ސްރީލަންކާގައި ފަތުރުވެރިންގެ މެދުގައި މަޝްހޫރު މަންޒިލެއް ކަމަށްވާ އަރުގަމް ބޭ އަށް ޓެރަރިސްޓު ހަމަލާ އެއް ދިނުމަށް ރޭވުމުގައި ބައިވެރިވި ކަމުގެ ތުހުމަތުގައި ހައްޔަރު ކުރި 6 މީހުންގެ ތެރޭގައި ދިވެއްސަކު ހިމެނޭ ކަމަށް ލަންކާގެ ފުލުހުން ހާމަ ކޮށްފިއެވެ.

ހައްޔަރު ކުރި މީހުންގެ ތެރޭގައި ދިވެއްސަކު ހިމެނޭކަން ލަންކާގެ މީޑިއަށް ކަށަވަރު ކޮށްދެއްވީ ޑެޕިއުޓީ އިންސްޕެކްޓަރ ޖެނެރަލް އޮފް ޕޮލިސް އަދި ފުލުހުންގެ ތަރުޖަމާނު، ނިހާލް ތަލްދުވާ އެވެ.

ހައްޔަރުކުރި ދިވެހި މީހާގެ ތަފްސީލު ލަންކާ ފުލުހުން ހާމަކޮށްފައެއް ނުވެއެވެ.

ފުލުހުންގެ ތަރުޖަމާނު ހޯމަ ދުވަހު ވިދާޅުވީ ދިވެހި ރައްޔިތަކު ހައްޔަރުކުރެވުނު ކަމަށާއި، ޝައްކުކުރެވޭ މީހުން ބަންދުގައި ބައިތިއްބައިގެން ސުވާލުކުރެވެމުންދާ ކަމަށެވެ.

ތުހުމަތު ކުރެވޭ މީހުން ހައްޔަރު ކުރުމާ ބެހޭ ގޮތުން ޓެރަރިޒަމް އިންވެސްޓިގޭޝަން ޑިވިޜަނުން ކޮލޮމްބޯ މެޖިސްޓްރޭޓް ކޯޓުގައި ހޯމަ ދުވަހު ބުނެފައިވަނީ، ބޭރުގެ ޓެރަރިސްޓް ޖަމާޢަތްތަކުގެ އަމުރަށް، ފަތުރުވެރިން ގިނައިން އުޅޭ ސަރަޙައްދުތަކަށް އަމާޒުކޮށް ޤައުމުގެ ތެރޭގައި ޙަމަލާއެއް ދިނުމުގެ ރޭވުމުގައި ބައިވެރިވިކަމުގެ ތުހުމަތު ހައްޔަރު ކޮށްފައިވާ 6 މީހުންގެ މައްޗަށް ކުރެވިފައިވާ ކަމުގައެވެ.

ކޯޓުގައި ތަހުގީގު ކުރާ ފަރާތްތަކުން އިތުރަށް ބުނެފައިވަނީ، ޑިފެންސް މިނިސްޓަރުގެ އަމުރަށް ތުހުމަތު ކުރެވޭ މީހުން 90 ދުވަހުގެ މުއްދަތައް ބަންދުކޮށްފައިވާ ކަމަށާއި އެމީހުން ހައްޔަރު ކޮށްފައިވަނީ ޓެރެރިޒަމް ހުއްޓުވުމާބެހޭ ގާނޫނުގެ ދަށުން ކަމުގައެވެ.

ޓެރަރިސްޓް އިންވެސްޓިގޭޝަން ޑިވިޜަނުން ހުށަހެޅި ތަފްޞީލުތަކާއި ޚާއްޞަ ރިޕޯޓު ބެލުމަށްފަހު، އެޑިޝަނަލް މެޖިސްޓްރޭޓް ހޯމަ ދުވަހު ވިދާޅުވީ، ތަޙުޤީޤު ކުރިއަށްދާ ގޮތުގެ މައުލޫމާތު ކޯޓަށް ގަވައިދުން ހުށަހަޅަމުން ގެންދިއުމަށާއި، ތަހުގީގު ކުރިއަށް ދާކަން ކޯޓުގެ ރެކޯޑަށް ފައިލުކުރެވިފައިވާ ކަމުގައެވެ.