ކީޕަރު އެލިސަން ފަހު ވަގުތު ލިވަޕޫލް މޮޅުކޮށްދީފި

އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ ފަހު ވަގުތުގައި ގޯލްކީޕަރު އެލިސަން ބެކާ ޖަހައިން ލަނޑުން ރެލިގޭޓްވެފައިވާ ވެސްޓް ބްރޮމްވިޗް އެލްބިއަން ބަލިކޮށް ލިވަޕޫލުން ގަދަ ހަތަރެއްގެ އުއްމީދު އާކޮށްފިއެވެ.

ރަށުން ބޭރުގައި ކުޅުނު މެޗުން ލިވަޕޫލް މޮޅުވީ ފަހަތުން އަރައި 2-1 ގެ ނަތީޖާއަކުންނެވެ.

މި މެޗު ލިވަޕޫލުން ޑޮމިނޭޓުކޮށްގެން ކުޅުނު ނަމަވެސް، މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ވެސްޓް ބްރޮމުންނެވެ. މެޗުގެ 15 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ހަލް ރޮބްސަން-ކާނޫއެވެ. އެކަމަކު އޭގެ ފަހުން ލިވަޕޫލުން ކުޅުން ރަނގަޅުކުރިއިރު، ފުރަތަމަ ހާފުގައި ލިވަޕޫލުގެ ސަޑިއޯ މާނޭއަށް ވަނީ އޭރިއާ ތެރެއިން ހުސް ފުރުސަތެއް ލިބި ބޭކާރުވެފައެވެ.

އެކަމަކު މެޗުގެ 33 ވަނަ މިނެޓުގައި އޭރިއާ ބޭރުން ފޮނުވާލި ހަމަލާއަކުން މުހައްމަދު ސަލާހު ވަނީ ލިވަޕޫލަށް ނަތީޖާ އެއްވަރުކޮށްދީފައެވެ. އަދި އޭގެ އިރުކޮޅެއް ފަހުން ލިވަޕޫލުގެ ރޮބާޓޯ ފިރްމީނޯއަށް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ އަމާޒުވީ ގޯލުގެ ދަނޑިއަށެވެ.

މި މެޗުގެ ދެވަނަ ހާފުގައި ވެސްޓް ބްރޮމުގެ ކައިލް ބާޓްލީލަނޑެއް ޖެހި ނަމަބެސް، ލިވަޕޫލުގެ ގޯލްކީޕަރު އެލިސަންއަށް ވެސްޓް ބްރޮމުގެ މެޓް ފިލިޕްސް ހުރަސް އެޅި ކަމަށް ނިންމައި ވީޑިއޯ އެސިސްޓަންޓް ރެފުރީ (ވީއޭއާރް) އިން އެ ލަނޑު ބަލައިގެންފައެއް ނުވެއެވެ.

މި މެޗު އެއްވަރުވާން ދަނިކޮށް މެޗުން ލިވަޕޫލް މޮޅުވީ އިތުރު ވަގުތުގެ ފަހު މިނެޓުގައި ލިވަޕޫލުގެ އެންޑީ ރޮބަޓްސަން ނަގައިދިން ކޯނަރަކުން އެލިސަން ބޮލުން ކާމިޔާބުކުރި ލަނޑުންނެވެ. މިއީ މި ސީޒަނުގައި ގޯލްކީޕަރެއް ކާމިޔާބުކުރި ފުރަތަމަ ލަނޑެވެ. އަދި މިއީ ލިވަޕޫލުގެ ދިގު ތާރީޚުގައި އެ ޓީމުގެ ގޯލްކީޕަރަކު މެޗެއްގައި ލަނޑު ޖެހި ފުރަތަމަ ފަހަރެވެ.

މި މޮޅާ އެކު ވަނީ ގަދަ ހަތަރަކާ ޕޮއިންޓަކާ ގާތަށް ލިވަޕޫލް ޖެހިލިއިރު، ތާވަލުގެ ފަސްވަނައިގައި އެ ޓީމު އޮތީ ކުޅުނު 36 މެޗުން 63 ޕޮއިންޓާއެކުއެވެ. ތާވަލުގެ ހަތަރުވަނައިގައި އޮތް ޗެލްސީއަށް 36 މެޗުން 64 ޕޮއިންޓް ލިބިފައިވާއިރު، ތިންވަނައިގައި އޮތް ލެސްޓާއަށް 36 މެޗުން ވަނީ 66 ޕޮއިންޓް ލިބިފައެވެ.