ރައްޔިތުން ނުކުމެ އަސްލު ރައީސް ޑރ.މުހައްމަދު މުއިއްޒު ހޯދައި، ޖަވާބުދަރީ ކުރުވަންޖެހޭ ކަމަށް ދަ ޑިމޮކްރެޓްސްގެ ލާމަރުކަޒީ ކޮމިޓީގެ ޗެއަރ މުހައްމަދު ވަހީދު (ވައްޑެ) ވިދާޅުވެއްޖެއެވެ.
ބުދަ ދުވަހުގެ ރޭ ދަ ޑިމޮކްރެޓްސްއިން ބޭއްވި ޖަލްސާގައި ވަހީދު ވަނީ ރައީސް މުއިއްޒަށް ވަރަށް ބޮޑަށް ފާޑު ވިދާޅުވެ ވާހަކަދައްކަވާފައެވެ. ވަހީދު ވިދާޅުވީ އަސްލު ރައީސް މުއިއްޒު މިހާރު އޮޅިއްޖެ ކަމަށާއި، އެކި ދުވަހު ރައްޔިތުންނަށް ދައްކަމުންދަނީ އެކި ކުލަވަރު ކަމަށެވެ. ރާއްޖެއަށް އެއް ޝަހުސިއްޔަތެއް ގެންގުޅޭ ރައީސްއެއް ބޭނުންވާ ކަމަށް ވަހީދު ވިދާޅުވިއެވެ.
ރައީސް މުއިއްޒު ޖަވާބުދާރީ ކުރުވަންޖެހޭކަން ފާހަގަކުރައްވައި ވަހީދު ވިދާޅުވީ އެ މަސައްކަތް ނުކޮށް އަމާންކަމާއެކު ނިދަން ތިބެވެން ނެތް ކަމަށެވެ. އަދި މިގައުމު މިގެންދަނީ ރަނގަޅު މިސްރާބަށްތޯ ބަލައި، ކަށަވަރުކުރަންޖެހޭ ކަމަށް ވަހީދު ވިދާޅުވިއެވެ.
އަޅުގަނޑުމެންގެ ރާއްޖޭގައި ހުންނަންޖެހޭނީ ކޮންމެވެސް އެއް ޝަހުސިއްޔަތެއް ގެންގުޅޭ އަޅުގަނޑުމެންނަށް ސާފުކޮށް ކާކުކަން ކާކު ދަރިއެއްކަން އެނގޭ އެކަކު ހުންނަންޖެހޭނީ. ދިހަ ބާރަ މީހުންގެ ފިބާ ސެޓެއް އަޅުގަނޑުމެން ރައީސުލްޖުމްހޫރިއްޔާ ކަމަށް ލައިގެން އަޅުގަނޑުމެންގެ ގައުމު އޭނައަށް ދޫކޮށްލައިގެން އަމާންކަމާއެކު ނިދާކަށް ތިބެވޭކަށްނެތް. އަޅުގަނޑުމެން މި ޕާޓީން އެބަ ޖެހޭ އަސްލު އެތި ހޯދަން. އަޅުގަނޑުމެން އެބަ ޖެހޭ އަސްލު މުއިއްޒު ހޯދަން. އޭނާ ޖަވާބުދާރީ ކުރުވަން އެބަޖެހޭ. ފަހާ ދުވަގެން ނަމަވެސް އޭނާ ޖަވާބުދާރީ ކުރުވަންޖެހޭ. އޭނާވީ ވައުދުތައް އޭނާ ލައްވަ ފުއްދުވަންޖެހޭ. އޭނާ ކޮށްގެން އެހުރި ހުވާ އެއީ ތެދު ހުވައެއްކަން އަޅުގަނޑުމެން އެބަ ކަށަވަރުކުރަންޖެހޭ. މިގައުމު މިގެންދަނީ ރަނގަޅު މިސްރާބަކަށްކަން އަޅުގަނޑުމެން ކަށަވަރުކުރަންޖެހޭ. އަޅުގަނޑުމެން ކުޑަޔަސް މަދަސް އަޅުގަނޑުމެން އިރާދަކުރެއްވިއްޔާ މިމަސައްކަތުގައި ސާބިތުކަމާއެކު ތިބޭނަން. މިފެއްޓީ މިރޭ.ދަ ޑިމޮކްރެޓްސްގެ ލާމަރުކަޒީ ކޮމިޓީގެ ޗެއަރ މުހައްމަދު ވަހީދު (ވައްޑެ)
ވަހީދު ވިދާޅުވީ ޖަވާބުދާރީ ކުރުވުމަށް ކުރަންޖެހޭ ހުރިހާ މަސައްކަތެއް ކުރާނެ ކަމަށާއި، ފަހަތަށް ނުޖެއްސޭނެ ކަމަށެވެ. އަދި ވިދާޅުވީ ބިރު ދެއްކުމަށް މަސައްކަތް ކުރި ނަމަވެސް އެކަން ކާމިޔާބު ނުވާނެ ކަމަށާއި، ދާނީ ބާރަށް ކުރިއަށް ކަމަށެވެ.
