ޗައިނާއަށް ދިއުމުގެ ކުރިން ދުބާއީގައި ގައުމީ ޓީމު ކޭމްޕްކުރަނީ

ކުރިއަށް އޮތް ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަން މެޗުތައް ކުޅުމަށް ޗައިނާއަށް ދިއުމުގެ ކުރިން، ދުބާއީގައި ގައުމީ ފުޓްބޯޅަ ޓީމު ކޭމްޕްކުރަން މަޝްވަރާ ކުރަމުން އަންނަ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

ކޮލިފައިންގައި ރާއްޖެ ހިމެނޭ ގްރޫޕް އޭގެ ބާކީ ހުރި މެޗުތައް މި މަހުގެ 30 ވަނަ ދުވަހުން ފެށިގެން އަންނަ ޖޫން މަހުގެ 15 ވަނަ ދުވަހުގެ ނިޔަލަށް ޗައިނާގައި ކުޅެން ވަނީ ތާވަލުކޮށްފައެވެ. އެހެންކަމުން ޗައިނާއަށް ފުރުމުގެ ކުރިން 33 ކުޅުންތެރިންގެ ޕްރިލިމިނަރީ ސްކޮޑެއް މީގެ ކުރިން އެކުލަވާލިއިރު، މިދިޔަ ބުރާސްފަތި ދުވަހުގެ ވަގުތެއްގައި ގައުމީ ޓީމުގެ ކުޅުންތެރިންނާއި އޮފިޝަލުން ވަނީ ހޮޓެލް ޖެންގައި ކޭމްޕްކޮށްފައެވެ.

ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަވަމުން އެފްއޭއެމުގެ ރައީސް ބައްސާމް ވިދާޅުވީ ގައުމީ ޓީމުގެ ކޯޗު މާޓިން ކޫޕްމަންގެ އެންމެ ބޮޑު ޝަކުވާއަކީ ދަނޑުގައި ތަމްރީނުތައް ނުހެދުން ކަމަށާއި، އެކަމަކު މިހާރު ހާލަތު އޮތް ގޮތުން ރާއްޖޭގައި ތަމްރީނުތައް ހެދެން ނެތް ކަމަށެވެ. އަދި ކޮލިފައިން މެޗުތަކާ ކުރިމަތިލާން ޖެހެނީ ވަރަށް ދަތި އުނދަގޫ ހާލަތެއްގައި ކަމަށާއި، އެކަމަކު 2023 ވަނަ އަހަރުގެ އޭޝިއަން ކަޕަށް ކޮލިފައިވުމަކީ އަދިވެސް ކަނޑައަޅާފައިވާ ވަރަށް ބޮޑު އަމާޒެއް ކަމަށެވެ.

ބައްސާމް ވިދާޅުވީ ރާއްޖެއަށް ބާކީ އޮތް ތިން މެޗުވެސް ތާވަލުކޮށްފައި އޮތީ އަންނަ ޖޫން މަހުގެ ފުރަތަމަ 10 ދުވަހުގެ ތެރޭގައި ކަމަށާއި، އެހެންކަމުން އެ މެޗުތަކަށް ތައްޔާރުވުމުގެ ގޮތުން ދުބާއީގައި ޓީމު ކޭމްޕްކުރުމަށް މަޝްވަރާކުރަމުން އަންނަ ކަމަށެވެ. އެގޮތުން އަންނަ ބުދަ ނުވަތަ ބުރާސްފަތި ދުވަހު ދުބާއީއަށް ފުރުމަށް މަސައްކަތް ކުރަމުން އަންނަ ކަމަށާއި، ޗައިނާއަށް ދާނީ ދުބާއީގައި ގާތްގަނޑަކަށް 10 ދުވަހު ތަމްރީނުތައް ހެދުމަށްފަހު ކަމަށްވެސް ވިދާޅުވިއެވެ. އެކަމަކު ދުބާއީގައި ކުރިއަށްދާ ތަމްރީނުތަކުގައި އެކުވެރިކަމުގެ މެޗެއް ކުޅުމަށް ތާވަލުކޮށްފައިނުވާ ކަމަށާއި، ބޭނުމަކީ 10 ދުވަސް ވަންދެން ދަނޑުގައި ރަނގަޅު ތަމްރީނުތަކެއް ހެދުން ކަމަށްވެސް ބައްސާމް ވަނީ ވިދާޅުވެފައެވެ.

ދުބާއީއަށް ފުރުމަށް ގައުމީ ޓީމުން މަސައްކަތްކުރަމުން އަންނައިރު، ޖެންގައި ގައުމީ ޓީމުން އަންނަނީ ފިޒިކަލް ތަމްރީނުތައް ހަދަމުންނެވެ. ޗައިނާއަށް ފުރުމުގެ ކުރިން 33 ކުޅުންތެރިންގެ ޕްރިލިމިނަރީ ސްކޮޑެއް މިހާރު އެކުލަވާލާފައިވާއިރު، ދުބާއީ އާއި ޗައިނާއަށް ދާނީ 25 ކުޅުންތެރިންގެ ސްކޮޑެއް ކަމަށް ބައްސާމް ވަނީ ވިދާޅުވެފައެވެ.

ކޮވިޑާ ގުޅިގެން ކޮލިފައިން މެޗުތައް ޗައިނާގައި ކުޅޭއިރު، ރާއްޖެއަށް ބާކީ ތިން މެޗު އެބައޮތެވެ. އެއީ ޗައިނާ އާއި، ސީރިއާ އަދި ފިލިޕީންސާ ދެކޮޅަށް ކުޅެން އޮތް މެޗުތަކެވެ. މީގެ ތެރެއިން ސީރިއާ މެޗަކީ ރާއްޖޭގެ ހޯމް މެޗެކެވެ.

އޭޝިއަން ކަޕަށް ކޮލިފައިވުމަށް ރާއްޖެއިން އަމާޒުހިފާފައިވާއިރު، ކޮލިފައިންގައި ރާއްޖެ އޮތީ ހަތަރު މެޗުން ހަ ޕޮއިންޓާއެކު ގްރޫޕުގެ ހަތަރުވަނައިގައެވެ. ގްރޫޕުގެ އެއްވަނައިގައި އޮތީ ފަސް މެޗުން 15 ޕޮއިންޓާއެކު ސީރިއާއެވެ. ހަތަރު މެޗުން ހަތް ޕޮއިންޓާއެކު ދެވަނައިގައި ޗައިނާ އޮތްއިރު، ތިންވަނައިގައި އޮތީ ފަސް މެޗުން ހަތް ޕޮއިންޓް ހޯދާފައިވާ ފިލިޕީންސެވެ. އަދި ރާއްޖޭގެ ފަހަތުން ފަސްވަނައިގައި އޮތީ ފަސް މެޗު ކުޅެގެން އަދި ޕޮއިންޓެއް ލިބިފައިނުވާ ގުއާމެވެ.