ބަޖެޓަށް ވީ ގޮތް ބުނެ ނުދޭނަމަ މުލިއާގެ ދޮށަށް ވެސް އެއްވާނެ ކަމަށާއި ވެރިކަމުގައި މުއިއްޒު ހުންނަވަން ޖެހޭނީ ވާނުވާ ބުނެދީފައި ކަމަށް ދަ ޑިމޮކްރެޓްސްގެ ނައިބު ރައީސް މުހައްމަދު ޝިފާޒު ވިދާޅުވެއްޖެ އެވެ.

ދަ ޑިމޮކްރެޓްސް އިން ބުދަ ދުވަހުގެ ރޭ ބޭއްވި ކަންމަތީ ޖަލްސާގައި ވާހަކަފުޅު ދައްކަވަމުން ޝިފާޒް ވިދާޅުވީ، މާލީ ދަތިކަން ޖެހުނު އެންމެ ބޮޑު އެއް ސަބަބަކީ ބަޖެޓުގައި ނެތް ފައިސާ، 37 މިލިއަން ޑޮލަރު ހަރަދުކުރުން ކަމަށެވެ. އެހެންކަމުން ބަޖެޓަށް ވީ ގޮތުގެ ޝަކުވާ އެއީ އެންމެ ބޮޑު ޝަކުވާ ކަމަށާއި، ޒުވާބަކީ ވެސް އެއީ ކަމަށެވެ.

ޝިފާޒް އިތުރަށް ވިދާޅުވީ، ރައްޔިތުންގެ މަޖިލީހުގެ ބަޖެޓް ދިރާސާ ކުރާ ކޮމިޓީ ވެސް ސިއްރު ކަމަށާއި، އޭގަ އޮތް އެއްޗެއް ވެސް ސިއްރު ކަމަށެވެ. އެހެންކަމުން ރާއްޖެ ސަލާމަތް ކުރުމަށް، ކަށިމަތި ނާޅަންވީ ސަބަބެއް ނެތް ކަމަށެވެ.

"ތައްޔާރުވޭ ކަށިމަތި އަޅުއްވަން. މަގުމައްޗަށް ނުކުންނަން ޖެހޭނީ" ޝިފާޒް ވިދާޅުވިއެވެ.  

ޝިފާޒް ވިދާޅުވި ގޮތުގައި ރައީސް ޑރ. މުއިއްޒު ހަމަ މަގަށް އަޅުވަން އެންމެ އައުލާކަން ބޮޑީ ޑިމްކޮރެޓްސްގެ މެމްބަރުންނެވެ. ހާއްސަކޮށް ރައްޔިތުންގެ މާލިއްޔަތަށް ވަމުންދާ އިހުމާލު ފާހަގަކުރައްވާ ޝިފާޒް ވިދާޅުވީ، ޑރ މުއިއްޒު ކުރައްވަމުން ގެންދަވާ ކަންކަން ހަމަ މަގަށް އަޅުވަން މަސައްކަތް ކުރައްވާނެ ކަމަށެވެ.

ޝިފާޒް ވިދާޅުވީ، ރައްޔިތުން ބުރަ އާއި ވޭނާ ތަކުލީފް އުފުލައިގެން ހޯދި ގާނޫނު އަސާސީ "ވެއްޔާ މޮޑެވިއްޖެ" ކަމަށެވެ. އެ އަސާސީ ހައްގުތައް ނިގުޅައިގެންފި ކަމަށާއި، އެ ހައްގުތަށް އަލުން އަނބުރާ ހޯދުމަށްޓަކައި ނިކުންނަވާހަކަ ދައްކަން ޖެހުނީ އެ ސަބަބާާ ހެދި ކަމަށް ޝިފާޒް ވިދާޅުވިއެވެ.

އަދި ރައްޔިތުންގެ މަޖިލީހުގެ މެމްބަރުން އަޅުވެތި ކުރަމުން ކުރަމުން ގޮސް ރަސްމީކޮށް "އަޅުން ގޮތަށް ލީގަލައިޒް" ކޮށް ސްޓޭމްޕް ޖަހައިފި ކަމަށެވެ. އެހެންކަމުން ރައްޔިތުންގެ މަޖިލީހުގައި މިހާރު ތިއްބެވީ ރައްޔިތުންގެ މަންދޫބުން ނޫން ކަމަށް ޝިފާޒް ވިދާޅުވިއެވެ.