ނޫސްވެރިކަމުގެ މިނިވަންކަމުގެ ވާހަކަ އިންތިހާއަށް ދައްކަވަމުން، މައުލޫމާތު ދިނުމާ ކަންކަން ހާމަކުރެއްވުމުގެ ވާހަކަ ހައްދެއް ނެތް މިންވަރަށް ދައްކަވަމުން، އެއްވެސް އެއްޗެއް ފޮރުވާފަ ނުބާއްވަވާނެ ކަމުގެ ވައުދުވެވަޑައިގަންނަވަމުން ވެރިކަމަށް ވަޑައިގެންނެވި ރައީސް ޑރ މުޙައްމަދު މުއިއްޒުގެ ސަރުކާރުން ނޫސް މީޑިއާތަކާ ނޫސްވެރިން ޖޫރިމަނާ ކުރެވޭ ގޮތަށް ބިލެއް ފަރުމާކުރުމަށްފަހު ބިލެއް މަޖިލީހަށް ހުށަހަޅައިފިއެވެ.
މި ޚަބަރު ލިބުމުން އެހާ ބޮޑަށް ހައިރާން ވާގޮތެއް ނުވިއެވެ. ޝޮކެއް ޖެހޭ ވަރެއް ވެސް ނުވިއެވެ. ސަބަބަކީ ރައީސް މުއިއްޒުގެ ވެރިކަން ފެށުނު ދުވަހުން ފެށިގެން މިއަދާ ހަމައަށް ރާއްޖޭގެ ނޫސްވެރިކަމަށް ކުރިމަތިވަމުން ދިޔަ، އަދި ކުރިމަތިވަމުންދާ ގޮންޖެހުންތަކާ މައުލޫމާތު ހޯދާ ލިބިގަތުމަށް ހުރި ހުރަސްތަކާ، މައުލޫމާތު ހާމަނުކޮށް ކަންކަން ސިއްރުކުރުމަށް ސަރުކާރުން ހުރި ފޯރިއާ ސަރުކާރާ އިދިކީލި ނުވަތަ ސަރުކާރަށް ފާޑުކިޔާ ނޫސްމީޑިއާތައް މާލީ ގޮތުން ބަލިކަށިކޮށް ހުއްޓުވުމަށް ސަރުކާރުގެ ހުރި ޝައުގުވެރިކަން ފާޅުކޮށް ފެންނަމުންދާތީއެވެ. އެއާއެކު މިލިއަނުން މިލިއަނުން ހަރަދުކޮށްގެން ސަރުކާރު ޕްރޯމޯޓް ކުރާ އައު ޓީވީ ތަކާއި، އޮންލައިންތަކާއި، ސޯޝަލް މީޑިއާ އެކްޓިވިސްޓުން އުފައްދަމުން ގެންދަނީ ފަތުއަޑު ކިޔާފައެވެ.
މަޖިލީހަށް ސަރުކާރުން ފޮނުވި ބިލުން އުފައްދަނީ 7 މެމްބަރުންގެ މައްޗަށް އެކުލެވޭ ކޮމިޝަނެއް ކަމަށްވެއެވެ. މި ކޮމިޝަން އުފެދުމާއެކު މިހާރުގެ ބްރޯޑްކޮމް އާއި މީޑިއާ ކައުންސިލް މަންސޫޚުވާނެ ކަމަށް ބިލުގައި އޮވެއެވެ.
ސަރުކާރުން އުފައްދަން އުޅޭ މީޑިއާ ކޮމިޝަން އަކީ އިންތިހާ ދަރަޖައިގެ މިނިވަން ކޮމިޝަންއެކެވެ. 7 މެމްބަރުންގެ ތެރެއިން 4 މެމްބަރުންނަކީ ރައީސް އައްޔަންކުރައްވާ 4 މެމްބަރުންނެވެ. ކޮމިޝަންގެ ރައީސް ހޮވަނީ ރައީސް އެވެ. ނައިބު ރައީސް ހޮވަނީވެސް ރައީސް އެވެ. ކޮމިޝަންގެ މެންޑޭޓްއަކީ ނޫސް މީޑިއާތަކާ ނޫސްވެރިންގެ މައްސަލަ ބަލައި ފިޔަވަޅު އެޅުމެވެ. ޖޫރިމަނާ ކުރުމެވެ. 5 ހާސް ރުފިޔާ އިން ފެށިގެން ގޮސް ލައްކައަކަށް ވުރެ މަތިން ޖޫރިމަނާ ކުރުމުގެ ބާރުވެސް ކޮމިޝަނަށް އޮވެއެވެ. ނޫސް އަދި ޓީވި ޖޫރިމަނާކުރާއިރު ވަކި ވަކި ނޫސްވެރިންވެސް ޖޫރިއަމަނާ ކުރެވެއެވެ. ނޫސްމީޑިއާތަކުގެ މައްސަލަ ބަލަމުންދާ ވަގުތު މައްސަލަ ބަލާ ނިމެންދެން، އެ މީޑިއާ އެއް ސަސްޕެންޑް ކޮށްފައި ބޭއްވުމުގެ ބާރު ވެސް ކޮމިޝަނަށް އޮވެއެވެ. ބިލުގައި މަދީ އެންމެ ތަންކޮޅެކެވެ. އެއީ މީޑިއާ ކޮމިޝަންގެ އޮފީސް ހުންނާނީ މާފަންނު ދިމްޔާތުގައި އޭ ބުނެފައި ނެތްތަންކޮޅެވެ. އެހެންނަމަ މި ބިލް ވަރަށް ފުރިހަމަ ވީހެވެ.
ނޫސްތަކާ މީޑިއާތައް ބޭނުންކޮށްގެން އޭރު ސަރުކާރާ ގުޅޭ ގޮތުން ހަގީގަތާ ޚިލާފު އެތައް ދޮގު މައުލޫމާތެއް ފަތުރަމުން އިންތިހާ ދަރަޖައިގެ ފިތުނަ ފަސާދަ ނޫސް މީޑިއާތައް މެދުވެރިކޮށް އުފައްދަމުން ރައްޔިތުންގެ މެދުގައި ނަފުރަތުގެ އަލިފާން ރޯކުރަމުން ވެރިކަމަށް ވަޑައިގެންނެވި ބޭފުޅަކަށް ވެރިކަމުގެ ފުރަތަމަ އަހަރުގެ ތެރޭގައި މަދު ނޫސްވެރިންނާ ދެ ތިން މީޑިއާއަކުން ކިޔާ ފާޑު ހަޖަމް ނުވެ، ސަރުކާރުން ހިންގާ ނޭއްގާނީ ކަންކަން ހާމަ ކުރާތީ އެކަމާ ލޮލަށް ނިދިނައިސް، ނޫސްވެރިކަމުގެ މިނިވަންކަން ނަގާލުމަށް ބިލެއް ފަރުމާކޮށް މަޖިލީހަށް ހުށަހެޅި އިރު ރައީސް މުއިއްޒުގެ ހިތްޕުޅަށް އެއްޗެއް އަރާވަޑައިނުގެން ސަބަބަކާ މެދު މީހަކު ހައިރާނެއް ނުވާނެއެވެ. ހުރިހާ ކަމަކަށް އަތް ބާނަމުން ގޮސް އެންމެ ފަހުން މި ދިމާކުރީ ނޫސްވެރިންގެ ގަލަމުގައި އަތް އެޅުމަށެވެ.
ދައުލަތުގެ މިނިވަން މުއައްސަސާތަކުގެ ކޮންޓްރޯލާ ލާމަރުކަޒީ ނިޒާމުން އުފެއްދި ކައުންސިލްތަކުގެ ކޮންޓްރޯލާ މަގުމަތީގައި ދުއްވާ ޓެކްސީތަކުގެ ކޮންޓްރޯލް ވެސް ނަންގަވަން ބޭނުންފުޅުވާ ބޭފުޅަކު މީޑިއާ ކޮންޓްރޯލް ކުރައްވަން ބޭނުންފުޅު ނުވާނެ ކަމާމެދު ޝައްކު އުފައްދާނެ މީހަކު ނުހުންނާނެއެވެ.
ގަބޫލު ކުރައްވާށެވެ. ޒަމާން ބަދަލު ވެއްޖެއެވެ. ގާނޫނެއް ހައްދަވައިގެން ކޮމިޝަނެއް އުފައްދަވައިގެން ޖޫރިމަނާގެ ބިރު ދައްކަވައިގެން ހިޔާލު ފާޅުކުރުމުގެ މިނިވަންކަން ހުއްޓުވޭނެ ކަމަށް ހީފުޅު ކުރެއްވޭ ނަމަ އެއީ ކުށްހީއެކެވެ. މައްސަލަ ބަލާނެ ކަމުގެ ބިރު ދައްކަވައިގެން މިނިވަން ނޫސްވެރިކަމުގެ ގަލަމުގައި ދޯރި ޖެއްސެވޭނެ ކަމަށް ހީފުޅުވާނަމަ އެއީ ވެސް ކުށް ހީއެކެވެ. އެދުވަސް ދިވެހިން މާޒީއަށް ދޫކޮށްލައިފިއެވެ. އެގޮތަށް އެކަން ކުރެވޭތޯ، ރާއްޖޭގައި ވެރިކަން ކުރެއްވި ބައެއް އެހެން ބޭފުޅުން ވެސް ބެއްލެވިއެވެ. އަބުރުގެ ގާނޫނުގެ ނަމުގައި ގާނޫނެއް ވެސް ހެއްދެވިއެވެ. މިލިއަނުން މީޑިއާތައް ޖޫރިމަނާވެސް ކުރެއްވިއެވެ. ނޫސްވެރިން ޖަލަށް ވެސް ލެއްވިއެވެ. އެކަމަކު ހިޔާލުފާޅު ކުރުމެއް، ފާޑުކިއުމެއް މައުލޫމާތު ހާމަކުރުމެއް ނުހުއްޓުވުނެވެ. އާޚިރުގައި ހަތިޔާރު ބެހެއްޓެވީ އެ ބޭފުޅުންނެވެ. ވީ އިރު މިއަދު ރައީސް ޑރ މުޙައްމަދު މުއިއްޒުއަށާއި، އެމަނިކުފާނުގެ ކޮމިއުނިކޭޝަން މިނިސްޓަރަށް މިކަން ކުރެއްވޭނެ ކަމަށް ހީފުޅުކުރެއްވޭނަމަ އެ ހެއްދެވެނީ ވަރަށް ބޮޑު ގޯހެކެވެ.
