މުޒާހަރާގެ ތެރެއިން އެއްވެސް ކުށެއް ނެތި ހައްޔަރު ކުރުކޮށްގެން ގެންދާ މީހުންގެ ބަންދުގެ މުއްދަތު އިތުރުކުރަމުން ގެންދަނީ ފަނޑިޔާރުގެ އަށް ސިޔާސީ ގޮތުން ނުފޫޒު ފޯރުވައިގެން ބިރުދައްކަން ކަަމަށް ގަލޮޅު ދެކުނު ދާއިރާގެ މަޖިލިސް މެންބަރު މީކާއީލް އަހްމަދު ނަސީމް ވިދާޅުވެއްޖެއެވެ.

އެމްޑީޕީގެ ޕީޖީ ގުރޫޕްގެ ފަރާތުން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މީކާއިލް ވިދާޅުވީ، ޝަރީއަތް ނިމެންދެން ބަންދުގައި ބެހެއްޓުން ހުއްޓުވުމަކަށް ގެނައުމަކީ ރައީސް ޑރ މުހައްމަދު މުއިއްޒުގެ ސަރުކާރުގެ އެންމެ ބޮޑު އެއް ރިޔާސީ ވައުދު ކަމަށެވެ. އެހެން ނަމަވެސް ވެރިކަމަށް ވަޑައިގަތުމަށް ފަހު ފެނިގެން ދަނީ އެ ވައުދާއި މުޅިން ޚިލާފަށް އަމަލުކުރަމުން ގެންދާތަން ކަމަށް މީކާއިލް ވިދާޅުވި އެވެ.

މީކާއިލް ވިދާޅުވީ ރައީސް މުއިއްޒު ވެވަޑައިގެންނެވި ވައުދާއި ޚިލާފަށް ޖުޑިޝަލް ސާވިސް ކޮމިޝަނާއި ފަނޑިޔާރުގެ ބޭނުން ކުރައްވައިގެން ރައްޔިތުންނަށް ބިރު ދެއްކުމުގެ ބޭނުމުގައި ހައްޔަރުކުރެވޭ މީހުންގެ ބަންދުގެ މުއްދަތު އިތުރު ކުރަމުންދާ ކަމީ ވަރަށް ބޮޑު ކަންބޮޑުވުމެއް ކަމަށެވެ.

އޮކްޓޫބަރު 3 ވަނަ ދުވަހުގެ ރޭ އެމްޑީޕީގެ ބޮޑު މުޒާހަރާގެ ތެރެއިން ހައްޔަރު ކުރި ފަރާތްތަކަށް ބަންދުގެ މުއްދަތު 15 ދުވަސް ޖަހާފައިވާކަން ފާހަގަ ކުރައްވައި މީކާއިލް ވިދާޅުވީ އޭޕްރިލް 18، ގައި ހ. ފެންޓެނޯއީ ގޭގެ ނުވަ ވަނަ ފަންގިފިލާއިން ހ. މިޓާޒް ގޭގެ ފުރާޅު މައްޗަށް ހައްވާ ޔުމްނު ރަޝީދު ވައްޓާލާފައިވާ ހާދިސާ އާއި ގުޅިގެން ފުލުހުންނަށް ދޮގު ބަޔާން ދީގެންނާއި އަދި އޭނާ މަރުވާން ދޫކޮށްލާފައިވާ ކަމަށް ތުހުމަތު ކުރެވޭ މީހާގެ ބަންދުގެ މުއްދަތަށް ޖަހާފައި ވަނީ އެންމެ ތިން ދުވަސް ކަމަށެވެ.

އެހެން ކަމުން މިފަދަ ބޮޑެތި ތަފާތުކުރުން ތަކުން ވެސް ފެނިގެން ދަނީ ސިޔާސީ ގޮތުން ފަނޑިޔާރު ގެއަށް ސިޔާސީ ނުފޫޒު ފޯރުވައިގެން ނެރެފައިވާ ހުކުމްތަކެއް ކަމަށް ފެންނަން އެބަ އޮތް ކަމަށް މީކާއީލް ވިދާޅުވި އެވެ.

މީކާއިލް ވަނީ މުޒާހަރާއާ ގުޅިގެން ހައްޔަރުކޮށްފައިވާ އެންމެހާ ފަރާތްތައް ވަގުތުން މިނިވަން ކޮށް އެ ފަރާތްތަކަށް ބޭނުންވާ ބޭސްފަރުވާގެ ޚިދުމަތް ފޯރުކޮށް ދިނުމަށް ރައީސް މުއިއްޒުގެ ސަރުކާރަށް ގޮވާލާފަ އެވެ.