ލެސްޓާއިން ފުރަތަމަ ފަހަރަށް އެފްއޭ ކަޕް ކާމިޔާބުކޮށްފި

ފައިނަލް މެޗުގައި ޗެލްސީ ބަލިކޮށް އިނގިރޭސި އެފްއޭ ކަޕުގެ ޗެމްޕިއަންކަން ފުރަތަމަ ފަހަރަށް ލެސްޓާ ސިޓީން ހޯދައިފިއެވެ.

ހޮނިހިރު ދުވަހުގެރޭ ކުޅުނު ފައިނަލް މެޗުން ލެސްޓާ މޮޅުވީ 1-0 ގެ ނަތީޖާއަކުންނެވެ. މި މޮޅާއެކު ލެސްޓާއިން ފުރަތަމަ ފަހަރަށް އެފްއޭ ކަޕް ކާމިޔާބުކުރިއިރު، މި ފަހަރުގެ ފައިނަލަކީ 1969 ވަނަ އަހަރަށްފަހު މި މުބާރާތުގެ ފައިނަލުގައި ލެސްޓާ ވާދަކުރި ފުރަތަމަ ފަހަރެވެ.

އެފްއޭ ކަޕުގެ ފައިނަލް މެޗު ވެމްބްލީ ސްޓޭޑިއަމުގައި ކުޅުނުއިރު، މި މެޗު ބަލަން 21،000 ސަޕޯޓަރުން ވަނީ ދަނޑަށް ވައްދާފައެވެ. އެހެންކަމުން މިއީ ކޮވިޑް-19 ގެ ލޮކްޑައުނަށްފަހު އިންގްލެންޑުގައި މެޗެއް ބަލަން އެންމެ ގިނަ އަދަދެއްގެ ސަޕޯޓަރުން ވެއްދި ފުރަތަމަ މެޗެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ދެ ޓީމަށްވެސް ރަނގަޅު ފުރުސަތުތަކެއް ލިބިގެންދިޔަ ނަމަވެސް، މި ހާފުގައި ލަނޑެއް ފެނިފައެއް ނުވެއެވެ. އެއަށްފަހު މެޗުގެ ދެވަނަ ހާފު ފަށައިގެން ލެސްޓާއިން މޮޅު ކުޅުމެއް ދެއްކިއިރު، މެޗުގެ 63 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. އޭރިއާ ބޭރުން ފޮނުވާލި ބާރު ހަމަލާއަކުން މި ލަނޑު ލެސްޓާއަށް ކާމިޔާބުކޮށްދިނީ ޔޫރީ ޓިއެލެމަންސްއެވެ.

އޭގެ ފަހުން ނަތީޖާ އެއްވަރުކުރަން ޗެލްސީން ގިނަ މަސައްކަތްތަކެއް ކުރިއިރު، އެ ޓީމުގެ ބެން ޗިލްވެލް އާއި މޭސަން މައުންޓް ފޮނުވާލި ނުރައްކާތެރި ހަމަލާތައް ލެސްޓާގެ ގޯލްކީޕަރު ޕީޓާ ޝްމައިކަލް ވަނީ ދިފާއުކޮށްފައެވެ. އަދި މެޗު ނިމެން މިނެޓަކަށް ވެފައި ވަނިކޮށް ލެސްޓާގެ ވެސް މޯގަން އަތުން ބައިކޮޅަށް ލަނޑެއް ވަން ނަމަވެސް، އޭގެ ކުރިން ޗެލްސީގެ ޗިލްވެލް އޮފްސައިޑުގައި ހުރުމުން ވީޑިއޯ އިސްޓަންޓް ރެފުރީ (ވީއޭއާރް) އިން އެ ލަނޑު ބަލައިގެންފައެއް ނުވެއެވެ.

މި ފަހަރުގެ އެފްއޭ ކަޕުގެ ފައިނަލުން ޗެލްސީ ބަލިވިއިރު، އެ ޓީމުން ވަނީ މިދިޔަ އަހަރުގެ ފައިނަލުގައިވެސް ވާދަކޮށްފައެވެ. މިދިޔަ އަހަރުގެ ފައިނަލުން ޗެލްސީ ބަލިވީ އާސެނަލް އަތުން 2-1 ގެ ނަތީޖާއަކުންނެވެ.