ކޯޑު ކުރުމުގައި ދިވެހި ކުޑަކުދިން މުޅިން އާ ހަރުފަތަކަށް!

ސައިންސާއި ޓެކްނޮލޮޖީއަށް ކުޑަކުދިން އަހުލުވެރިކުރުމުގެ ގޮތުން އުގައިލް ފައުންޑޭޝަނާއި ހައުސިން ޑެވެލޮޕްމަންޓް ކޯޕަރޭޝަން (އެޗް.ޑީ.ސީ) އާ ގުޅިގެން އިނގިރޭސި ވިލާތުގެ ޓީޗަރުން މެދުވެރިކޮށް "ދަ ސަރކްލް" ގެ ނަމުގައި އޮންލައިންކޮށް ކުރިއަށް ގެންދާ ހާއްސަ ޕްރޮގްރާމުތަކުގެ ތެރެއިން ދިވެހި ދަރިވަރުންތަކެއް ދަނީ ކޮމްޕިއުޓަރ ކޯޑިންގެ ފަންނީ ހުނަރުތައް ތަފާތު ގޮތްގޮތަށް ދައްކަމުންނެވެ.

އެގޮތުން މި އަހަރުގެ ކުޑަ އީދަށް ހާއްސަކޮށް މިކުދިން ވަނީ މައިންބަފައިންނާއި އާއިލާ މީހުންނަށް ފޮނުވަން އެކުދިން އަމިއްލައަށް ކޯޑުކޮށް އީ ކާޑުތަކެއް ތައްޔާރުކޮށްފައެވެ. އެޗްޑީސީން މައުލޫމާތުދޭ ގޮތުގައި މި ކާޑު ތައްޔާރުކުރުމުގައި އެކުދިން ވަނީ ޒަމާނީ ވެބްސައިޓް ހަދަން ބޭނުންކުރާ ކޯޑިންގެ ބައިތަކުގެ އިތުރުން ކާޑުގައި އީދާ ގުޅޭ މިއުޒިކު ހިމަނާފައެވެ. ރާއްޖޭގެ އެކި ކަންކޮޅުތަކުން މިޕްރޮގްރާމު ފުރިހަމަކުރަމުން ގެންދާ އެތައް ސަތޭކަ ކުދިން، އެކުދިންގެ ވިސްނުމާއި ފިކުރު އަދި އަމިއްލަވަންތަކަން އެކުދިންގެ އީކާޑުތައް ޑިޒައިންކޮށް ކޯޑު ކުރުމަގައި ވަރަށް ބޮޑަށް ބޭނުން ކޮށްފައިވާކަމަށް އެޗްޑިސީން ބުނެއެވެ.

މި އަހަރުގެ ޖެނުއަރީ މަހުން ފެށިގެން "ދަ ސާރކަލް ބައި އުގައިލް ފައުންޑޭޝަން" ގެ ނަމުގައި އުގައިލް ފައުންޑޭޝަނާއި އެޗް.ޑީ.ސީ އިން ގުޅިގެން އޮންލައިންކޮށް ކިޔަވައިދެމުންގެންދާ މި ޕްރޮގްރާމުގައި ކިޔަވައިދެނީ ރާއްޖެއާއި އިނގިރޭސިވިލާތުގެ ތަޖުރިބާކާރުންނެވެ. މި ޕްރޮގްރާމްގައި ބައިވެރިވެ އުމުރުން 8 އަހަރާއި 15 އަހަރާ ދެމެދުގެ އެތައް ސަތޭކަ ދިވެހި ކުޑަކުދިން ދަނީ ކޯޑުކޮށް ވެބްސައިޓް ހެދުމާއި، ގޭމް ތައްޔާރުކުރުމުގެ އުކުޅުތައް ދަސްކުރަމުންނެވެ.

މި ޕްރޮގްރާމާ ބެހޭގޮތުން އުގައިލް ފައުންޑޭޝަންގެ ރައީސް ޕްރޮފެސަރ ޑރ. ހަސަން އުގައިލް ވަނީ މިފާއިތުވި ތިން މަސްދުވަހުގެ ތެރޭގައި އެ ކުދިންނަށް ވަރަށް ގިނަ ކަންކަން މި ޕްރޮގްރާމުން ދަސްވެފައިވާކަމަށް ގަބޫލުކުރައްވާ ކަމަށް ވިދާޅުވެފައެވެ.

ޕްރޮފެސަރ އުގައިލް ވަނީ ޕްރޮގްރާމުގައި ބައިވެރިވާ އުމުރުން 13 އަހަރުގެ ކުއްޖަކު އަމިއްލައަށް ކޯޑުކޮށް ތައްޔާރުކޮށް ފޮނުވާފައިވާ އީކާޑެއް އަމިއްލަ ސޯޝަލް މީޑިއާގައި ހިއްސާކޮށްފައެވެ.

މި ޕްރޮގްރާމުގައި ހަވާލުކުރެވޭ ހުރިހާ މަސައްކަތެއް ވެސް ދަރިވަރުން ޝައުގުވެރިކަމާ އެކު ފުރިހަމަ ކުރާއިރު، ކޯޑުކުރުމުގެ އިތުރުން ކަންކަމުގައި ވިސްނުންގެންގުޅެންވީ ގޮތް ދަސްވެގެންދާކަމަށް ޕްރޮގްރާމުގެ ދަރިވަރުން ފާހަގަކުރެއެވެ. މިކުދިންގެ މައިންބަފައިން ބުނާގޮތުން މި ޕްރޮގްރާމުގައި ދެވޭ މަސައްކަތްތައް އެކުދިން ޝައުގުވެރިކަމާ އެކު އެކުދިން އަމިއްލައަށް ކޮށް ނިންމާލައެވެ.

"ދަ ސާރކަލް" ގެ ހަރަކާތްތަކުގެ ތެރޭގައި ހިމެނޭ ކޯޑިން އެންޑް ކްރިޓިކަލް ތިންކިން އަދި "ލީޑަރސް އޮފް ޓުމޯރޯ" މިއީ އެޗް.ޑީ.ސީގެ އިޖްތިމާއީ ޒިންމާގެ ތެރެއިން އުގައިލް ފައުންޑޭޝަނާ އެކު ކުރިއަށްގެންދާ ހާއްސަ ހަރަކާތެކެވެ. މި ހަރަކާތުގެ އިތުރުން އެޗް.ޑީ.ސީ އިން ވަނީ އުގައިލް ފައުންޑޭޝަނާއި ގުޅިގެން "ދަ ސާރކަލް ސްޕޭސް"ގެ ނަމުގައި ހުޅުމާލޭގައި ލައިބްރަރީއެއް ހުޅުވާފައެވެ.