އާދިއްތަ ދުވަހު ދެކުނު ލުބުނާނުގައި ހުރި އިޒްރޭލުގެ 6 ޓޭންކަކަށް ހަމަލާދީ ސުންނާފަތިކޮށްލައިފި ކަމަށް ހިޒްބުﷲ އިން ބުނެފިއެވެ.

ހަމަލާއަށްފަހު، ހިޒްބުﷲ އިން ނެރުނު ބަޔާނުގައި އިތުރަށް ބުނެފައިވަނީ، ބައްޔާދާގެ އިރުމަތީ އައްސޭރިފަށް ކައިރިން އިސްރާއީލުގެ 5 ޓޭންކަށް ހަމަލާދީ ސުންނާފަތިކޮށްލާފައިވާ ކަމުގައެވެ. ހިޒްބުﷲ އިން ބުނެފައިވަނީ ހަމަލާދިން ގިނަ ޓޭންކުތަކަކީ ދެކުނު ލުބުނާނުގެ ކަނޑުގެ އައްސޭރިފަށުގެ ރަށެއްގެ ކައިރީގައި ހުރި ޓޭންކުތަކެއް ކަމަށެވެ.

އެހެން ބަޔާނެއްގައި ހިޒްބުﷲ އިން ބުނެފައިވަނީ، ދީރު މީމާސް ސަރަހައްދުގައި އޮތް އިޒްރޭލުގެ މެރްކަވާ ޓޭންކަކަށް ހަމަލާދީފި ކަމަށެވެ. މި ސަރަހައްދަކީ، އާދިއްތަ ދުވަހު އިޒްރޭލު ސިފައިންނަށް ރޮކެޓް ހަމަލާ ދިން ކަމަށް ހިޒްބުﷲއިން ބުނި ސަރަހައްދެވެ.

ލުބުނާނުގެ ސަރުކާރުގެ ނޭޝަނަލް ނިއުސް އޭޖެންސީ (އެންއެންއޭ) އިން ބުނެފައިވަނީ، ދެކުނު ލުބުނާނުގެ އެކި ސަރަހައްދުތަކުގައި ވަރުގަދަ ހަމަލާތައް ބަދަލުކުރެވެމުން ދާކަމަށާއި، ގާތްގަނޑަކަށް މީގެ ދެ މަހެއްހާ ދުވަސް ކުރިން ކުޑަކޮށް ފެށުނު ހަނގުރާމަ ފުޅާވެ، ފުރިހަމަ ހަނގުރާމައަކަށް ބަދަލުވެފައިވާ ކަމަށެވެ.

އެންއެންއޭ އިން އިތުރަށް ރިޕޯޓުކޮށްފައިވާ ގޮތުގައި، ހިޒްބުﷲގެ ހަމަލާއަށްފަހު މެޑިޓަރޭނިއަން ކަނޑުގެ އައްސޭރިފަށުގައިވާ ބައްޔާދާ ކިޔާ ރަށާ 10 ކިލޯމީޓަރު (6 މޭލު) ދުރުނޫން ހިސާބެއްގައި، އޮތް އިޒްރޭލު ސިފައިންގެ 30 އުޅަނދުގެ ފައުޖު ފަހަތަށް ޖެހެމުންދާ ކަމަށެވެ.

ލުބުނާނުގައި، މިހާތަނަށް އިޒްރޭލުގެ ހަމަލާތަކުގައި މަދުވެގެން 3،670 މީހުން މަރުވެ، 15،413 މީހުން ޒަޚަމްވެފައިވެއެވެ.