ކޮވިޑު ޖެހިގެން އިތުރު ދިވެއްސަކު ނިޔާވެ، އަދަދު 102ށް
ނިޔާވެފައިވަނީ އުމުރުން 74 އަހަރުގެ ދިވެހި ފިރިހެނެއް
އައިޖީއެމްއެޗް ހޮސްޕިޓަލް- އޭނާ އައިޖީއެމްއެޗްގެ އިމަރޖެންސީ ރޫމަށް ގެނެސްފައިވަނިކޮށް ނިޔާވެފައިވަނީ ހޯމަ ދުވަހުގެ ރޭގަނޑު 10:00 ގައި
ރާއްޖެއިން ކޮވިޑް ޖެހިގެން އިތުރު ދިވެއްސަކު ނިޔާވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ، ނިޔާވެފައިވަނީ އުމުރުން 74 އަހަރުގެ ދިވެހި ފިރިހެނެއް ކަމަށެވެ. އޭނާ އައިޖީއެމްއެޗްގެ އިމަރޖެންސީ ރޫމަށް ގެނެސްފައިވަނިކޮށް ނިޔާވެފައިވަނީ ހޯމަ ދުވަހުގެ ރޭގަނޑު 10:00 ގައި ކަމަށް އެޗްޕީއޭއިން މައުލޫމާތު ދެއެވެ. އެއީ ރާއްޖެއިން ކޮވިޑް-19 ޖެހިގެން ނިޔާވި 102 ވަނަ މީހާއެވެ.
ހޯމަ ދުވަހު ހުޅުމާލެ މެޑިކަލް ފެސިލިޓީގައި ފަރުވާ ހޯދަމުންދިޔަ އުމުރުން 70 އަހަރުގެ އަހަރުގެ ދިވެހި އަންހެނަކުވެސް ވަނީ ނިޔާވެފައެވެ. އެ މީހާ ނިޔާވީ ހޯމަ ދުވަހުގެ އިރުއޮއްސި 6:00ހާއިރު ކަމަށް އެޗްޕީއޭއިން ބުނެއެވެ. އޭނާއަކީ ރާއްޖޭން ކޮވިޑް ޖެހިގެން ނިޔާވި 101 ވަނަ މީހާއެވެ.
މީގެ އިތުރުން ހޯމަ ދުވަހު ޑީއެޗް-11 ގައި ފަރުވާހޯދަމުންދިޔަ އުމުރުން 56 އަހަރުގެ ދިވެހި އަންހެނެއް ވެސް ވަނީ ނިޔާވެފައެވެ. އޭނާ ނިޔާވެފައި ވަނީ ހޯމަ ދުވަހުގެ ފަތިހު 04:41 ގައި ކަމަށް އެޗްޕީއޭއިން ބުނެއެވެ. މިއީ ރާއްޖެއިން ނިޔާވި 100 ވަނަ މީހާއެވެ.
ރާއްޖެއިން މިހާރަކަށް އައިސް ޕޮޒިޓިވްވަމުންދާ އަދަދުތައް އުޅެނީ ހާހަކުން މަތީގައެވެ. މި ބަލީގައި މަރުވާ މީހުންގެ އަދަދުވެސް ވަނީ ބޮޑުތަނުން އިތުރުވެފައެވެ.
