ނެޓްބޯޅަ އެސޯސިއޭޝަން އޮފް މޯލްޑިވްސް އިން އިންތިޒާމުކޮށްގެން ކުރިއަށް ގެންދާ އިންޓަރސްކޫލް ނެޓްބޯޅަ މުބާރާތާއި، އިންޓަރކޮލެޖް/ޔުނިވާރސިޓީ 2017 ގައި ބައިވެރިވުމުގެ ފުރުސަތު ހުޅުވާލައިފިއެވެ.

ނެޓްބޯޅަ އެސޯސިއޭޝަން އޮފް މޯލްޑިވްސްއިން ކޮށްފައިވާ އިއުލާނެއްގައި ބުނެފައިވަނީ، މުބާރާތުގައި ބައިވެރިވުމުގެ ފުރުސަތު ކޮންމެ ސްކޫލަކަށްވެސް ހުޅުވާލެވިފައިވާ ކަމަށާ، ބައިވެރިވާން އެދޭ ސްކޫލްތަކުން 15 ޖޫން 2017 ވަނަ ދުވަހުގެ 14:00 ގެ ކުރިން އެ އެސޯސިއޭޝަނުގެ މެއިލްއަށް، އެ ސްކޫލަކުން ބައިވެރިވާން އެދޭ އުމުރުފުރާތަކާއި ފޯކަލް ޕޮއިންޓް އެންގޭނެ ގޮތަށް ލިއުމަކުން ހުޝައެޅުމަށް އެދޭ ކަމަށެވެ.

އަންނަ ޖުލައި މަހުގެ 5 ވަނަ ދުވަހު މި މުބާރާތް ފެށުމަށް ހަމަޖެހިފައި ވާއިރު، މުބާރާތުގައި 4 އުމުރުފުރާއަކުން ޓީމްތަށް ބައިވެރި ކުރެވޭނެއެވެ. އެއީ 12 އަހަރުން ދަށް، 14 އަހަރުން ދަށް، 16 އަހަރުން ދަށް، އަދި 19 އަހަރުން ދަށުގެ އުމުރުފުރާއެވެ. މި 4 އުމުރުރާއިންވެސް އަންހެން އަދި ފިރިހެން ކުދިންނަށް ބައިވެރި ވެވޭނެކަމަށްވެސް އެސޯސިއޭޝަނުން މައުލޫމާތު ދެއެވެ.

އިންޓަރސްކޫލް މުބާރާތުގެ އިތުރުން އިންޓަރކޮލެޖް/ޔުނިވާރސިޓީ ނެޓްބޯޅަ މުބާރާތުގައި ބައިވެރިވުމުގެ ފުރުސަތުވެސް އެއެސޯސިއޭޝަނުން ވަނީ ހުޅުވާލާފައެވެ.

މިކަމާ ގުޅިގެން އެ އެސޯސިއޭޝަނުން ކޮށްފައިވާ އިއުލާނުގައި ވަނީ މި މުބާރާތުގައި ބައިވެރިވާން އެދޭ ކޮލެތް ތަކާއި ޔުނިވާރސިޓީތަކުން، 20 ޖޫން 2017 ވަނަ ދުވަހުގެ 14:00 ގެ ކުރިން ބައިވެރިވާން ބޭނުންވާ ޑިވިޝަން އަދި ފޯކަލް ޕޮއިންޓް އެންގޭނެ ގޮތަށް ލިއުމަކުން އެ އެސޯސިއޭޝަންގެ މެއިލްއަށް ހުޝައެޅުން އެދޭ ކަމަށެވެ.

މި މުބާރާތުގައި ހިމެނެނީ އަންހެން ޑިވިޝަން އަދި ފިރިހެން ޑިވިޝަނެވެ. މި މުބާރާތް ބޭއްވުމަށް ހަމަޖެހިފައިވަނީ 15 ޖުލައި 2017 ގައެވެ.