އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގެ ޙާލަތާ މެދު، ޔޫރަޕިއަން ޔޫނިއަންގެ ވަޒީރުންގެ މެދުގައި ދެބަސްވުންތަކާ ކުރިމަތިލާން ޖެހިއްޖެ އެވެ.

ޔޫރަޕިއަން ޔޫނިއަންގެ އިންސާނީ އެހީގެ އިސްވެރިޔާ ގޮވާލައްވާފައި ވަނީ، ބްލޮކްގެ އަގުތަކާއި، އުސޫލުތައް ދައްކުވައިދޭ ވަރުގަދަ އަޑެއް އުފުލުމަށެވެ. އެ ގޮވާލުމާ އެކު، ހޮނިހިރު ދުވަހު ކޮޕަންހޭގަންގައި ބޭއްވޭ ބައްދަލުވުމުގައި ޣައްޒާ ހަނގުރާމައާ ގުޅޭ ގޮތުން މެމްބަރު ޤައުމު ތަކުގެ މެދުގައި އުފެދިފައިވާ ތަފާތުވުންތަކާ ކުރިމަތިލާން ޖެހޭނެ އެވެ.

ޔޫރަޕިއަން ޔޫނިއަންގެ 27 މެމްބަރު ޤައުމު ތަކުގެ ޚާރިޖީ ވަޒީރުން މަޝްވަރާ ކުރައްވާނީ، 2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު ހަމާސް އިން އިސްރާއީލް އަށް ދިން ހަމަލާ އަށް ފަހު، ފެށުނު ޣައްޒާ ހަނގުރާމައާ ގުޅޭ ގޮތުންނެވެ.

އެގޮތުން ޔޫރަޕިއަން ޔޫނިއަންގެ ގިނަ ޤައުމު ތަކުން ވަނީ އިސްރާއީލްގެ ހަނގުރާމައިގެ އަމަލުތަކާ މެދު ކަންބޮޑުވުން ފާޅު ކޮށްފަ އެވެ. ޚާއްސަކޮށް އާންމު ރައްޔިތުންނަށް ހަމަލާދީ، އެތައް ބަޔަކު ޝަހީދު ކުރުމާއި، އިންސާނީ އެހީ ފޯރުކޮށްދިނުމުގައި ކުރިމަތިވާ ހުރަސްތަކާ މެދު އިސްރާއީލް އަށް ފާޑު ކިޔުންތައް އަމާޒު ކޮށްފައިވެ އެވެ.

އެކަން އެހެން އޮއްވައި، އދ އާއި އެހީގެ އެޖެންސީތަކާ އެކު މަސައްކަތް ކުރާ ބައިނަލްއަޤުވާމީ ބަނޑުހައި ހޫނު ކަމުގެ މޮނިޓަރިން ޖަމާއަތުން، ޣައްޒާގައި ބަނޑުހައި ހޫނުކަން އޮތް ކަމަށް ކަނޑައެޅުމާ އެކު، އިސްރާއީލް އަށް ކިޔަމުން އަންނަ ފާޑު ކިޔުންތައް ވަނީ އިތުރުވެފަ އެވެ. ނަމަވެސް، އިސްރާއީލް އިން ވަނީ އެ ނިންމުމާ ދެކޮޅު ހަދަައިފަ އެވެ.

ޔޫރަޕިއަން ޔޫނިއަންގެ މެމްބަރު ޤައުމު ތަކުގެ މެދުގައި އެއްބަސްވުމަކަށް އައުމުގައި ދަތި ތަކެއް ދިމާވެފައިވާއިރު، ބައެއް ޤައުމު ތަކުން އިސްރާއީލް އަށް އިޤްތިސާދީ ގޮތުން ފިޔަވަޅު އެޅުމަށް ގޮވާލާފައިވެ އެވެ. ނަމަވެސް އަނެއް ބައި ޤައުމު ތަކުން ބާރު އަޅަނީ ވާހަކަ ދައްކައިގެން، މަޝްވަރާގެ ދޮރު ހުޅުވާފައި ބެހެއްޓުމަށެވެ.

ޔޫރަޕިއަން ޔޫނިއަންގެ އިސްވެރިން ވަނީ، އެ ޔޫނިއަންގެ ރިސާޗް ފަންޑިން ޕްރޮގްރާމް އަށް އިސްރާއީލް އަށް އޮތް އެކްސެސް މަދު ކުރުމަށް ވެސް ހުށަހަޅައިފަ އެވެ. ނަމަވެސް، އެ ހުށަހެޅުމަށް ޔޫރަޕިއަން ޔޫނިއަންގެ މެމްބަރު ޤައުމު ތަކުގެ ފުރިހަމަ ތާއީދު ލިބިފައި ނުވެ އެވެ.

އެގޮތުން ފްރާންސް، ނެދަލެންޑްސް، ސްޕެއިން އަދި އަޔަލެންޑް ފަދަ ޤައުމު ތަކުން ވަނީ އެ ހުށަހެޅުމަށް ތާއީދު ކޮށްފަ އެވެ. އެހެން ނަމަވެސް، ޖަރުމަނު އަދި އިޓަލީ ފަދަ ޤައުމު ތަކުން ވަނީ އެ ހުށަހެޅުމާ ދެކޮޅު ހަދައިފަ އެވެ.

ކޯޕަންހޭގަންގައި އޮންނަ ބައްދަލުވުމުގައި ޤައުމު ތަކުގެ ވަޒީރުން އެ ބޭފުޅުންގެ ޚިޔާލު ހާމަ ކުރައްވާނެ ކަމަށް ބެެލެވުނު ނަމަވެސް، ވަކި ނިންމުމަކަށް އާދެވޭނެ ކަމަށް ނުބެލެވޭ ކަމަށް މަސްރަހު ދިރާސާ ކުރާ ފަރާތްތަކުން ބުނެ އެވެ.