މައުލޫމާތު ހޯދާ ލިބިގަތުމުގެ ހައްގުގެ ގާނޫނޫގެ ދަށުން މައުލޫމާތެއް ހޯދުމަށް އޮޑިޓަރ ޖެނެރަލް ގެ އޮފީހަށް ހުށަހަޅާފައިވާ ހުށަހެޅުމަކާ ގުޅޭ ގޮތުން އާންމު ފަރާތަކުން ކުރި ޝަކުވާއެއް އިންފޮމޭޝަން ކޮމިޝަނަރުގެ އޮފީހުން ބެލިއިރު، އޮޑިޓަރ ޖެނެރަލް ގެ އޮފީސް ގާނޫނާ ޚިލާފް ވެފައިވާކަން ހާމަ ވެއްޖެއެވެ.

ޝަކުވާ ބެލުމަށް އިންފޮމޭޝަން ކޮމިޝަރ އޮފީހުން ނޮވެމްބަރ 25، 2024 ގައި ބޭއްވި ބައްދަލުވުމުގައި އިންފޮމޭޝަން ކޮމިޝަނަރ ވިދާޅުވީ، މައުލޫމާތު ހޯދުމަށް އެދި ހުށަހެޅީ 7 އޮކްޓޯބަރު 2024 ގައި ކަމަށާއި އޮޑިޓަރ ޖެނެރަލް އޮފީހުން 2 ނޮވެމްބަރުގައި ޖަވާބެއް ދީފައިވާ ކަމަށާއި، އެހެން ނަމަވެސް އެ ޖަވާބު ދީފައިވަނީ ގާނޫނުގައި ކަނޑައަޅާފައިވާ މުއްދަތު ފާއިތުވި ފަހުން ކަމުގައެވެ.

މުއްދަތު ހަމަވި ފަހުން ދިން ޖަވާބާ މެދު ހިތްހަމަ ނުޖެހިގެން 3 ނޮވެމްބަރުގައި މައްސަލަ ހުށަހެޅި ފަރާތުން ވަނީ އިންފޮމޭޝަން ކޮމިޝަނަރަށް ޝަކުވާ ހުށަހަޅާފައެވެ. އެ ފަރާތުން ބުނެފައިވަނީ ޖަވާބު ދިން އިރު ޖަވާބުގައި އޮތީ ސުވާލު އެއް ބަޔަށް ޖަވާބު ދީފައި ކަމަށެވެ.

ފަހި ޔޫނިއަން އިން ހުށަހެޅި މައްސަލަ އާ ގުޅިގެން އޮތް ބައްދަލުވުމުގައި އިންފޮމޭޝަން ކޮމިޝަނަރ ވިދާޅުވީ، ގާނޫނުގައި ބުނަނީ 21 ދުވަހުގެ ތެރޭގައި ހުށަހެޅޭ ހުށަހެޅުމަށް ޖަވާބު ދޭން ވާނެ ކަމުގައެވެ.

ކޮމިޝަނަރ ވިދާޅުވީ، ޚާއްސަ ހާލަތެއް މެދުވެރިވެއްޖެ ނަމަ ސަބަބު ބަޔާންކޮށް އެކަން އަންގާ، ޖަވާބު ދިނުމަށް 14 ދުވަސް އިތުރު ކުރެވިދާނެ ކަމަށް ގާނޫނުގައި އޮންނަ ކަމަށެވެ.

އިންފޮމޭޝަން ކޮމިޝަނަރ ވިދާޅުވީ، އޮޑިޓަރ ޖެނެރަލް ގެ އޮފީހުން ހުށަހެޅުމަށް ޖަވާބު ދީފައިވަނީ 26 ދުވަސް ފަހުން ކަމަށާއި "އެހެން ކަމުން 21 ދުވަހުގެ މުއްދަތު މި ވަނީ ފަހަނަ އަޅާފައި؛" ކަމަށެވެ.

އޮޑިޓް އޮފީހުން ގާނޫނު ގައި ބުނާ މުއްދަތު ފަހަނަ އަޅާ ދިޔައިރު މުއްދަތު އިތުރު ކުރުމަށް އެދިފައި ނެތް ކަންވެސް އިންފޮމޭޝަން ކޮމިޝަނަރ ފާހަގަ ކުރެއްވިއެވެ.

މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ 11 ވަނަ މާއްދާގެ (ށ) ގައި ބުނަނީ މައުލޫމާތު ހޯދުމަށް މީހަކު ހުށަހަޅާތާ 21 ދުވަހުގެ ތެރޭގައި އެ ހުށަހެޅުމަކާ ގުޅޭ ގޮތުން އެއްވެސް އެންގުމެއް ހުށަހެޅި ފަރާތައް އަންގާފައި ނުވާނަމަ ދައުލަތުގެ އިދާރާއަކުން އެ މައުލޫމާތު ދޫނުކުރީ ކަމަށް ބެލެވިދާނެ ކަމަށެވެ.

ފަހި ޔޫނިއަން އިން އޮޑިޓަރ ޖެނެރަލް އޮފީހުގައި ސާފު ކުރަން އެދިފައިވަނީ، ގެދޮރުވެރިޔާ ސްކީމް ދަށުން އިއުލާނު ކުރި 4000 ފްލެޓް ދޫކުރުން އެންޓި ކަރަޕްޝަން ކޮމިޝަނުން ހުއްޓުވި ފަހުން އޮޑިޓަރ ޖެނެރަލް އޮފީހުން ހައުސިންގ މިނިސްޓްރީ އަށް އެއްވެސް ގާނޫނީ ލަފައެއް ދީފައިވާނެތޯ އަދި އެފަދަ ލަފައެއް ދީފައި ވާނަމަ އެ ލަފަޔަކީ ކޮބާތޯ އެވެ.

މި ސުވާލަށް މުއްދަތު ހަމަވި ފަހުން، 2 ނޮވެމްބަރުގައި އޮޑިޓަރ ޖެނެރަލް އޮފީހުން ދިން ޖަވާބުގައި ބުނެފައިވަނީ ގެދޮރުވެރިޔާ ސްކީމް ގެ ދަށުން ސަރުކާރުން އިއުލާނު ކުރި 4000 ފްލެޓް އާ ގުޅޭ ގޮތުން ހައުސިންގ މިނިސްޓްރީން އޮޑިޓަރ ޖެނެރަލް އޮފީހަށް ފޮނުވި ސިޓީއެއް ގައި އެ ސްކީމް އާ ބެހޭ ގޮތުން ހުށަހެޅި ކަރުދާހުގައި ހިމަނާފައިވާ ކަންކަމާ ގުޅޭ ގޮތުން އޮޑިޓަރ ޖެނެރަލްގެ އޮފީހުން ދެކޭ ގޮތް ހޯދުމަށް އެދިވަޑައިގަންފައިވާތީވެ އެކަމާ މެދު އޮޑިޓަރ ޖެނެރަލްގެ އޮފީހުން ދެކޭ ގޮތް ވާނީ ހައުސިންގ މިނިސްޓްރީގައި ސިޓީ އަކުން ދަންނަވާފައި ކަމަށެވެ.

އާންމުކޮށް އޮޑިޓަރ ޖެނެރަލް ގެ އޮފީހުން ދެކޭ ގޮތް ހާމަކޮށް ފޮނުވާ ލިޔުންތަކަކީ ތަހުގީގީ އިދާރާ ނޫން އެހެން ފަރާތްތަކާ ހިއްސާ ކުރާ މައުލޫމާތެއް ނޫން ކަމަށާއި އެހެން ކަމުން އެ މައުލޫމާތު ހައުސިންގ މިނިސްޓްރީން ހޯދުމަށް އޮޑިޓަރ ޖެނެރަލް އޮފީހުން ބުނެފައިވެއެވެ.

އިންފޮމޭޝަން ކޮމިޝަނަރ އާހިދް ރަޝީދު ފާހަގަ ކުރެއްވީ ގާނޫނުގެ 9 ވަނަ މާއްދާގެ (ހ) ގައި ބުނާ ގޮތުން އެ އިދާރާގައި މައުލޫމާތު ހުއްޓަސް އެ މައުލޫމާތެއް ދިނުން އެންމެ އެކަށީގެން ވަނީ އެހެން އިދާރާ އަކުން ނަމަ، ބަދަލު ކުރެވޭ އިދާރާގެ އިއުތިރާޒެއް ނެތް ނަމަ އެކަން އެގޮތައް ކަނޑައެޅިދާނެ ކަމަށެވެ. ނަމަވެސް މައުލޫމާތައް އެދި ހުށަހަޅާތާ 7 ދުވަހުގެ ތެރޭގައި އެކަން ކުރަންވާނެ ކަމަށެވެ.

"މި މާއްދާ އާ އެއްގޮތަކަށް ނޫން އިދާރާ (އޮޑިޓަރ ޖެނެރަލް އޮފީސް) އިން ކަންތައް ކުރެއްވިފައިވަނީ،" ކޮމިޝަނަރ ވިދާޅުވިއެވެ.

އޮޑިޓަރ ޖެނެރަލް އޮފީހުން ވަނީ އެކަމަށް މާފަށް އެދިފައެވެ.

"އަޅުގަނޑުމެންނަށް ވެސް ގާނޫނުގައި އޮތް ގޮތައް ނޫން ގޮތަކަށް ކަމެއް ކުރެވިފައި އޮވެއްޖެއްޔާ އެކަން އޮންނާނީ އެގޮތަށް، އެއީ ބަދަލު ނުކުރެވޭނެ ހަގީގަތެއް،" އޮޑިޓަރ ޖެނެރަލް އޮފީހުގެ ލީގަލް ކައުންސެލް މުހައްމަދު ނަސީމް ވިދާޅުވިއެވެ.

"އެއީ އަޅުގަނޑުމެންގެ އަތްދަށުން ގޮސްފައި އޮތް ކަމަކަށް ވާނީ"

ގާނޫނާ ޚިލާފަށް ހިނގާފައި އޮތް ކަމެއް ވިއްޔާ ކުރިއަށް އޮތްތާ އެކަން ޖެހޭނީ ރަނގަޅު ކުރަން ކަމަށްވެސް ނަސީމް ވިދާޅުވިއެވެ.

ފުރަތަމަ ޖަވާބު އޮޑިޓް އޮފީހުން ދިނީވެސް ގާނޫނޫގައި ކަނޑައެޅިފައިވާ މުއްދަތައް ވުރެ ފަހުން ކަމަށް ވާތީ އެކަމަށްވެސް އޮޑިޓް އޮފީހުން ވަނީ މާފަށް އެދިފައެވެ.

ހައުސިން މިނިސްޓްރީ އަށް ދިން ލަފާ ހާމަ ނުކުރަން ނިންމީ މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ކޮން އިސްތިސްނާ ހާލެއްގެ ތެރެއިން ކަމެއް ވެސް އޮޑިޓާރ ޖެނެރަލް އޮފީހަށް ބުނެދެވިފައި ނުވާ ކަމަށް ކޮމިޝަނަރ ވިދާޅުވިއެވެ.

ފަހި ޔޫނިއަން އިން ފާހަގަ ކުރި ގޮތުގައި 4000 ފްލެޓް ހައްގުވެރިންނަށް ފްލެޓް ހަވާލު ނުކުރުމަށް ކުރެވުނުހާ މަސައްކަތެއް ހައުސިންގ މިނިސްޓްރީ އާ އެހެން މުއައްސަސާ ތަކުން ކުރަމުންދާ ކަމަށެވެ.

އޮޑިޓަރ ޖެނެރަލް އޮފީހުން ލަފައެއް ހޯދުން އެއީ އޭގެ ތެރެއިން އިތުރުވި ބޮޅެއް ކަމަށް ޔޫނިއަން އިން ބައްދަލުވުމުގައި ބުންޏެވެ.

ޔޫނިއަން އިން ބުނީ އޮޑިޓަރ ޖެނެރަލްގެ އޮފީހުން ލަފަޔަކަށް އެދިގެން ލަފައެއް ދިން ކަން އެނގޭ ކަމަށާއި އެ ލަފަޔަކީ ކޮން އެއްޗެއް ކަމެއް ސާފު ނުވާ ކަމަށެވެ.

މައުލޫމާތު ފޯރުކޮށް ނުދިން ސަބަބު ގާނޫނުގެ ތެރެއިން ސާފު ކޮށްދެއްވާ ލިޔުމުން އެކަން އިންފޮމޭޝަން ކޮމިޝަނަރ އޮފީހަށް އަންގަން ބައްދަލުވުމުގައި ކޮމިޝަނަރ ވަނީ އޮޑިޓަރ ޖެނެރަލްގެ އޮފީހަށް އަންގަވާފައެވެ.

މައްސަލައިގެ އިތުރު ބައްދަލުވުމެއް ޑިސެމްބަރު 1 ށް ވަނީ ތާވަލު ކޮށްފައެވެ.