ލުބުނާނުގެ ސިއްހީ ވުޒާރާއިން ބުނި ގޮތުގައި، ދެކުނު ލުބުނާނުގައި ހުރި ފަލަސްތީނުގެ ރެފިއުޖީ ކޭމްޕެއްގެ ކައިރީގައި އިޒްރޭލުން ދިން ހަމަލާއެއްގައި މަދުވެގެން 13 މީހުން މަރުވެއްޖެ އެވެ.

އިޒްރޭލު ސިފައިންގެ ބާރުތަކުން ބުނީ ފަލަސްތީނުގެ ހަމާސްގެ މެމްބަރުން "އައިން އަލް-ހިލްވެހް ސަރަހައްދުގައި ތަމްރީނު ކޮމްޕައުންޑެއްގައި އޮޕަރޭޓް ކުރަމުން" ދިޔަ ކަމަށާއި، އެ ތަން ހަމާސްއިން އިޒްރޭލަށް ދޭން ހަމަލާތައް ރާވައި ހިންގުމަށް ބޭނުންކުރި ކަމަށެވެ. ހަމާސްއިން މިކަން ދޮގުކޮށް "ހަދާފައިވާ ދޮގު ވާހަކަތަކެއް" ކަމަށް ބުނެއެވެ.

އީރާނުން ތާއީދު ކުރާ ހިޒްބުﷲ އާ ދެމެދު ހިނގި ހަނގުރާމަ ނިންމުމަށް ހަދާފައިވާ އެއްބަސްވުމަކަށް ފަހު އިޒްރޭލުން ލުބުނާނުގައި މީހުންނާއި ތަންތަނަށް ގަވާއިދުން ވައިގެ ހަމަލާތައް ދެމުން އައިސްފައިވެ އެވެ. ގިނަ ހަމަލާތައް ހިޒްބުﷲ އަށް ދީފައިވާއިރު، އިޒްރޭލުން އެ ގައުމުގައި ހަމާސްއަށް ވެސް ހަމަލާ ދީފައިވެ އެވެ.

ލުބުނާނުގެ ސިއްހީ ވުޒާރާއިން ބުނީ މި ހަމަލާގައި މަދުވެގެން 4 މީހުން ޒަހަމްވެފައިވާ ކަމަށެވެ. ފޮޓޯތަކުން ފެންނަނީ ލުބުނާނުގައި އޮންނަ އެންމެ ބޮޑު ފަލަސްތީނުގެ ރެފިއުޖީ ކޭމްޕް ކަމަށްވާ އައިން އަލް-ހިލްވެހް އަށް ވަންނަ ތަނުގައި އިމަޖެންސީ މުވައްޒަފުން ތިބި މަންޒަރެވެ. އޮންލައިންގައި ހިއްސާކުރި ވީޑިއޯތަކުން ފެނުނީ ހަމަލާދިން ތަނުން ދުމުގެ ބޮޑު ވިލާގަނޑެއް އުފެދެމުން ދިޔަ އިރު، ކޭމްޕްގެ އެކި ހިސާބުތަކުގައި އެމްބިއުލާންސްތައް ދުއްވަމުން ދިޔަ މަންޒަރެވެ. ފުރަތަމަ ރިޕޯޓްތަކުން ބުނީ މި ހަމަލާ ދިނީ މިސްކިތެއްގެ ބޭރުގައި އޮންނަ ސަރަހައްދަކަށް ކަމަށާއި، އެއީ އާންމުކޮށް ރޭގަނޑު ވަރަށް ގިނަ މީހުން އުޅޭ ސަރަހައްދެއް ކަމަށެވެ.

މި ހަމަލާ އާއި ގުޅޭހޮތުން ހަމާސްއިން ބުނީ "ލުބުނާނުގައި އޮންނަ ފަލަސްތީނުގެ ކޭމްޕްތަކުގައި އެއްވެސް ސިފައިންގެ އިންސްޓޮލޭޝަނެއް" ނެތް ކަމަށާއި، ހަމަލާދިން ތަނަކީ ކުޅިވަރު ދަނޑެއް ކަމަށެވެ. އައިޑީއެފްގެ ބަޔާނުގައި ބުނީ "ހަމަލާ ދިނުމުގެ ކުރިން، އާންމުންނަށް ގެއްލުން ލިބޭ ފުރުސަތު މަދުކުރުމަށް ފިޔަވަޅުތައް އަޅާފައިވާއިރު، އޭގެ ތެރޭގައި ޕްރިސިޝަން ހަތިޔާރު ބޭނުންކުރުން، ވައިގެ އިން ބަލައި ބެލުން، އަދި އިތުރު އިންޓެލިޖެންސް މައުލޫމާތު ހިމެނޭ" ކަމަށެވެ.

އިޒްރޭލާއި ހިޒްބުﷲ އާ ދެމެދު ހިނގި ހަނގުރާމަ ބޮޑުވެގެން ދިޔައީ 2023 އޮކްޓޯބަރު 7 ގެ ދެވަނަ ދުވަހު ލުބުނާނުގެ ގުރޫޕުން އިޒްރޭލުގެ އަމާޒުތަކަށް ރޮކެޓް ހަމަލާތައް ދިނުމަށް ފަހުއެވެ. ހިޒްބުﷲ އިން ބުނީ ގާޒާގައި ތިބި ފަލަސްތީނުންނާ އެކުވެރިކަމުގައި އެކަން ކުރަމުން ދާ ކަމަށެވެ. އިޒްރޭލާއި ހިޒްބުﷲ އާ ދެމެދު 13 މަސް ދުވަހުގެ ހަނގުރާމައެއް ހިނގައި، 2024 އޮކްޓޯބަރުގައި ދެކުނު ލުބުނާނަށް އިޒްރޭލުން ދިން ބޮޑު ބޮމުގެ ހަމަލާތަކާއި އެއްގަމުން ވަދެގެން ދިން ހަމަލާތަކުން އެ ހަނގުރާމަ އެންމެ ބޮޑު ހިސާބަށް ދިޔަ އެވެ.

ލުބުނާނުގެ އޮތޯރިޓީތަކުން ބުނީ އިޒްރޭލުގެ ހަމަލާތަކުގައި އެތަނުގައި ގާތްގަނޑަކަށް 4،000 މީހުން މަރުވެފައިވާ ކަމަށާއި - އޭގެ ތެރޭގައި ގިނައީ އާންމުން ކަމަށާއި އަދި 1.2 މިލިއަނަށް ވުރެ ގިނަ މީހުން ދިރިއުޅޭ ތަންތަން ދޫކޮށް ދާން މަޖުބޫރުވެފައިވާ ކަމަށެވެ. އިޒްރޭލުގެ އޮތޯރިޓީތަކުން ބުނީ މި ހަނގުރާމައިގައި އެގައުމުގެ 80 އަށް ވުރެ ގިނަ ސިފައިންނާއި 47 އާންމުން މަރުވެފައިވާ ކަމަށެވެ.