ގާޒާގައި ހުންނަ ދިވެހިި ރެސްޓޯރަންޓަށް އިސްރާއީލުން ބޮންއަޅައިފި

އިސްރާއީލުން ގާޒާއަށް ދެމުން ގެންދާ އުދުވާނީ ހަމަލާތަކުގައި ގާޒާގައި ހުންނަ ދިވެހި ރެސްޓޯރަންޓަށް ބޮންއަޅައި ގޮއްވާލައިފިއެވެ.

ގުދުސް ނިއުސް ނެޓްވޯކުން މިކަން ކަށަވަރު ކޮށްދީފައިވާއިރު ރެސްޓޯރަންޓް ގޮއްވާލައިފައި މިވަނީ އޯއައިސީގެ ބައްދަލުވުމުގައި ރާއްޖޭގެ ޚާރިޖީ ވަޒީރު އަބްދުﷲ ޝާހިދު އިސްރާއީލުގެ ލާއިންސާނީ އަމަލުތައް ކުށްވެރި ކުރައްވާފައި ވަނިކޮށެވެ.

ގާޒާގެ ދިވެހި ރެސްޓޯރަންޓަކީ މެޑިޓެރޭނިއަން ކަނޑުގެ އައްސޭރިިން ގާޒާގެ ގޮނޑުދޮށާ ގާތުގައި ހަދާފައިވާ ރެސްޓޯރަންޓެކެވެ. ވަރަށް އާދައިގެ ގޮތަކަށް ހަދާފައިވާ މިތަނަށް އިސްރާއީލުގެ ޖެޓުތަކުން ބޮންއަޅައި ގޮއްވާލަން ޖެހުނު ސަބަބާމެދު އިސްރާއީލުން އެއްވެސް އެއްޗެއް ބުނެފައެއް ނުވެއެވެ.

އިޒްރޭލުގެ އިންސާނީ އަމަލުތައް ކުށްވެރިކުރައްވައި ވާހަކަފުޅު ފައްޓަވަމުން ޚާރިޖީ ވަޒީރު އަބްދުﷲ ޝާހިދު ވަނީ ބަރަކާތްތެރި ރަމަޟާން މަހު މުސްލިމުން އަމާންކަންމަތީ ރޭ އަޅުކަންކުރަން ތިއްބާ އަގްސާ މިސްކިތަށް އަމާޒުކޮށް އަދި އޭގެ ފަހުން އެކި ފަހަރުމަތިން ގުދުސްގެ އެހެނިހެން ތަންތަނަށް އަމާޒުކޮށް ދެމުންގެންދާ ހަމަލާތައް ހަރުކަށި އިބާރާތުން ކުށްވެރިކުރައްވާ ކަމުގައެވެ.

މިނިސްޓަރ ޝާހިދު ވިދާޅުވީ އިސްރާއީލުން ހުޅަނގުގެ އައްސޭރީގެ އިތުރު ބިންތަކަށް ވެރިވުމަކީ ސަރަހައްދީ ހަމަޖެހުން ނަގާލުމަށް ސިލްސިލާކޮށް ކުރަމުންދާ މަސައްކަތުގެ ބައެއް ކަމަށެވެ. ހިފާފައިވާ ހުޅަނގު އައްސޭރީގެ ބިންތަކަކީ އިސްރާއީލުގެ އަމިއްލަ ބިންކަމުގައި ކަނޑައެޅުމަކީ ދިވެހިރާއްޖެއިން ވަރަށް ހަރުކަށިކޮށް ކުށްވެރިކުރާ އަދި އެކަމާ ދެކޮޅު ހަދާ ކަމެއްކަމަށް މިނިސްޓަރ ވިދާޅުވިއެވެ. އިރުމަތީ ގުދުސްގައި ޔަހޫދީން އާބާދުކުރުމުގެ މަޝްރޫއުގެ ތެރެއިން ޝެއިޚު ޖައްރާގައި ދިރިއުޅޭ ފަލަސްތީނު ރައްޔިތުން އެމީހުންގެ ގެދޮރުން ގަދަބާރުން ނެރެލުމަކީ އެއްވެސް ހާލެއްގައި ބަލައިގަނެވޭނެކަމެއް ނޫންކަމަށް ވެސް ވިދާޅުވިއެވެ.