އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގެ ސަބަބުން، އިސްރާއީލާ ދެކޮޅަށް ފިޔަވަޅު އެޅުމުގެ އުންމީދު ކުޑަ ވެއްޖެ ކަމަށް، ޔޫރަޕިއަން ޔޫނިއަންގެ ޚާރިޖީ ސިޔާސަތާ ބެހޭ އިސްވެރިޔާ ކާޖާ ކަލާސް ވިދާޅުވެއްޖެ އެވެ.

ކާޖާ ކަލާސް މިހެން ވިދާޅުވެފައި ވަނީ، ޣައްޒާގައި އިސްރާއީލް އިން ހިންގަމުން އަންނަ ހަނގުރާމައާ ގުޅިގެން، އިސްރާއީލްއާ ދެކޮޅަށް ފިޔަވަޅު އެޅުމަށް ޔޫރަޕިއަން ޔޫނިއަންގެ މެމްބަރު ޤައުމު ތަކުގެ މެދުގައި އެއްބަސްވުމަކަށް އާދެވިފައި ނެތުމުންނެވެ.

ޑެންމާކުގައި ކުރިއަށް ގެންދިޔަ ޔޫރަޕިއަން ޔޫނިއަންގެ ޚާރިޖީ ވަޒީރުންގެ ބައްދަލުވުމުގައި ވާހަކަ ދައްކަވަކަމުން ކާޖާ ކަލާސް ވިދާޅުވީ، މިހާރު ކުރިއަށް ގެންދެވޭ ބައްދަލުވުންތަކާއި، މަޝްވަރާ ތަކުން އެއްވެސް ނިންމުމަކާ ހަމައަށް ވާސިލުނުވެވޭނެކަން އެނގިވަޑައިގަންނަވާ ކަމަށެވެ. އަދި އެކަމުން ދައްކުވައިދެނީ ޔޫރަޕިއަން ޔޫނިއަންގެ މެމްބަރު ޤައުމުތައް ބައިބައިވެފައިވާ މިންވަރު ކަމަށް އޭނާ ވިދާޅުވެފައިވެ އެވެ.

އިސްރާއީލް އިން ޣައްޒާގައި ކުރިއަށް ގެންދަމުން އަންނަ ހަނގުރާމައިގެ ސަބަބުން، ޔޫރަޕިއަން ޔޫނިއަންގެ މެމްބަރު ޤައުމު ތަކުގެ މެދުގައި ދެބަސްވުން އުފެދިފައިވުމުގެ ސަބަބުން، ޣައްޒާގެ އިންސާނީ ޙާލަތު ގޯސްވަމުންދާއިރު ވެސް އެކަށީގެންވާ ފިޔަވަޅުތަކެއް އެޅުމަށް 27 މެމްބަރުންގެ ޔޫރަޕިއަން ޔޫނިއަން އަށް ވަނީ ދަތިވެފަ އެވެ.

ޑެންމާކުގެ ޚާރިޖީ ވަޒީރު ލާސް ލޮކެ ރަސްމުސެން ވިދާޅުވެފައި ވަނީ، އެ މައްސަލައިގައި ވާހަކަ ދައްކަމުން އަންނައިރު، އެ ވާހަކައިގެ ބަސްތައް އަމަލަށް ބަދަލުވާން ޖެހޭ ކަމަށެވެ. އަދި އިސްރާއީލާ އެކު ވިޔަފާރީގެ ގުޅުން މަޑު ކަނޑާލުމަށާއި، އިސްރާއީލްގެ ހަރުކަށި ވަޒީރުންނާ ދެކޮޅަށް ފިޔަވަޅު އެޅުމަށް ޑެންމާކުން ތާއީދު ކުރާ ކަމަށް ވެސް ވިދާޅުވި އެވެ.

މީގެ ދެ އަހަރެއްހާ ދުވަސް ކުރިން، 2023 ވަނަ އަހަރުގެ އޮކްޓޫބަރު މަހު ހަމާސް އިން އިސްރާއީލް އަށް ދިން ހަމަލާގައި 1219 މީހުން މަރުވެފައިވާއިރު، ހަމާސް އިން ވަނީ އިސްރާއީލްގެ ގިނަ އަދަދެއްގެ ރައްޔިތުން ރަހީނު ވެސް ކޮށްފަ އެވެ. އޭގެ ތެރެއިން ގިނަ ބަޔަކު ދޫކޮށްލާފައިވާއިރު، އަދި ވެސް ހަމާސްގެ ބެލުމުގެ ދަށުގައި ރަހީނުން އެބަ ތިއްބެވެ.

އޭގެ ފަހުން އިސްރާއީލް އިން ޣައްޒާ އަށް ހަމަލާތައް ދޭން ފަށައި ފެށި ހަނގުރާމައިގައި، 63،025 މީހުން ޝަހީދުވެފައިވާއިރު، އެތައް ހާސް ބަޔަކަށް ވަނީ އެކި ވަރުގެ ޒަޚަމުތައް ލިބިފަ އެވެ. ޣައްޒާގެ ރައްޔިތުންނަށް ބޭނުންވާ އިންސާނީ އެހީ އާއި، ކާބޯ ތަކެތި ފޯރުކޮށްދިނުމަށް އިސްރާއީލް އިން ދަތި ކޮށްފައިވާއިރު، އދ އިން ވަނީ ޣައްޒާގައި ބަނޑުހައި ހޫނު ކަމުގެ ޙާލަތު ވެސް އިއުލާން ކޮށްފަ އެވެ.