ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން، (ޑީއެންއާރު) ތެރޭގައި ސަރުކާރު ހިންގާ ޕާޓީ ޕީއެންސީ އަށް މީހުން ވައްދަން ފޯމު ފުރާ މަންޒަރު ފެންނަ ފޮޓޯއެއް އާއްމުވެ، ޕީއެންސީ ހޫނުފެނަށް ވެއްޓިއްޖެއެވެ.
މީސްމީޑިއާގައި ވެސް މިފަދަ ފޮޓޯތަކެއް ދައުރުވަމުން ދާއިރު އެ ފޮޓޯތަކުން ޕީއެންސީ އަށް ނިސްބަތްވާ މީހުން ފޯމް ފުރުމުގެ މަސައްކަތުގައި އުޅޭ މަންޒަރު ފެނެއެވެ.
އިތުބާރު ހުރި ގޮތަކަށް މި ނޫހަށް މައުލޫމާތު ލިބިފައިވާ ގޮތުގައި މި ފޮޓޯ އަކީ ޑީއެންއާރުގެ މީޓިން ރޫމްގައި ނަގާފައިވާ ފޮޓޯތަކެކެވެ.
އަދި މި ފޮޓޯ ނަގާފައި ވަނީ ފޯރމް ފުރުމުގެ މަސައްކަތުގެ އަޕްޑޭޓްތައް އެންގުމުގެ ގޮތުން، މި މަސައްކަތް ކުރަމުން ދިޔަ މުވައްޒަފުން އަމިއްލައަަށް ކަމަށް ވެސް ވަނީ އެނގިފައެވެ. ރާއްޖެ އެމްވީ އަށް އެނގިފައިވާ ގޮތުން މި މަސައްކަތުގައި ހަރަކާތްތެރިވި މުވައްޒަފުންނަކީ ޑީއެންއާރުގައި ތިބި ބައެއް ސިޔާސީ މުވައްޒަފުންނެވެ.
ޑިޕާޓްމަންޓް އޮފް ނޭޝަނަލް ރެޖިސްޓްރޭޝަންގައި ތިބެގެން މިފަދަ މަސައްކަތެއް ކުރުމަކީ ކަންބޮޑުވާ ކަމެއް ކަމަށް ސިޔާސީ ޕާޓީތަކުން ވަނީ ބުނެފައެވެ. މި ފޮޓޯތައް އާއްމުވުމާއި ގުޅިގެން ރާއްޖެ އެމްވީން ސުވާލުކުރުމުން އެމްޑީޕީގެ ޗެއަރޕަރސަންގެ ނައިބު އަދި ބާރަށު ދާއިރާގެ ކުރީގެ މެންބަރު އަހުމަދު އަބްދުﷲ ވިދާޅުވީ މިއީ ވަރަށް ދެރަވަރު ކަމެއް ކަމަށެވެ. އަދި ސަރުކާރު ހިންގާ ޕާޓީގެ ފަރާތުން މިފަދަ ޢަމަލެއް ފެނުމަކީ ބަލައިގަނެވޭ ކަމެއް ނޫން ކަމަށް އޭނާ ވިދާޅުވިއެވެ. މިއީ ސަރުކާރަކުން ކޮށްގެންވާނެ ޒާތުގެ ކަމެއް ނޫން ކަަމަށް އޭނާ ވަނީ ވިދާޅުވެފައެވެ. މިއީ އިންތިހާއަށް ކަންބޮޑުވާކަމެއްކަން ފާހަގަކޮށް އޭނާ ވަނީ މިފަދަ ކަންކަން ބެލެންވާނެ ކަމަށް ފާހަގަކުރައްވާފައެވެ.
މި މައްސަލަ އާއި ގުޅިގެން ރާއްޖެ އެމްވީ އަށް މައުލޫމާތު ދެއްވަމުން ޖުމްހޫރީ ޕާޓީގެ ރެޖިސްޓްރަރ، އަލީ ސާލިހު ވިދާޅުވީ މިހާތަނަށް ކަން ހިނގާ ގޮތަށް ބަލާ އިރު އަބަދުވެސް ވެރިކަމުގައި އޮންނަ ސިޔާސީ ޕާޓީއަކަށް މީހުން އިތުރުވުމަކީ ކަން ހިނގާ އުސޫލު ކަމަށެވެ. ހަމައެހެންމެ މީގެ ކުރިން ވެސް ސަރުކާރުތަކުން ޑީއެންއާރުގެ ޑޭޓާ ބޭނުންކޮށްގެން، ނުވަތަ ޑީއެންއާރު މެދުވެރިކޮށް މައުލޫމާތު ނަގައިގެން ޕާޓީތަކަށް މެމްބަރުން އިތުރުކުރާ ކަމަށް އަޑު ފެތުރުނު ނަމަވެސް މިފަދަ ކަމެއް ހިނގާ މަންޒަރު ފެންނަ ފޮޓޯ އެއް އާއްމުވި މިއީ ފުރަތަމަ ފަހަރުކަން އޭނާ ވަނީ ފާހަގަކުރައްވާފައެވެ. އަލީ ސޯލިހް ވިދާޅުވީ ޕީއެންސީގައި ވެސް އޮފީސްތައް ހުންނާނެ ކަމަށާއި، ޑީއެންއާރުގެ އޮފީސް ތެރޭގައި ފޯރމް ފުރުމުގެ ކަންކަން ކުރަން ޖެހޭ ސަބަބެއް އޮވެގެން ނުވާނެ ކަމަށެވެ. އަދި ޕީއެންސީ އަކީ އޮފީސް ހިންގާނެ ޖާގަ އާއި ފައިސާ އޮތް ޕާޓީ އެއް ކަމަށާއި މިފަދަ އަމަލެއް އެ ޕާޓީގެ ކިބައިން ފެނުމުން ކަންބޮޑުވާ ކަމަށް އޭނާ ވިދާޅުވިއެވެ. އަދި އެ މައްސަލަ ޕާޓީގެ ކަމާއި ބެހޭ ފަރާތްތަކުގެ ސަމާލުކަަމަށް ގެނައުމަށް ރަސްމީކޮށް ކުރަން ޖެހޭ މަސައްކަތްތައް ކުރަމުންދާނެ ކަމަށް އޭނާ ވަނީ ވިދާޅުވެފައެވެ.
މި މައްސަލަ އާއި ގުޅިގެން އިލެކްޝަންސް ކޮމިޝަނާއި ސުވާލުކުރުމުން އެ ކޮމިޝަންގެ މެމްބަރު ހަސަން ޒަކަރިއްޔާ ވަނީ އެފަަދަ މައްސަލަ އެއް ރަސްމީކޮށް ވެސް އަދި ނުރަސްމީކޮށް ވެސް އިލެކްޝަންސް ކޮމިޝަނަށް އަދި ހުށަހަޅާފައި ނުވާކަން ހާމަކުރައްވާފައެވެ. އެހެންނަމަވެސް ސަރުކާރު އޮފީހެއް ތެރޭގައި ސިޔާސީ ޕާޓީ އެއްގެ ފޯމް ފުރުމުގެ މަސައްކަތް ކުރުމަކީ ބަލައިގަނެވޭނެ ކަމެއް ނޫން ކަމަށް އޭނާ ވަނީ ވިދާޅުވެފައެވެ. އެހެންނަމަވެސް ސިޔާސީ ޕާޓީއެއްގެ ފޯރމްތައް ބަލައިގަންނަ އިރު އެ ފޯރމްތަކުގެ ސައްހަކަން ކަށަވަރުކުރުމަށް އިލެކްޝަންސް ކޮމިޝަނުން ފުރިހަމައަށް މަސައްކަތްކުރާނެކަން ހަސަން ވަނީ ފާހަގަކުރައްވާފައެވެ.
ވެރިކަން ކުރާ މައި ޕާޓީ، ޕީއެންސީގެ މެމްބަރުންގެ އަދަދު 60،000 އަށް ވުރެ މައްޗަށް އަރާފައިވާ ކަމަށް އެ ޕާޓީން ވަނީ ދާދިފަހުން ބުނެފައެވެ. އަދި ޕީއެންސީ އަށް މެމްބަރުން އިތުރު ކުރުމަށް މިހާރު ކުރާ މަސައްކަތަކީ ރައީސް ޑރ. މުހައްމަދު މުއިއްޒު އިސް ނަންގަވައިގެން އެމަނިކުފާނުގެ ލަފާފުޅާއި އިރުޝާދާ އެކީގައި ކުރައްވަމުން ގެންދަވާ މަސައްކަތެއް ކަމަށް ވެސް އެ ޕާޓީން ވަނީ ބުނެފައެވެ. މިކަމުގައި ޕީއެންސީގެ މަޖިލިސް މެމްބަރުންގެ ގޮތުގައި ތިއްބެވި 75 މެމްބަރުންގެ އިތުރުން ސަރުކާރުގެ ސިޔާސީ އިސް ބޭފުޅުން ވެސް ހަރަކާތްތެރިވެވަޑައިގަންނަވައެވެ. މި މަސައްކަތް އަވަސްކުރައްވަމުން ދަނީ ރައީސް ޑރ. މުއިއްޒުގެ ވެރިކަމަށް އަހަރު ފުރޭ އިރު، ޕީއެންސީއަކީ ރާއްޖޭގައި އޮތް އެންމެ މެމްބަރުން ގިނަ ޕާޓީއަށް ހެދުމަށް ކަމަށް ޕީއެންސީގެ ރައީސް އަދި މަޖިލީހުގެ ރައީސް އަބްދުއްރަހީމް އަބްދުﷲ ވަނީ ވިދާޅުވެފައެވެ.
އިތުބާރު ހުރި ގޮތަކަށް މައުލޫމާތު ލިބިފައިވާ ގޮތުގައި ޕީއެންސީ އަށް މީހުން އިތުރު ކުރުމަށް ފައިސާ އާއި ނުފޫޒުގެ އިތުރުން ނާޖާއިޒް ފައިދާ ހޯދައިދިނުންފަދަ ކަރަޕްޓް ކަންކަން ދަނީ ހިންގަމުންނެވެ.
