފްރާންސް ސްކޮޑުން ފުރުސަތު ދީފައެއް ނުވެއެވެ.

ރިޕޯޓުތައް ބުނާ ގޮތުން އަންނަ މަހު ފަށާ ޔޫރޯއަށް ފްރާންސުން އެކުލަވާ ސްކޮޑުގައި އުމުރުން 33 އަހަރުގެ ބެންޒެމާ ހިމަނާނެއެވެ. މި ފަހަރުގެ ޔޫރޯގައި ފްރާންސް ވާދަކުރާއިރު، އެ ގައުމު އޮތީ ގްރޫޕް އެފްގައެވެ. އެ ގްރޫޕުގައި ދެން ހިމެނޭ ގައުމުތަކަކީ ހަންގޭރީ، ޕޯޗުގަލް އަދި ޖަރުމަނެވެ.

މެދުކެނޑުމަކަށްފަހު ބެންޒެމާ ފްރާންސްގެ ސްކޮޑަށް ނަގާއިރު، އޭނާގެ މައްސަލައިގެ އަޑުއެހުންތައް މިހާރު ވަނީ މި އަހަރުގެ އޮކްޓޯބަރު މަހަށް ތާވަލުކޮށްފައެވެ. ބެންޒެމާ އާއި އަންހެނަކު ގުޅިގެން ވަލްބުއޭނާގެ ވީޑިއޯއެއް ބޭނުންކޮށްގެން އޭނާއަށް ބިރުދައްކައި، ލާރި ހޯދަން މަސައްކަތްކުރި ކަމަށް ތުހުމަތުކޮށް 2015 ވަނަ އަހަރު ބެންޒެމާ ހައްޔަރުކުރި ނަމަވެސް، ރަސްމީ ހައިސިއްޔަތަކުން އެ މައްސަލަ މީގެ ކުރިން ބަލާފައެއް ނުވެއެވެ. ބެންޒެމާގެ އިތުރުން ހަތަރު މީހަކަށް މި މައްސަލައިގެ ތުހުމަތުކުރެވޭއިރު، މި މައްސަލަ ސާބިތުވެއްޖެނަމަ، ބެންޒެމާއަށް ފަސް އަހަރުގެ ޖަލު ހުކުމެއް އައުން ގާތް ކަމަށް ރިޕޯޓުތައް ބުނެއެވެ.

މި މައްސަލައިގައި ބެންޒެމާއަށް މިހާތަނަށް ގައުމީ ޓީމުން ފުރުސަތު ލިބިފައިނުވާއިރު، އޭނާ ވަނީ މީގެ ކުރިން ފްރާންސްގެ ގައުމީ ފުޓްބޯޅަ ޓީމަށް 81 މެޗު ކުޅެދީ 27 ލަނޑު ޖަހާފައެވެ.